അങ്കം മുറുകുന്നു... ഗവര്ണറും സര്ക്കാരും തമ്മിലുള്ള തര്ക്കം കനക്കുന്നതിനിടെ പാര്ട്ടി പത്രത്തിന് പിന്നാലെ പാര്ട്ടി സംസ്ഥാന സെക്രട്ടറി കോടിയേരി ബാലകൃഷ്ണനും; തെരഞ്ഞെടുക്കപ്പെട്ട സര്ക്കാരിനെ അവഹേളിക്കാനുള്ള അധികാരസ്ഥാനമല്ല ഗവര്ണര് സ്ഥാനമെന്ന് കോടിയേരി
കേരളത്തില് ഗവര്ണര് ആരിഫ് മുഹമ്മദ് ഖാനും സംസ്ഥാന സര്ക്കാരും തമ്മിലുള്ള തര്ക്കം മുറുകുകയാണ്. കഴിഞ്ഞ ദിവസം ദേശാഭിമാനി ഗവര്ണര്ക്കെതിരെ എഡിറ്റോറിയല് എഴുതിയിരുന്നു. അതിന് പിന്നാലെ ഇന്ന് സംസ്ഥാന സെക്രട്ടറി കോടിയേരി ബാലകൃഷ്ണനും രംഗത്തെത്തി. സംസ്ഥാന സര്ക്കാരിന്റെ നിലപാടുകള്ക്കും നടപടികള്ക്കുമെതിരെ പരസ്യമായി രംഗത്തെത്തിയ ഗവര്ണര് ആരിഫ് മുഹമ്മദ് ഖാനെതിരെ സിപിഎം സംസ്ഥാന സെക്രട്ടറി കോടിയേരി ബാലകൃഷണന്. തെരഞ്ഞെടുക്കപ്പെട്ട സര്ക്കാരിനെ അവഹേളിക്കാനുള്ള അധികാരസ്ഥാനമല്ല ഗവര്ണ്ണര് സ്ഥാനം.
ഇപ്പോഴത്തെ ഗവര്ണര് ഇത് മറക്കുന്നു. കേന്ദ്ര സര്ക്കാരിന്റെ പ്രീതിക്കുവേണ്ടിയാണ് ഗവര്ണറുടെ അനുചിത ഇടപെടലെന്നും കോടിയേരി. ദേശാഭിമാനിയിലെ ലേഖനത്തിലാണ്
ഗവര്ണര്ക്കെതിരെ വിമര്ശനമുന്നയിച്ചത്.
പൗരത്വനിയമഭേദഗതി നടപ്പിലാക്കരുതെന്നാവശ്യപ്പെട്ട് സുപ്രീം കോടതിയില് സ്യൂട്ട് ഹര്ജി നല്കിയ സംസ്ഥാന സര്ക്കാരിന്റെ നടപടികളെയടക്കം വിമര്ശിച്ച് ഗവര്ണര് നേരത്തെ പരസ്യമായി രംഗത്തെത്തിയിരുന്നു.
പൗരത്വ നിയമത്തിനെതിരെ കേരള നിയമസഭ പാസാക്കിയ പ്രമേയത്തെ എതിര്ത്ത ഗവര്ണര്ക്കെതിരെ രൂക്ഷ വിമര്ശനവുമായി സിപിഎം നേരത്തെ തന്നെ രംഗത്തെത്തിയിരുന്നു. പ്രമേയം നിയമ വിരുദ്ധമെന്ന ഗവര്ണറുടെ പരസ്യ വിമര്ശനമാണ് സിപിഎമ്മിനെ പ്രകോപിച്ചത്.
ഗവര്ണര് ബിജെപി സംസ്ഥാന അധ്യക്ഷന് കളിക്കുകയാണെന്നാണ് സിപിഎമ്മിന്റെ വിമര്ശനം. ഗവര്ണര് സകല പരിധികളും ലംഘിച്ചു. ഗവര്ണറുടെ രാഷ്ട്രീയക്കളി കേരളത്തില് ചെലവാകില്ലെന്നും കോടിയേരി ബാലകൃഷ്ണന് പുറത്തിറക്കിയ പ്രസ്താവനയില് വ്യക്തമാക്കി.
