തെറ്റുചെയ്തതിലല്ല തെറ്റ് കണ്ടുപിടിക്കപ്പെട്ടതിലെ വിഷമമാണ് പലപ്പോഴും ചോദ്യം ചെയ്യുമ്പോള്‍ ശരണ്യ പ്രകടിപ്പിച്ചത്. കുട്ടിയെ കടലിലെറിഞ്ഞകാര്യം പറയുമ്പോഴൊന്നും അവളില്‍ വലിയ സങ്കടമൊന്നും കണ്ടില്ലെന്ന് പോലീസ് പറയുന്നു. ഭര്‍ത്താവിനെ പ്രതിയാക്കാനുള്ള ലക്ഷ്യം മൊഴിയില്‍ വ്യക്തമായിരുന്നു. പക്ഷേ, മാറ്റിമാറ്റിപ്പറഞ്ഞ കാര്യങ്ങള്‍ ശരണ്യയെത്തന്നെ കുടുക്കിലാക്കി.

കടലില്‍പ്പോയി കഷ്ടപ്പെട്ട് പണിയെടുത്തിട്ടാണ് അവളെ പോറ്റിയത്. പൊന്നൂസിനെ ലാളിച്ചിട്ട് മതിയായിട്ടില്ല. ആ കുട്ടിയെ കൊന്ന അവള്‍ എന്റെ മകളായി പിറന്നല്ലോ -നെഞ്ച് പൊട്ടിക്കൊണ്ട് ശരണ്യയുടെ അച്ഛന്‍ വത്സരാജ് പറയുന്നു. അവള്‍ക്ക് മരണശിക്ഷ വിധിച്ചാലും ഞങ്ങള്‍ക്കൊന്നുമില്ലെന്നും അച്ഛന്‍ കൂട്ടിച്ചേര്‍ക്കുന്നു. ഞങ്ങള്‍ എല്ലാവര്‍ക്കും അത്രയേറെ പ്രിയപ്പെട്ടതായിരുന്നു മോന്‍. കടലില്‍ പോകുമ്പോഴും മനസ്സില്‍ അവനായിരുന്നു -അദ്ദേഹം വേദനയോടെ പറഞ്ഞു. കടലാക്രമണത്തോടൊപ്പം കാലവര്‍ഷക്കലിയില്‍ കടലപകടങ്ങളും കണ്ട് മനസ്സ് തകര്‍ന്നിട്ടുണ്ട് അരയഗ്രാമത്തിലെ ഈ തീരത്തിന്. അവിടെയാണ് തങ്ങള്‍ക്കുമുന്നിലൂടെ ബാല്യം കടന്നുപോയ ഇരുപത്തിരണ്ടുകാരി ചെയ്ത ക്രൂരത അവര്‍ക്ക് ഏറ്റവും വലിയ നടുക്കമാവുന്നത്.

ആര്‍ക്കും കണ്ടാല്‍ എടുത്തോമനിക്കാന്‍ തോന്നുന്ന പിഞ്ചുകുഞ്ഞിനെ രാത്രി പാലുകൊടുത്തശേഷം കടലില്‍ എറിയുകയും മരിച്ചെന്നുറപ്പു വരുത്താന്‍ കരയുന്ന കുട്ടിയെ വീണ്ടും കടലിലേക്ക് വലിച്ചെറിയുകയും ചെയ്യുക. ശേഷം ഒന്നുമറിയാത്തവളെപ്പോലെ വീട്ടിലേക്ക് തിരിച്ചുവന്ന് കിടക്കുക. മണിക്കൂറുകള്‍ക്കകം കുഞ്ഞിനെ ആരോ തട്ടിക്കൊണ്ടുപോയി എന്ന പെരുംനുണപറഞ്ഞ് ഭര്‍ത്താവിനെ പരാതികൊടുക്കാന്‍ സ്റ്റേഷനില്‍ പോകാന്‍ നിര്‍ബന്ധിക്കുക. ഇരുപത്തിരണ്ടുകാരിയുടെ ക്രിമിനല്‍ ബുദ്ധി പോലീസിനെപ്പോലും അതിശയിപ്പിച്ചു. പക്ഷെ, കടല്‍ കരയ്ക്ക് തിരിച്ചുകൊടുത്ത കുഞ്ഞിന്റെ ശരീരം ശരണ്യയുടെ വക്രബുദ്ധിക്ക് തിരിച്ചടിയായി.

നാലരവര്‍ഷംമുന്‍പ് വാരം സ്വദേശിയായ പ്രണവിനെ പ്രണയിച്ച് വിവാഹംകഴിച്ചതാണ്. വിവാഹമല്ല ഒളിച്ചോട്ടം. കല്യാണം കഴിക്കുമ്‌ബോള്‍ ശരണ്യയ്ക്ക് 18 വയസ്സ് കഷ്ടി. പക്ഷെ, അവരുടെ ബന്ധത്തില്‍ ഉലച്ചില്‍വന്നു. ഭര്‍തൃവിട്ടില്‍ നില്‍ക്കാതെ ശരണ്യ തയ്യിലിലെ വീട്ടില്‍ത്തന്നെ താമസം തുടങ്ങി. അതിനിടെ ഭര്‍ത്താവുമായി സ്വരച്ചേര്‍ച്ചയില്ലാതായി. അതിനിടെയാണ് വാരം സ്വദേശിയും ഭര്‍ത്താവിന്റെ സുഹൃത്തുമായ വ്യക്തിയുമായി പരിചയപ്പെടുകയും ഫേസ്ബുക്ക് ബന്ധം സ്ഥാപിക്കുയും ചെയ്യുന്നത്. കുട്ടിയെ കടലിലെറിഞ്ഞശേഷം കുറ്റം ഭര്‍ത്താവിന്റെ തലയില്‍ ചുമത്തി രക്ഷപ്പെടാനാണ് ശരണ്യ തീരുമാനിച്ചിരുന്നത്.