കോഴിക്കോട് പന്തീരങ്കാവില് മാവോയിസ്റ്റ് ബന്ധം ആരോപിച്ച് രണ്ട് സി.പി.എം പ്രവര്ത്തകര്ക്കെതിരെ യു.എ.പി.എ ചുമത്തുകയും കേസ് സംസ്ഥാന സര്ക്കാരിന്റെ അറിവോടെ ദേശീയ അന്വേഷണ ഏജന്സിക്ക് കൈമാറുകയും ചെയ്തിട്ട് മുഖ്യമന്ത്രി പിണറായി വിജയന് ഒന്നും അറിഞ്ഞില്ലെന്ന മട്ടില് പീലാത്തോസിനെ പോലെ കൈ കഴുകുന്നെന്ന് ആക്ഷേപം
കോഴിക്കോട് പന്തീരങ്കാവില് മാവോയിസ്റ്റ് ബന്ധം ആരോപിച്ച് രണ്ട് സി.പി.എം പ്രവര്ത്തകര്ക്കെതിരെ യു.എ.പി.എ ചുമത്തുകയും കേസ് സംസ്ഥാന സര്ക്കാരിന്റെ അറിവോടെ ദേശീയ അന്വേഷണ ഏജന്സിക്ക് കൈമാറുകയും ചെയ്തിട്ട് മുഖ്യമന്ത്രി പിണറായി വിജയന് ഒന്നും അറിഞ്ഞില്ലെന്ന മട്ടില് പീലാത്തോസിനെ പോലെ കൈ കഴുകുന്നെന്ന് ആക്ഷേപം. എന്.ഐ.എ കേസ് ഏറ്റെടുക്കുകയായിരുന്നെന്ന് സി.പി.എം വിശദീകരണക്കുറിപ്പ് ഇറക്കിയെങ്കിലും വിമര്ശനങ്ങള് തുടരുകയാണ്. സര്ക്കാരിന്റെ അറിവില്ലാതെ ഇത്തരത്തിലൊരു തീരുമാനം നടപ്പാകില്ലെന്ന് സാമാന്യബോധമുള്ള ആര്ക്കും അറിയാമെന്ന് രാഷ്ട്രീയ നിരീക്ഷകനായ ഉമോഷ്ബാബു കെ.സി ആരോപിക്കുന്നു. അദ്ദേഹം അടക്കം നിരവധി രാഷ്ട്രീയ, സാമൂഹ്യ, സാംസ്കാരിക പ്രവര്ത്തകര് സര്ക്കാര് നിലപാടിനെതിരെ രംഗത്തെത്തിയിരിക്കുകയാണ്.
കുറഞ്ഞ് എട്ട് വര്ഷമെങ്കിലും കഴിയാതെ അലനും താഹയ്ക്കും പുറത്തിറങ്ങാന് കഴിയില്ലെന്നാണ് നിയമവിദഗ്ധര് പറയുന്നത്. പഠിക്കാനും എക്സ്ട്രാ കരിക്കുലര് ആക്ടിവിറ്റീസിലും മിടുക്കരായ രണ്ട് ചെറുപ്പക്കാരെ കൊലയ്ക്ക് കൊടുത്തൂ എന്നാണ് അവരുമായി അടുപ്പമുണ്ടായിരുന്ന അധ്യാപകര് അടക്കം ആരോപിക്കുന്നത്. ഇരുവരെയും പാര്ട്ടിയില് നിന്ന് പുറത്താക്കിയിരുന്നെങ്കിലും പാര്ട്ടിയെ തള്ളിപ്പറയാന് അവര് തയ്യാറായില്ല. പ്രാദേശിക ഘടകങ്ങള് ഇവരെ എങ്ങനെയും യു.എ.പി.എയില് നിന്ന് ഒഴിവാക്കാന് ശ്രമിക്കുന്നുണ്ടായിരുന്നു. അലനും താഹയും മാവോയിസ്റ്റുകളാണെന്ന് മുഖ്യമന്ത്രി പിണറായി വിജയന് പരസ്യമായി പ്രതികരിച്ചതോടെ അവരും പ്രതിരോധത്തിലായി. 24 വയസ്സിന് താഴെയുള്ള രണ്ട് ചെറുപ്പക്കാര് വിചാരിച്ചാല് ഈനാട്ടില് എന്ത് മാവോയിസ്റ്റ് വിപ്ലവമാണ് നടക്കുന്നതെന്ന ആക്ഷേപം സി.പി.ഐ ചോദിക്കുന്നുണ്ട്.
