പഴയ രത്നങ്ങളും ആഭരണങ്ങളും ധരിച്ചു കഴിഞ്ഞാല്‍ കുടുംബത്തില്‍ ദുരന്തങ്ങള്‍ ഉണ്ടാകും; പഴയകാല ജീവിതത്തിലെ സംഭവങ്ങള്‍ പ്രവചിച്ച് വിശ്വാസം നേടിയെടുത്തത് കുരുക്കിൽ വീഴ്ത്തും: അനുഗ്രഹം തേടി വരുന്നവരുടെ ബാഗിനുള്ളിൽ പണം എത്ര ഉണ്ടെന്ന് കൃത്യമായി പറഞ്ഞ് തനിക്ക് സിദ്ധി ഉണ്ടെന്ന് വിശ്വസിപ്പിച്ച് ആഭരണങ്ങള്‍ ഊരിവാങ്ങും: വനിതാ സെന്റര്‍ ഡോക്ടറെയും സഹോദരിയേയും പറ്റിച്ച്‌ വജ്രാഭരണങ്ങള്‍ തട്ടിയെടുത്ത വ്യാജ ജോത്സ്യന്റെ തട്ടിപ്പ് കഥകൾ ഇങ്ങനെ...
വനിതാ സെന്റര്‍ ഡോക്ടറെയും സഹോദരിയേയും പറ്റിച്ച്‌ വജ്രാഭരണങ്ങള്‍ തട്ടിയെടുത്ത വ്യാജ ജോത്സ്യന്‍ പിടിയിൽ. പട്ടാള ഉദ്യോഗസ്ഥനെന്ന് സ്വയം പരിചയപ്പെടുത്തി ജോലി തട്ടിപ്പ് നടത്തിയ മണ്ണന്തല മുക്കോല സൗപര്‍ണിക അപ്പാര്‍ട്ട്മെന്റില്‍ താമസിക്കുന്ന അജിത്ത്‌കുമാറാണ് മണ്ണന്തല പൊലീസിന്റെ വലയിലായത്. മാസങ്ങള്‍ക്ക് മുമ്പ് പേരൂര്‍ക്കട വഴയിലയ്ക്ക് സമീപം വില്ല വാടകയ്ക്ക് എടുത്ത് തട്ടിപ്പ് നടത്തിയിരുന്നതായി പൊലീസിന് വിവരം ലഭിച്ചിട്ടുണ്ട്. വീട്ടില്‍ കാണാനെത്തുന്നവരുടെ പഴയകാല ജീവിതത്തിലെ ചില സംഭവങ്ങള്‍ പ്രവചിക്കുക എന്നതാണ് തട്ടിപ്പിന്റെ ആദ്യ ഘട്ടം.
വന്നവരുടെ ബാഗില്‍ പണം എത്ര ഉണ്ടെന്നും ഇയാള്‍ പറയും. തനിക്ക് സിദ്ധി ഉണ്ടെന്നു പറഞ്ഞശേഷം പഴയ രത്നങ്ങളും ആഭരണങ്ങളും ധരിച്ചു കഴിഞ്ഞാല്‍ കുടുംബത്തില്‍ ദുരന്തങ്ങള്‍ ഉണ്ടാകുമെന്നു പറഞ്ഞ് വിശ്വസിപ്പിക്കും. എന്നിട്ട് ഈ ആഭരണങ്ങള്‍ ഊരിവാങ്ങും. പ്രത്യേക മോഡലിലുള്ള പുതിയ കല്ലുകള്‍ വാങ്ങി തരാമെന്ന് പറഞ്ഞാണ് ഇയാള്‍ ആഭരണങ്ങള്‍ കൈക്കലാക്കുന്നത്. പിന്നീട് ഇത് തിരിച്ചു നല്‍കില്ല. പുതിയ ആഭരണങ്ങളുടെ പൂജ നടക്കുകയാണ് എന്നാണ് ഇയാള്‍ ആഭരണങ്ങള്‍ തിരിച്ചു ചോദിക്കുന്നവരോട് പറഞ്ഞിരുന്നതെന്നും പൊലീസ് പറയുന്നു.
ചോദ്യം ചെയ്യലില്‍ പത്തോളം പേരില്‍ നിന്ന് 30 ലക്ഷം തട്ടിയെടുത്തതായി പൊലീസിനോട് സമ്മതിച്ചു. സ്ഥിരം ഭക്ഷണം കഴിക്കാന്‍ എത്തുന്ന ഇന്ത്യന്‍ കോഫീ ഹൗസിലെ ജീവനക്കാരോട് ആര്‍മിയില്‍ നിന്നും വിരമിച്ചയാളെന്നു പറഞ്ഞാണ് ഇയാള്‍ പരിചയപ്പെടുന്നത്. നബാര്‍ഡ്, കേന്ദ്രിയ വിദ്യാലയം, സി-ഡിറ്റ് , കെല്‍ട്രോണ്‍, ദേവസ്വം ബോര്‍ഡ്, എന്നിവിടങ്ങളില്‍ ജോലി വാങ്ങി നല്‍കാമെന്ന് പറഞ്ഞു ഇവരില്‍ നിന്നും ലക്ഷങ്ങള്‍ ഇയാള്‍ തട്ടിയെടുത്താതെയാണ് വിവരം.
https://www.facebook.com/Malayalivartha
