പി.എസ്.സി. പരീക്ഷയുടെ മേല്നോട്ടം അധ്യാപകരുടെ ജോലിയുടെ ഭാഗമാക്കി സര്ക്കാര് ഉത്തരവ്... പി.എസ്.സി. പരീക്ഷകള് സുഗമമായും കാര്യക്ഷമമായും നടത്തുന്നതിനാണ് പുതിയ വ്യവസ്ഥകള് ഏര്പ്പെടുത്തിയത്
പി.എസ്.സി. പരീക്ഷാ മേല്നോട്ടം അധ്യാപകരുടെ ജോലിയുടെ ഭാഗമാക്കി സര്ക്കാര് ഉത്തരവായി. മേലില് പി.എസ്.സി. പരീക്ഷാകേന്ദ്രങ്ങളില് ഇന്വിജിലേറ്റര്മാരായി അധ്യാപകരെ മാത്രമേ നിയോഗിക്കാവൂ എന്നും ഉദ്യോഗസ്ഥഭരണപരിഷ്കാര വകുപ്പിന്റെ ഉത്തരവില് പറയുന്നു. പി.എസ്.സി. പരീക്ഷകള് സുഗമമായും കാര്യക്ഷമമായും നടത്തുന്നതിനാണ് പുതിയ വ്യവസ്ഥകള് ഏര്പ്പെടുത്തിയത്. പി.എസ്.സി. സെക്രട്ടറിയുടെ കത്തിന്റെ അടിസ്ഥാനത്തിലാണ് ഉത്തരവ്.
എഴുത്തുപരീക്ഷകളുടെ നടത്തിപ്പില് പി.എസ്.സി. നേരിടുന്ന പ്രശ്നങ്ങള് പരിഹരിക്കുന്നതിനായി സര്ക്കാരിന്റെ സഹകരണം തേടിയായിരുന്നു കമ്മിഷന് സെക്രട്ടറിയുടെ കത്ത്. പി.എസ്.സി. ആവശ്യപ്പെടുന്നപക്ഷം സര്ക്കാര്, എയ്ഡഡ് സ്കൂളുകളും കോളേജുകളും പരീക്ഷാകേന്ദ്രങ്ങളാക്കാന് സ്ഥാപനമേധാവികള് അനുമതി നല്കേണ്ടതാണെന്ന് സര്ക്കാര് ഉത്തരവില് പറയുന്നു.
ചീഫ് സൂപ്രണ്ട്, ഇന്വിജിലേറ്റര്മാര് ഉള്പ്പെടെയുള്ള ജീവനക്കാര് പരീക്ഷ തുടങ്ങുന്നതിന് രണ്ടു മണിക്കൂര്മുന്പുതന്നെ പരീക്ഷാകേന്ദ്രത്തില് എത്തിച്ചേരണം. പരീക്ഷയ്ക്കായി വിദ്യാഭ്യാസസ്ഥാപനങ്ങള് വിട്ടുനല്കുന്നതിന് ചില മേധാവികള് വിസമ്മതം പ്രകടിപ്പിക്കുന്നതായി പി.എസ്.സി. ചൂണ്ടിക്കാട്ടിയിരുന്നു. ഇതുമൂലം സമയബന്ധിതമായി പൂര്ത്തിയാക്കേണ്ട പരീക്ഷാനടപടികളുടെ നടത്തിപ്പിന് വളരെയധികം പ്രയാസം നേരിടേണ്ടിവരുന്നു. പരീക്ഷാകേന്ദ്രങ്ങളിലെ ചീഫ് സൂപ്രണ്ട് ഉള്പ്പെടെയുള്ള ഉദ്യോഗസ്ഥര് പരീക്ഷ തുടങ്ങുന്നതിന് ചുരുങ്ങിയ സമയംമുന്പുമാത്രമാണ് എത്തിച്ചേരാറുള്ളത്. അതുകൊണ്ട് അവര്ക്ക് മതിയായ നിര്ദേശങ്ങള് നല്കാന് പി.എസ്.സി.യില്നിന്നു പോകുന്ന ഉദ്യോഗസ്ഥര്ക്ക് കഴിയാറില്ലെന്നും കമ്മിഷന് അറിയിച്ചിട്ടുണ്ട്. പൊതുവിദ്യാഭ്യാസ വകുപ്പം ഉന്നതവിദ്യാഭ്യാസ വകുപ്പും തുടര്നടപടികള് സ്വീകരിക്കണമെന്ന് സര്ക്കാര് ഉത്തരവില് പറയുന്നു.ഇതിനെതിരേ അധ്യാപകസംഘടനകള് എതിര്പ്പുയര്ത്തിയിട്ടുണ്ട്. വിദ്യാഭ്യാസ അവകാശനിയമത്തിനു വിരുദ്ധമാണിതെന്ന് അവര് പ്രതികരിച്ചു. സംഘടനകളോട് ആലോചിക്കാതെയുള്ള തീരുമാനമാണിതെന്നും ചൂണ്ടിക്കാട്ടുന്നു.
https://www.facebook.com/Malayalivartha