സി.പി.എമ്മിന്റെ കേരളഘടകത്തിലെ ചിലരും കേന്ദ്രസര്ക്കാരിലെ ഉന്നത ഉദ്യോഗസ്ഥരും ഡി.ജി.പി ലോക്നാഥ് ബഹ്റയും അറിഞ്ഞുകൊണ്ടുള്ള കളിയാണ് സംസ്ഥാനത്തെ മാവോയിസ്റ്റ് വേട്ടയ്ക്കും വ്യാജഏറ്റുമുട്ടലിനും യു.എ.പി.എ അടക്കമുളള കേസുകള്ക്കും പിന്നിലെന്ന് വ്യാപകമായ ആക്ഷേപമുണ്ട്. സി.പി.എമ്മില് ബഹ്റഫാന്സ് അസോസിയേഷന് പ്രവര്ത്തിക്കുന്നുണ്ടെന്ന് പ്രമുഖമാധ്യമപ്രവര്ത്തകനായ ഷാജഹാന് അടുത്തിടെ പരിഹസിച്ചിരുന്നു. കേന്ദ്രസര്ക്കാരില് നിന്ന് ആഭ്യന്തരവകുപ്പിന് ഉള്പ്പെടെയുള്ള ഫണ്ടുകള് പെട്ടെന്ന് ലഭ്യമാക്കുന്നതിനാണ് ബഹ്റയെ ഡി.ജി.പിയായി വച്ചിരിക്കുന്നതെന്ന ആക്ഷേപം സി.പി.എമ്മിനുള്ളില് തന്നെ ശക്തമാണ്. സര്ക്കാരാകുമ്പോള് ഇത്തരം ചില വിട്ടുവീഴ്ചകള് ചെയ്തേ മുന്നോട്ട് പോകാനാകൂ അതുകൊണ്ട് പാര്ട്ടി ഈ വിഷയത്തില് കണ്ണടയ്ക്കുകയാണ്.
എന്നാല് സി.പി.ഐയ്ക്ക് ഇത് ഒട്ടും ദഹിച്ചിട്ടില്ല. അതുകൊണ്ടാണ് മാവോയിസ്റ്റുകളെ വ്യാജ ഏറ്റുമുട്ടലിലൂടെ കൊലപ്പെടുത്തിയതാണെന്ന് അവര് പരസ്യമായി പ്രഖ്യാപിച്ചത്. മഞ്ചിക്കണ്ടി ഏറ്റുമുട്ടല് നടന്ന സ്ഥലം സി.പി.ഐ നേതാക്കള് സന്ദര്ശിച്ച് മുഖ്യമന്ത്രി പിണറായി വിജയന് കൈമാറിയെങ്കിലും അതിപ്പോഴും സെക്രട്ടറിയേറ്റിലെ ഏതോ അലമാരയില് പൊടിപിടിച്ച് കിടക്കുകയാണ്. അതൊരിക്കലും വെളിച്ചം കാണില്ലെന്ന് സി.പി.ഐക്കാര്ക്ക് അറിയാം. എങ്കിലും തങ്ങളുടെ നിലപാടില് അവര് അടിയുറച്ച് നില്ക്കുകയാണ്. അതുകൊണ്ടാണ് കേന്ദ്രസര്ക്കാര് കൊണ്ടുവന്ന പൗരത്വ ഭേദഗതി നിയമം നടപ്പാക്കില്ലെന്ന് അസന്നിഗ്ധമായി പ്രഖ്യാപിച്ച മുഖ്യമന്ത്രി പിണറായി വിജയന് യു.എ.പി.എ എന്ന കരിനിയമം സംസ്ഥാനത്ത് നടപ്പാക്കില്ലെന്ന് ആര്ജ്ജവത്തോടെ പറയണമെന്ന് സി.പി.ഐ സംസ്ഥാന സെക്രട്ടറി കാനംരാജേന്ദ്രന് ആവശ്യപ്പെട്ടത്. തങ്ങളുടെ സൗകര്യംപോലെ കരിനിയമങ്ങളെ എതിര്ക്കുകയും നടപ്പാക്കുകയും ചെയ്തിട്ട് ഒന്നുമറിഞ്ഞില്ലേ... എന്ന മട്ടില് പ്രതികരിക്കുന്നവരെ പീലാത്തോസേ... എന്നല്ലാതെ എന്ത് വിളിക്കണം? നിങ്ങള് പറയൂ...
https://www.facebook.com/Malayalivartha
