പനച്ചിക്കാട് ചോഴിയക്കാട് പാടത്ത് കൃഷിയിറക്കുന്നതിനുള്ള പണികള്‍ അവസാനഘട്ടത്തിലേക്ക് നീങ്ങിയപ്പോള്‍ നാട്ടുകാരെ കണ്ണീരിലാഴ്ത്തി രണ്ട് പേരുടെ മരണം. ട്രാക്ടറിനടിയില്‍ ചെളിയില്‍ പുതഞ്ഞ് ട്രാക്ടര്‍ തൊഴിലാളികളായ അയ്മനം പുലിക്കുട്ടിശേരി മുട്ടേല്‍ ലക്ഷം വീട് കോളനിയില്‍ പുത്തന്‍കരിയില്‍ ശശി (മോനി-56), നീലിമംഗലം ചാരംകുളങ്ങര വീട്ടില്‍ ഷിനു (മണിക്കുട്ടന്‍-38) എന്നിവരാണ് മരിച്ചത്. ശനിയാഴ്ച പമ്പിങ് ആരംഭിക്കാനിരിക്കുന്ന പാടത്ത് വെള്ളിയാഴ്ച നാല് ട്രാക്ടറുകളാണ് പ്രവര്‍ത്തിച്ചിരുന്നതെന്ന് കൃഷിക്ക് നേതൃത്വം നല്‍കിയ റോജേഷ് തോമസ് പറയുന്നു. ''വൈകീട്ട് ആറ് മണിയോടെ പണിക്കാര്‍ ജോലി കഴിഞ്ഞ് പോകാനിരുന്നപ്പോഴാണ് അപകടമുണ്ടായത്.
ഉള്‍പ്രദേശമായതിനാല്‍ മറ്റാര്‍ക്കും അത്ര പെട്ടെന്ന് വരാന്‍ പറ്റുമായിരുന്നില്ല. അതിനാല്‍ മറ്റ് ട്രാക്ടറുകളാണ് രക്ഷാപ്രവര്‍ത്തനം നടത്തിയത്.

വെള്ളവും ചെളിയുമായിരുന്നതിനാല്‍ അത്ര പെട്ടെന്ന് അവര്‍ക്കും ട്രാക്ടര്‍ ഉയര്‍ത്താന്‍ കഴിഞ്ഞില്ല'' റോജേഷ് പറഞ്ഞു. ഒരു വര്‍ഷം മുന്പാണ് ഈ ഭാഗത്ത് തരിശായി കിടക്കുന്ന 50 ഏക്കര്‍ സ്ഥലത്ത് കൃഷി ചെയ്യാനായി മൂവാറ്റുപുഴ സ്വദേശിയായ റോജേഷ് എത്തിയത്. ഇതിനായി സ്ഥല ഉടമകളെ കണ്ട് സമ്മതം വാങ്ങി. പാടം ഉഴുതുമറിച്ച് കഴിഞ്ഞ് കുറച്ച് ദിവസങ്ങള്‍ക്ക് മുന്പ് വെള്ളം പന്പ് ചെയ്യാനിരുന്നതാണ്. എങ്കിലും ചിലര്‍ തടസ്സമുന്നയിച്ചു. വെള്ളിയാഴ്ച പനച്ചിക്കാട് പഞ്ചായത്ത് അംഗത്തിന്റെ നേതൃത്വത്തില്‍ ചര്‍ച്ച ചെയ്ത് ശനിയാഴ്ച പന്പിങ് ആരംഭിക്കാനിരിക്കുകയായിരുന്നു.

ഇക്കാര്യത്തില്‍ ജില്ലാ കളക്ടര്‍, പോലീസ് മേധാവി എന്നിവരുടെ സഹായവും ഉറപ്പാക്കിയിരുന്നു. ആദ്യമായാണ് ഇവിടെ പാടശേഖരസമിതിക്കാര്‍ കൃഷിയിറക്കാന്‍ തയാറെടുപ്പുകള്‍ നടത്തിയത്. 35 വര്‍ഷത്തിന് ശേഷം തരിശായി കിടന്ന പാടത്ത് കൃഷിയിറക്കുന്ന സന്തോഷത്തിലായിരുന്നു നാട്ടുകാരും.