കരിപ്പൂർ വിമാനത്താവളത്തിൽ നിന്നും വണ്ടിയിൽ പോയിക്കൊണ്ടിരുന്ന വ്യക്തിയെ തട്ടിക്കൊണ്ട് പോയി സ്വർണ്ണം കവർന്നതിന്റെ നടുക്കം മാറുന്നതിന് മുന്നേ അടുത്ത കിഡ്നാപ്പിംഗ് പുറത്ത് വരികയാണ്. കരിപ്പൂർ വിമാനത്താവളത്തിൽ ഇറങ്ങിയ രണ്ട് യാത്രക്കാരെ തട്ടിക്കൊണ്ടുപോയി പണവും സ്വർണവും കൊള്ളയടിച്ചു. കാസർകോട് സ്വദേശികളാണ് കൊള്ളയടിക്ക് വിധേയരായത് . ഇവരെ മർദ്ദിച്ചവശരാക്കി സ്വർണം കവരുകയായിരുന്നു. അക്രമികള്‍ യാത്രക്കാരുടെ വസ്ത്രങ്ങൾ അഴിച്ച് ദേഹപരിശോധനയും നടത്തുകയുണ്ടായി .

കരിപ്പൂരിൽ ഒരു മാസത്തിനിടെ പൊലീസിന് മുന്നിലെത്തുന്ന മൂന്നാമത്തെകേസാണിത് . നേരത്തെ രജിസ്റ്റർ ചെയ്ത കേസിൽ ഒരാളെ ഇന്നലെ പിടികൂടിയിരുന്നു. തട്ടിക്കൊണ്ടുപോകൽ കള്ളക്കടത്ത് സ്വർണം കൊള്ളയടിക്കാനെന്നാണ് പൊലീസ് പറയുന്നത്. ഏറ്റവും ഒടുവില്‍ കാസർകോട് സ്വദേശികളില്‍ നിന്ന് തട്ടിയെടുത്ത സ്വര്‍ണം കള്ളക്കടത്ത് സ്വർണമാണോ എന്ന് സ്ഥിരീകരിക്കാന്‍ പൊലീസിന് ഇതുവരെ കഴിഞ്ഞിട്ടില്ല എന്നതും ശ്രദ്ധേയം. അതിനാല്‍ സംഭവത്തില്‍ എന്ത് വകുപ്പ് ചുമത്തി കേസെടുക്കുമെന്നത് സംബന്ധിച്ചുള്ള ആശയക്കുഴപ്പം തുടരുകയാണെന്ന് പൊലീസ് പറഞ്ഞു .