പൗരത്വ ഭേദഗതി നിയമത്തോട് വിയോജിച്ച് ലീഗ് ദിനപത്രമായ ചന്ദ്രിക കേന്ദ്രസർക്കാർ പരസ്യങ്ങൾ സ്വീകരിക്കേണ്ടെന്ന് തീരുമാനിച്ചിരിക്കെ കേന്ദ്ര സർക്കാരിനെ നാഴികയ്ക്ക് നാൽപ്പതുവട്ടം സി പി എം, സി പി ഐ, കോൺഗ്രസ് പാർട്ടി പത്രങ്ങൾ എന്ത് നിലപാട് എടുക്കുമെന്ന് കേരളം കാത്തിരിക്കുന്നു.

ചന്ദ്രിക ലാഭകരമായി പ്രവർത്തിക്കുന്ന ഒരു ദിനപത്രമല്ല. മുസ്ലീം ലീഗിന്റെ പരിമിതമായ സാമ്പത്തിക സൗകര്യങ്ങൾക്കുള്ളിൽ നിന്നു കൊണ്ടാണ് ചന്ദ്രിക പ്രവർത്തിക്കുന്നത്. ശമ്പളം പോലും കൃത്യമായി കൊടുക്കാനാവാത്ത സാഹചര്യം ചന്ദ്രികയിൽ നിലവിലുണ്ട് എന്നാണ് ആക്ഷേപം.

എന്നാൽ സി പി എം പാർട്ടി പത്രം സാമ്പത്തികമായി മെച്ചപ്പെട്ട അവസ്ഥയിലാണ്. സർക്കാർ ജീവനക്കാരിൽ ഒരു നല്ല ശതമാനം പാർട്ടി പത്രത്തിന്റെ വരിക്കാരാണ്. സി പി ഐയുടെ പത്രവും അത്ര മോശപ്പെട്ട അവസ്ഥയിലല്ല. അടുത്ത കാലത്ത് പത്രത്തിന്റെ അച്ചടി വരെ പുതിയ രൂപത്തിലാക്കി. കോൺഗ്രസിന്റെ പത്രമാകട്ടെ കോൺഗ്രസുകാർക്ക് പോലും താത്പര്യമില്ലാത്തതിനാൽ മെച്ചപ്പെട്ട സാമ്പത്തികമായി നല്ല അവസ്ഥയിലല്ല. കോൺഗ്രസിന്റെ മുഖപത്രം ദീർഘകാലം അച്ചടി മുടങ്ങിയതാണ്. പിന്നീട് എ.കെ. ആന്റണി താത്പര്യമെടുത്താണ് പത്രത്തിന്റെ അച്ചടി പുനരാരംഭിച്ചത്.

പത്രത്തിന് പരസ്യമില്ലാതെ നിലനിൽപ്പില്ല. ലോകത്ത് ഏറ്റവുമധികം വിലകുറച്ച് വിൽക്കുന്ന ഉത്പന്നമാണ് ദിനപത്രം. പരസ്യത്തിന്റെ പിന്തുണ ഉള്ളതു കൊണ്ടു മാത്രമാണ് ഇത്രയധികം വില കുറച്ച് പത്രങ്ങൾ നടത്താൻ കഴിയുന്നത്. മുഖ്യധാരാ പത്രങ്ങൾ ഒഴികെയുളളവ നഷ്ടത്തിലാകാനുള്ള പ്രധാന കാരണം പരസ്യങ്ങളുടെ അഭാവം തന്നെയാണ്. സി പി എമ്മിന്റെയും സി പി ഐയുടെയും പത്രങ്ങൾക്ക് പരസ്യങ്ങൾക്ക് പഞ്ഞമില്ല. കോൺഗ്രസിന് കേരളത്തിലും കേന്ദ്രത്തിലും ഭരണമില്ലാത്തതിനാൽ പരസ്യത്തിന്റെ കാര്യത്തിൽ ബുദധിമുട്ട് അനുഭവപ്പെടുന്നുണ്ട്. അടുത്ത കാലത്തായി വാണിജ്യ പരസ്യങ്ങൾക്ക് വൻ ഇടിവ് സംഭവിച്ചിട്ടുണ്ട്.വിപണിയിലുണ്ടായ തകർച്ചയാണ് ഇതിന് കാരണം.

നിരവധി കേന്ദപദധതികളുടെ പരസ്യങ്ങൾ വിവിധ പാർട്ടി പ്രസിദ്ധീകരണങ്ങളിൽ അച്ചടിക്കുന്നുണ്ട്. അത് എല്ലാ പത്രങ്ങൾക്കും ജനാധിപത്യപരമായി നൽകണമെന്നത് കേന്ദ്രം ഭരിക്കുന്ന പാർട്ടിയുടെ നിലപാടല്ല. സർക്കാരിന്റെ ഏതൊക്കെ പരസ്യങ്ങൾ ഏതെല്ലാം പത്രങ്ങൾക്ക് നൽകണമെന്ന് തീരുമാനിക്കുന്നത് കേന്ദ്ര വാർത്താവിതരണ മന്ത്രാലയമാണ് . അതിൽ അവർക്കുള്ള അധികാരം ആർക്കും ചോദ്യം ചെയ്യാനാവില്ല. കേന്ദ്ര സർക്കാരിന്റെ നയങ്ങൾ തീരുമാനിക്കുന്നത് ഭരിക്കുന്ന പാർട്ടിയായ ബി ജെ പിയാണ്. വാർത്താ വിതരണ മന്ത്രാലയത്തിനും രാഷ്ട്രീയ നയങ്ങൾ ബാധകം തന്നെയാണ്.

പത്രങ്ങളെക്കാൾ കൂടുതൽ പരസ്യങ്ങൾ വാങ്ങുന്നത് കേന്ദ്ര സർക്കാരിനെ എന്തിനും ഏതിനും വിമർശിക്കുന്ന ഭൃശ്യമാധ്യമങ്ങളാണ്. ഒരു ബിജെപി നേതാവിന്റെ ഉടമസ്ഥതതയിലുള്ള ദൃശ്യമാധ്യമം കോടികളാണ് കേന്ദ്രസർക്കാരിൽ നിന്നും പരസ്യ ഇനത്തിൽ ഈടാക്കുന്നത്. എന്നാൽ കേന്ദ്രസർക്കാരിനെതിരെ നടത്തുന്ന വിമർശനങ്ങളിൽ ഇവർ ഒരു ദയയും കാണിക്കാറില്ല. ദേശീയ തലത്തിൽ നെറ്റ് വർക്കുള്ള മലയാളം ദൃശ്യമാധ്യമങ്ങളും കേന്ദ്രസർക്കാരിന്റെ പരസ്യം യഥേഷ്ടം നൽകുന്നുണ്ട്. കേന്ദ്രത്തിനെതീരെ ഇവർ നടത്തുന്ന ചർച്ചകൾ കണ്ടാൽ കണ്ണുതള്ളിപോകും.

എന്നാൽ കേന്ദ്രസർക്കാരിന്റെ പോക്കറ്റിൽ നിന്നുള്ള പണമല്ല പരസ്യവരുമാനമായി ലഭിക്കുന്നതെന്ന് പാർട്ടിക്കാർ പറയുന്നു. അതെന്തായാലും ആർക്കൊക്കെ പരസ്യം നൽകണമെന്ന കാര്യത്തിൽ കേന്ദ്രം ഉടൻ തീരുമാനമെടുത്തേക്കും.