പൗരത്വ നിയമ ഭേദഗതിയ്‌ക്കെതിരെ ചില സിനിമാതാരങ്ങള്‍ രംഗത്ത് വന്നപ്പഴേ സന്ദീപ് വാര്യര്‍ പറഞ്ഞതാണ് സ്വന്തം ഭാഗം നന്നാക്കിയിട്ടു വേണം ഇതിനൊക്കെ ഇറങ്ങാനെന്ന്. എന്നാല്‍ സന്ദീപ് പറഞ്ഞതു പോലെ പ്രതിഷേധത്തിനിറങ്ങിയ റീമ കല്ലിംഗലും ആഷിക്ക് അബുവും വല്ലാത്ത പ്രതിസന്ധിയിലായിരിക്കുകയാണ്. ഇന്നലെ കരുണ സംഗീത നിശയിലെ കണക്കുകള്‍ ആഷിക് അബുവും സംഘവും പുറത്ത് വിട്ടിട്ടും രക്ഷയില്ല. കണക്കിലെ കള്ളക്കളികള്‍ പൊളിച്ചടുക്കി ബിജെപി സമരത്തിലേക്ക് നീങ്ങുകയാണ്.
ഇന്ന് ആഷിക് അബുവിന്റെ വീട്ടിലേക്ക് ബിജെപി പ്രതിഷേധ മാര്‍ച്ച് സംഘടിപ്പിച്ചിരിക്കുകയാണ്. അന്വേഷണത്തിനോടൊപ്പം തെരുവിലും ഈ വിഷയം കൊണ്ടുവരാനാണ് ബിജെപി ശ്രമിക്കുന്നത്.

അതേസമയം ഇത്തരം തട്ടിപ്പിനെ പൗരത്വവുമായി കൂട്ടിക്കുഴയ്ക്കാനുള്ള ശ്രമത്തെ സോഷ്യല്‍ മീഡിയ തള്ളിക്കളയുകയാണ്. ആഷിക് അബു മുഖ്യമന്ത്രിക്കയച്ച കത്തിലാണ് പൗരത്വം കൂട്ടിക്കുഴച്ചത്. ഫൗണ്ടേഷന്‍ അംഗങ്ങള്‍ പൗരത്വ നിയമത്തിനെതിരെ നടക്കുന്ന സമരങ്ങളില്‍ പങ്കെടുക്കാന്‍ തുടങ്ങിയത് മുതല്‍ ചില കേന്ദ്രങ്ങളില്‍ നിന്ന് ഫൗണ്ടേഷന്‍ അംഗങ്ങളെ വ്യക്തിപരമായി ആക്രമിക്കുന്ന നടപടികള്‍ ആരംഭിച്ചു. പിന്നീട് അതൊരു വലിയ ആക്രമണമായി മാറുകയും ചെയ്തുവെന്നാണ് ആഷിക്കിന്റെ ആരോപണം. എന്നാല്‍ ഇതിനെതിരെ വ്യാപക പ്രതിഷേധമാണ് ഉണ്ടായത്.

അതേസമയം കരുണ സംഗീത പരിപാടിയുടെ പേരില്‍ സംഘാടകര്‍ സാമ്പത്തിക തട്ടിപ്പ് നടത്തിയെന്ന പരാതിയില്‍ പ്രാഥമിക അന്വേഷണം നടക്കുകയാണ്. കൊച്ചി സിറ്റി പൊലീസ് കമ്മിഷണര്‍ വിജയ് സാഖറെയാണ് അന്വേഷണത്തിന് ഉത്തരവിട്ടത്. ജില്ലാ ക്രൈം ബ്രാഞ്ച് അസിസ്റ്റന്റ് കമ്മിഷണര്‍ ബിജി ജോര്‍ജ്ജിനാണ് അന്വേഷണ ചുമതല.