ഭരണഘടനയുടെ അന്തഃസത്തയ്ക്ക് നിരക്കാത്ത ജല്പ്പനങ്ങളാണ് സംസ്ഥാന ഗവര്ണര് നടത്തിക്കൊണ്ടിരിക്കുന്നത്. ഏത് നിയമത്തിന്റെ ലംഘനമാണ് നിയമസഭ നടത്തിയതെന്ന് ചൂണ്ടിക്കാണിക്കണം. ഏത് നിയമത്തിന്റെ പിന്ബലത്തിലാണ് അദ്ദേഹം നിയമസഭാ നടപടിയെ വിമര്ശിക്കുന്നതെന്നും വ്യക്തമാക്കണം. ഭരണഘടനയും നിയമസംഹിതകളും സുപ്രീംകോടതി വിധികളുമൊന്നും മനസ്സിലാക്കാതെയുള്ള ഗവര്ണ്ണറുടെ 'സംസ്ഥാന ബിജെപി അദ്ധ്യക്ഷന്' കളി സകല സീമകളും അതിലംഘിച്ചിരിക്കുകയാണെന്നും കോടിയേരി പ്രസ്താവനയില് പറഞ്ഞു.
അതേ സമയം പാര്ട്ടി ഇങ്ങനെ ഗവര്ണര്ക്കെതിരെ ആഞ്ഞടിക്കുമ്പോള് വളരെ പക്വതയോടെയാണ് സര്ക്കാര് പ്രതികരിക്കുന്നത്. ഗവര്ണറുമായി ഏറ്റുമുട്ടലിനില്ലെന്നാണ് മന്ത്രി എകെ ബാലന് പറയുന്നത്. പൗരത്വ ഭേദഗതി നിയമത്തില് കേന്ദ്ര സര്ക്കാരിനെതിരെ സുപ്രീം കോടതിയെ സമീപിക്കാന് ഗവര്ണറുടെ അനുമതി ആവശ്യമില്ല. ഗവര്ണറെ അറിയിക്കണമെന്ന് ഭരണഘടനയിലോ നിയമസഭാ ചട്ടങ്ങളിലോ പറഞ്ഞിട്ടില്ല. ഗവര്ണര് വിശദീകരണം തേടിയാല് മറുപടി നല്കുമെന്നും മന്ത്രി വ്യക്തമാക്കി.
സര്ക്കാര് പ്രവര്ത്തിച്ചത് ഭരണഘടന അനുസരിച്ചാണ്. കേന്ദ്രവുമായി സംസ്ഥാന സര്ക്കാര് ഏറ്റുമുട്ടുന്ന സാഹചര്യം വന്നാല് ഗവര്ണറെ അറിയിക്കണമെന്നാണ് ചട്ടങ്ങളിലുള്ളത്. അല്ലാതെ അനുവാദം വേണമെന്നില്ല. ഇവിടെ അങ്ങനൊരു ഏറ്റുമുട്ടലില്ല. കേന്ദ്ര സര്ക്കാരുമായോ ഗവര്ണറുമായി സര്ക്കാര് ഏറ്റുമുട്ടലിനില്ലെന്നും മന്ത്രി ബാലന് പറഞ്ഞു.
കേന്ദ്രനിയമം ഭരണഘടനാ വിരുദ്ധമാണെന്ന് ചൂണ്ടിക്കാട്ടി ഭരണഘടനയുടെ 131-ാം അനുച്ഛേദം അനുസരിച്ചാണ് സുപ്രീംകോടതിയില് സ്യൂട്ട് ഫയല് ചെയ്തത്. ഗവര്ണറുടെ അധികാരത്തെ ചോദ്യം ചെയ്യുന്ന നടപടി സര്ക്കാരിന്റെ ഭാഗത്തുനിന്ന് ഉണ്ടായിട്ടില്ല. നിയമവിദഗ്ധരുമായി ആലോചിച്ച് ഗവര്ണര്ക്ക് മറുപടി നല്കും. സര്ക്കാര് നടപടി തെറ്റാണെങ്കില് അതു തള്ളിക്കളയാന് കോടതിക്ക് അധികാരമുണ്ട്. ഗവര്ണറുടെ ആശങ്കകള് പരിഹരിക്കുമെന്നും മന്ത്രി പറഞ്ഞു. അതേ സമയം ഗവര്ണറുടെ അടുത്ത നീക്കത്തിനായി കാത്തിരിക്കുകയാണ് കേരളം.
L
https://www.facebook.com/Malayalivartha
