മുഖ്യമന്ത്രിയുടെ ഉപദേശകൻ രമൺ ശ്രീവാസ്തവയും ചീഫ് സെക്രട്ടറി ടോം ജോസും സംസ്ഥാന പോലീസ് മേധാവി ലോകനാഥ് ബഹ്റയും ചേർന്നാണ് സെക്രട്ടേറിയറ്റ് നോർത്ത് ബ്ലോക്ക് ഭരിക്കുന്നതെന്നും ഇവർ മുഖ്യമന്ത്രിയെ നോക്കുകുത്തിയാക്കുകയാണെന്നും സി പി എമ്മിൽ ആക്ഷേപം. സി എ ജി റിപ്പോർട്ട് പുറത്തുവന്നതോടെയാണ് അക്ഷേപം ശക്തമായത്. സംഭവത്തിൽ പരസ്യ പ്രതികരണം നടത്തേണ്ടതില്ലെന്ന് സി പി എം തീരുമാനിച്ചപ്പോൾ ചീഫ് സെക്രട്ടറി സി എ ജിക്കെതിരെ തുറന്നടിച്ചു.പൊതു ജനങ്ങളുടെ എതിർപ്പ് ഉയരുമെന്ന് കരുതിയാണ് സർക്കാർ സി എ ജിക്കെതിരെ നിശബ്ദത പാലിച്ചത്.അപ്പോഴാണ് മാധ്യമങ്ങളെ വരെ പിണക്കി കൊണ്ട് ചീഫ്സെക്രട്ടറി തുറന്നടിച്ചത്.

ശ്രീവാസ്തവയാണ് ഇതിന് പിന്നിലെന്ന് സിപിഎം കരുതുന്നു. ബഹറക്കും ടോം ജോസിനും തെറ്റായ ഉപദേശം നൽകുന്നത് ശ്രീവാസ്തവയാണെന്നാണ് സി പി എം നേതാക്കൾക്കുള്ള പരിഭവം. മുഖ്യമന്ത്രിയുടെ തലയ്ക്ക് മുകളിലൂടെ മൂന്ന് ഉദ്യോഗസ്ഥരും പറക്കുകയാണെന്നും ആക്ഷേപം ഉയർന്നിട്ടുണ്ട്.

കോഴിക്കോട്ടെ സി പി എം പ്രവർത്തകരായ വിദ്യാർത്ഥികളെ കസ്റ്റഡിയിലെടുത്ത് നഗര മാവോയിസ്റ്റുകൾ എന്നു മുദ്ര കുത്തിയത് ബഹ്റയും ശ്രീവാസ്തവയും ടോം ജോസും ചേർന്നാണെന്ന് സിപിഎം കരുതുന്നു. ചീഫ് സെക്രട്ടറി റാങ്കിലുള്ള ഉദ്യോഗസ്ഥനാണ് മുഖ്യമന്ത്രിയുടെ ഉപദേശകൻ രമൺ ശ്രീവാസ്തവ. അദ്ദേഹത്തിനാണത്രേ മാവോയിസ്റ്റ് വിഷയത്തിൽ അമിത ഉത്കണ്ഠ.

ഇതിനിടയിൽ മാവോയിസ്റ്റുകൾ തീവ്രവാദികളാണെന്ന പേരിൽ ടോം ജോസ് എഴുതിയ ലേഖനവും വിവാദമായി. ഇത്തരം പരാമർശങ്ങൾ നടത്താൻ ചീഫ് സെക്രട്ടറിക്ക് ആരാണ് അധികാരം നൽകിയതെന്നു വരെ സി പി ഐ ചോദിച്ചു. എന്നാൽ സർക്കാർ നിലപാടാണ് താൻ ലേഖനമായി എഴുതിയതെന്നാണ് ചീഫ് സെക്രട്ടറിയുമായി ബന്ധപ്പെട്ടവർ പറഞ്ഞത് .

അന്നേ തുടങ്ങിയ കലിപ്പാണ് സി എ ജി റിപ്പോർട്ടോടെ പൊട്ടിത്തെറിച്ചത്. പൗരത്വ വിഷയത്തിൽ തിളങ്ങി നിന്ന മുഖ്യമന്ത്രിയെ ഇവർ മോശക്കാരാക്കി.മുഖ്യമന്ത്രി അഴിമതിക്ക് കൂട്ടു നിൽക്കുന്നു എന്ന പ്രതീതി ജനിപ്പിച്ചു.

കേരളത്തിൽ നടക്കുന്നത് ഉദ്യോഗസ്ഥ ഭരണമാണെന്ന് നേതാക്കൾ ആരോപിക്കുന്നു. കെ. കരുണാകരന്റെ വിശ്വസ്തനായിരുന്ന രമൺ ശ്രീവാസ്തവക്ക് സിപി എമ്മിനെതിരെ വ്യക്തമായ നിലപാടുണ്ട്. അദ്ദേഹത്തെ ഉപദേശകനാക്കിയത് തന്നെ തെറ്റാണെന്ന് പാർട്ടി കരുതുന്നു. മുഖ്യമന്ത്രി ഇവരെ തള്ളി പറഞ്ഞിട്ടില്ല.. ഐ.ജി മാരിൽ പലരും റിപ്പോർട്ട് ചെയ്യുന്നത് മുഖ്യമന്ത്രിക്കല്ല ശ്രീവാസ്തവക്കാണ്. ഉപദേശകന് നൽകിയ അമിത സ്വാതന്ത്ര്യം ഭരണകൂട ഭീകരതയായി വളരുന്നതായി ഭരണപക്ഷം ആരോപിക്കുന്നു. ഇപ്പോഴത്തെ വിവാദങ്ങൾക്ക് പിന്നില്ല ഉപദേശകൻ തന്നെയാണെന്ന് സി പി എം കരുതുന്നു.

ശ്രീവാസ്തവയാണ് പോലീസിൽ സ്ഥലംമാറ്റങ്ങൾ നടത്തുന്നത്. ഉദ്യോഗസ്ഥർക്കെല്ലാം അദ്ദേഹത്തെ ഭയമാണ്. ഇന്റലിജൻസ് മേധാവിയെയും ആഭ്യന്തര സെക്രട്ടറിയെയും സർക്കാർ നോക്കുകുത്തിയാക്കിയെന്നും സിപി എം ആരോപിക്കുന്നു.