യുവമോര്‍ച്ച നേതാവ് സന്ദീപ് വാര്യര്‍ നല്‍കിയ പരാതിയിലാണ് അന്വേഷണം. പ്രാഥമിക അന്വേഷണം മാത്രമാണ് ഇപ്പോള്‍ നടത്തുന്നത്. സാമ്പത്തിക തട്ടിപ്പിന് തെളിവ് ലഭിച്ചാല്‍ മാത്രമേ കേസ് രജിസ്റ്റര്‍ ചെയ്യൂ. കരുണ സംഗീത പരിപാടിയുടെ പേരില്‍ മുഖ്യമന്ത്രിയുടെ ഉള്‍പ്പെടെ പേര് ദുരുപയോഗം ചെയ്ത് വന്‍ സാമ്പത്തിക തട്ടിപ്പ് സംബന്ധിച്ച് അന്വേഷണം വേണമെന്നാവശ്യപ്പെട്ടാണ് യുവമോര്‍ച്ച സംസ്ഥാന സെക്രട്ടറി എറണാകുളം ജില്ല കളക്ടര്‍ക്ക് പരാതി നല്‍കിയത്. ഈ പരാതി കളക്ടര്‍ എസ് സുഹാസ്, സിറ്റി പൊലീസ് കമ്മിഷണര്‍ വിജയ് സാഖറെയ്ക്ക് കൈമാറുകയായിരുന്നു.

സംഭവം കൂടുതല്‍ വിവാദങ്ങളിലേക്ക് എത്തിയതോടെയാണ് പരാതിയില്‍ അന്വേഷണം നടത്താന്‍ ജില്ല കളക്ടര്‍ എസ് സുഹാസ് നിര്‍ദ്ദേശിച്ചത്. പരിപാടിയുടെ രക്ഷാധികാരി എന്ന നിലയില്‍ കളക്ടറുടെ പേര് ഉപയോഗിച്ചതിന് എതിരെ സുഹാസ് ബിജിപാലിന് നോട്ടീസ് നല്‍കിയിരുന്നു. സ്‌റ്റേഡിയം സൗജന്യമായി അനുവദിച്ചത് റീജിയണല്‍ സ്‌പോര്‍ട്‌സ് സെന്റര്‍ ഭാരവാഹികളാണെന്നും താന്‍ ഇടപെട്ടിട്ടില്ലെന്നുമാണ് കളക്ടറുടെ നിലപാട്.

അതോടെയാണ് വിശദീകരണവുമായി കൊച്ചി മ്യൂസിക് ഫൗണ്ടേഷന്‍ ഭാരവാഹികള്‍ ഇന്നലെ രംഗത്തെത്തിയത്. ഒഫീഷ്യല്‍ ഫേസ്!ബുക്ക് പേജിലൂടെ കെഎംഎഫ് പ്രസിഡന്റ് ബിജിബാലും, ജനറല്‍ സെക്രട്ടറി ഷഹബാദ് അമനും, മറ്റ് ഭാരവാഹികളായ ആഷിഖ് അബു, സിതാര കൃഷ്ണകുമാര്‍, ശ്യാം പുഷ്‌കരന്‍, റിമ കല്ലിങ്കല്‍, കെ എം കമല്‍, മധു സി നാരായണന്‍ എന്നിവരാണ് വിശദീകരണവുമായി രംഗത്തെത്തിയത്.

ടിക്കറ്റ് വരുമാനമടക്കം സ്വന്തം അക്കൗണ്ടിലേക്ക് അല്ല വരുന്നതെന്നും, ഇപ്പോള്‍ മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കിയ തുക, ഭാരവാഹികള്‍ ചേര്‍ന്ന് സ്വന്തം കയ്യില്‍ നിന്ന് ഇട്ട് കൊടുത്തതാണെന്നും കെഎംഎഫ് പ്രസിഡന്റ് ബിജിബാല്‍ വ്യക്തമാക്കി.

കലാപരമായി ഈ പരിപാടി വന്‍ വിജയമായിരുന്നെങ്കിലും സാമ്പത്തികമായി പരിപാടി പരാജയപ്പെട്ടുവെന്ന് തുറന്ന് സമ്മതിക്കുന്നതായി പറയുന്ന പ്രസിഡന്റ് ബിജിബാല്‍, ആകെ പരിപാടിക്കായി 23 ലക്ഷം രൂപ ചെലവായി എന്ന് വ്യക്തമാക്കുന്നു. എന്നാല്‍ ഇതെല്ലാം കണക്കിലെ കള്ളകളികളെന്നാണ് ബിജെപി നേതാക്കളുടെ ആരോപണം. അതിനാലാണ് അവര്‍ ആഷിക്കിന്റെ വീട്ടിലേക്ക് മാര്‍ച്ച് നടത്തുന്നതും.