നിയമവിരുദ്ധമായ അറസ്റ്റിനും പീഡനത്തിനും ഇരയായ മുന്‍ ഐ.എസ്.ആര്‍.ഒ ശാസ്ത്രജ്ഞന്‍ എസ്.നമ്പിനാരായണന്‍ തിരുവനന്തപുരം സബ് കോടതിയില്‍ ഫയല്‍ ചെയ്ത കേസ് ഒത്തുതീര്‍പ്പാക്കുന്നതിന് 1.3 കോടി രൂപ നല്‍കണമെന്ന ശുപാര്‍ശ തത്വത്തില്‍ അംഗീകരിക്കാന്‍ സംസ്ഥാന സർക്കാർ തീരുമാനിച്ചു.

ശമ്പളവും പെൻഷനും നൽകാനാവാതെ ട്രഷറിസ്തംഭനത്തിലേക്ക് നീങ്ങുന്ന ഒരു സർക്കാരാണ് 1.3 കോടി നൽകാൻ തത്വത്തിൽ തീരുമാനിച്ചത്. സർക്കാർ പണം നൽകാൻ തീരുമാനിക്കുക എന്നതിന് അർത്ഥം ജനങ്ങൾ നൽകുന്ന നികുതി പണം കൈമാറുക എന്നതാണ്. നമ്പി നാരായണനെ കേസിൽ കുരുക്കിയതിന് പിന്നിൽ കേരളത്തിലെ ഒരു സാധാരണ പൗരനുമില്ല.

സുപ്രീംകോടതി നിര്‍ദ്ദേശപ്രകാരം നല്‍കിയ 50 ലക്ഷം രൂപയ്ക്കും ദേശീയ മനുഷ്യാവകാശകമ്മീഷന്‍ ശുപാര്‍ശ ചെയ്ത 10 ലക്ഷം രൂപയ്ക്കും പുറമേ ആയിരിക്കും ഇത്. നിയമവിദഗ്ധരുമായി ആലോചിച്ച് തയ്യാറാക്കുന്ന ഒത്തുതീര്‍പ്പുകരാര്‍ തിരുവനന്തപുരം സബ്‌കോടതിയില്‍ സമര്‍പ്പിക്കാനും കോടതിയുടെ തീരുമാനപ്രകാരം തുടര്‍ നടപടികള്‍ സ്വീകരിക്കാനും തീരുമാനിച്ചു. നമ്പിനാരായണന്‍ ഉന്നയിച്ച പ്രശ്‌നങ്ങള്‍ പരിശോധിക്കാനും കേസ് രമ്യമായി തീര്‍പ്പാക്കുന്നതിനുമുള്ള ശുപാര്‍ശകള്‍ സമര്‍പ്പിക്കുന്നതിന് മുന്‍ ചീഫ്‌സെക്രട്ടറി കെ. ജയകുമാറിനെ ഗവണ്‍മെന്റ് ചുമതലപ്പെടുത്തിയിരുന്നു. ജയകുമാറിന്റെ ശുപാര്‍ശ പരിഗണിച്ചാണ് മന്ത്രിസഭ തീരുമാനം എടുത്തത്.

നമ്പി നാരായണൻ സർക്കാർ നൽകി കഴിഞ്ഞത് 60 ലക്ഷം രൂപയാണ്. ഇനി 1.3 കോടി കൂടി കൊടുക്കണം. സാധാരണ ഗതിയിൽ പോലീസ് പീഡനം കാരണം ഒരാൾക്ക് മനുഷ്യാവകാശ ലംഘനം ഉണ്ടായാൽ സർക്കാർ നഷ്ട പരിഹാരം നൽകുകയും അത് ബന്ധപ്പെട്ട ഉദ്യോഗസ്ഥരിൽ നിന്നും ഈടാക്കുകയും ചെയ്യും. നമ്പിയുടെ കേസിൽ ആരോപണ വിധേയരായ നിരവധി ഉദ്യോഗസ്ഥരുണ്ട്. ഇതിൽ സിബി മാത്യുവിനെ പോലുള്ള പ്രമുഖ ഉദ്യാഗസ്ഥരുമുണ്ട്. എന്നാൽ അവരെല്ലാം രക്ഷപ്പെടുകയും സാധാരണക്കാരന്റെ നികുതി പണത്തിൽ നിന്ന് നഷ്ട പരിഹാരം നൽകുകയും ചെയ്യുന്നു.

നമ്പി നാരായണനെതിരെയുണ്ടായ ആക്രമത്തിൽ കെ കരുണാകരനെതിരെ കരുനീക്കങ്ങൾ നടത്തിയവരും ഉണ്ടായിരുന്നു. അവർക്ക് കരുണാകരന്റെ മുഖ്യമന്ത്രി സ്ഥാനം തെറിപ്പിക്കുകയായിരുന്നു ലക്ഷ്യം. മുൻ മുഖ്യമന്ത്രി ഉമ്മൻ ചാണ്ടിയുടെയും പരേതനായ എം ഐ ഷാനവാസിന്റെയും പേരുകൾ ഗൂഢാലോചനയിൽ പറഞ്ഞുകേൾക്കുന്നുണ്ട്. എന്നാൽ സർക്കാർ 1.63 കോടി നൽകുമ്പോൾ കരുണാകരനെ ഇല്ലാതാക്കാൻ ചാരക്കേസ് മെനഞ്ഞെടുത്തവരൊന്നും രംഗത്തില്ല. തങ്ങൾക്ക് ഇതിൽ പങ്കേ ഇല്ലെന്ന മട്ടിലാണ് നേതാക്കൾ അഭിനയിക്കുന്നത്.

ചാരക്കേസിനെ കുറിച്ച് എല്ലാമറിയുന്ന രമൺ ശ്രീവാസ്തവ ഇന്ന് മുഖ്യമന്ത്രിയുടെ ഉപദേശകനാണ്. നമ്പിയുടെ നിരപരാധിത്വത്തെ കുറിച്ച് നന്നായറിയുന്ന രമൺ ശ്രീവാസ്തവ നമ്പി നാരായണൻ ആവശ്യപ്പെട്ട പണം സർക്കാർ ഖജനാവിൽ നിന്നും നൽകാൻ പച്ചക്കൊടി വീശും.

സർക്കാർ ഖജനാവ് ഒരു പൊതു മുതലാണ്. ഒന്നരകൊല്ലം കൂടി മാത്രമേ അത് ഡോ. തോമസ് ഐസക്കിന്റെ കസ്റ്റഡിയിൽ ഇരിക്കുകയുള്ളു. അതുകഴിയുമ്പോൾ അതിന്റെ നേതൃത്വത്തിലേക്ക് മറ്റാരെങ്കിലും കടന്നു വരാം. പീഡിപ്പിക്കപ്പെട്ടവർ നഷ്ട പരിഹാരം ചോദിക്കുമ്പോൾ പൂർണമനസോടെ നൽകുകയല്ല വേണ്ടത്. തുക വലുതായണെങ്കിൽ കേസ് തോറ്റാലും ജയിച്ചാലും മേൽ കോടതികളിൽ ചോദ്യം ചെയ്യണം. കാരണം ട്രഷറിയിലുള്ള ഓരോ നയാ പൈസയും രക്തം വിയർപ്പാക്കുന്നവരുടെ വകയാണെന്ന് സർക്കാർ മറക്കരുത്. ഇല്ലെങ്കിൽ പീഡിതൻ ചോദിക്കുന്ന എല്ലാ പണവും പീഡിപ്പിച്ചവരിൽ നിന്ന് ഈടാക്കി നൽകണം. അതാണ് മര്യാദ.