ഞെട്ടിത്തരിച്ച് കോണ്‍ഗ്രസ്... മുന്‍ മന്ത്രി വി.എസ്. ശിവകുമാറിന്റെ വീട്ടില്‍ വിജിലന്‍സ് റെയ്ഡ്; ശിവകുമാറിനെ ഒന്നാം പ്രതിയാക്കി വിജിലന്‍സ് സ്‌പെഷല്‍ സെല്‍ കഴിഞ്ഞദിവസം എഫ്.ഐ.ആര്‍. സമര്‍പ്പിച്ചതിന് പിന്നാലെയാണ് റെയ്ഡ്; തിരുവനന്തപുരത്ത് ശാസ്തമംഗലത്തുള്ള വീട്ടിലാണ് റെയ്ഡ്
മുന്‍മന്ത്രി വി.എസ്. ശിവകുമാറിന്റെ വീട്ടില്‍ വിജിലന്‍സ് റെയ്ഡ്. അനധികൃത സ്വത്ത് സമ്ബാദനക്കേസുമായി ബന്ധപ്പെട്ടാണ് റെയ്ഡ്. കേസില്‍ ശിവകുമാറിനെ ഒന്നാംപ്രതിയാക്കി എഫ്.ഐ.ആര്‍ വിജിലന്‍സ് സ്‌പെഷല്‍ സെല്‍ കഴിഞ്ഞദിവസം എഫ്.ഐ.ആര്‍. സമര്‍പ്പിച്ചിരുന്നു. ഇന്ന് രാവിലെ എട്ടരയോടെയാണ് റെയ്ഡ് തുടങ്ങിയത്. ശിവകുമാറിന്റെ എല്ലാ വീടുകളും വിജിലന്‍സ് പരിശോധിക്കും. തിരുവനന്തപുരത്ത് ശാസ്ത മംഗലത്തുള്ള വീട്ടിലാണ് ഇപ്പോള്‍ റെയ്ഡ് തുടങ്ങിയത്. വിജിലന്‍സ് ഡയറക്ടറുടെ നിര്‍ദ്ദേശ പ്രകാരമാണ് ഇത്. രേഖകള്‍ പിടിച്ചെടുക്കുകയാണ് ലക്ഷ്യം.
ശിവകുമാറിന്റെ പേഴ്‌സണല്‍ സ്റ്റാഫ് അംഗങ്ങളായിരുന്ന എം. രാജേന്ദ്രന്‍, ഷൈജു ഹരന്‍, എന്‍.എസ്. ഹരികുമാര്‍ എന്നിവരാണ് മറ്റു പ്രതികള്‍. തിരുവനന്തപുരം പ്രത്യേക വിജിലന്‍സ് കോടതിയിലാണ് എഫ്.ഐ. ആര്‍. സമര്‍പ്പിച്ചത്. ഉമ്മന്‍ചാണ്ടി മന്ത്രിസഭയില്‍ ആരോഗ്യമന്ത്രിയായിരിക്കെ, അധികാരദുര്‍വിനിയോഗം നടത്തി ബന്ധുക്കളുടെയും ചില സുഹൃത്തുക്കളുടെയും പേരില്‍ സ്വത്ത് സമ്ബാദിച്ചുവെന്നാണ് പരാതി.
ശിവകുമാര്‍ ഒഴികെയുള്ളവര്‍ക്ക് വരവില്‍ക്കവിഞ്ഞ സ്വത്തുണ്ടായിരുന്നുവെന്ന് വിജിലന്‍സ് പ്രാഥമികപരിശോധനയില്‍ കണ്ടെത്തിയിട്ടുണ്ട്. ശിവകുമാര്‍ അനധികൃത സ്വത്തുസമ്ബാദനം നടത്തിയെന്ന് പ്രത്യക്ഷത്തില്‍ തെളിഞ്ഞിട്ടില്ലെങ്കിലും അദ്ദേഹം മറ്റുള്ളവരുടെപേരില്‍ സ്വത്ത് സമ്ബാദിച്ചുവെന്ന വിവരത്തിന്റെ അടിസ്ഥാനത്തിലാണ് ഒന്നാം പ്രതിയാക്കിയതെന്നാണ് സൂചന. ആവശ്യമെന്നുകണ്ടാല്‍ എന്‍ഫോഴ്‌സ്‌മെന്റ് വിഭാഗവും അന്വേഷണം നടത്തും.
അതേസമയം തനിക്കെതിരെ വിജിലന്‍സിന് പേരുവയ്ക്കാതെ പരാതി നല്‍കിയത് തിരുവനതപുരം ജില്ലയിലെ ഒരു കോണ്‍ഗ്രസ് നേതാവാണെന്ന് മുന്‍മന്ത്രി വി എസ് ശിവകുമാറിന് സംശയം. മന്ത്രിയായിരിക്കെ തനിക്കൊപ്പം നില്‍ക്കുകയും ധാരാളം കാര്യങ്ങള്‍ നടത്തിയെടുക്കുകയും ചെയ്തയാളാണ് പിന്നീട് തനിക്കെതിരെ തിരിഞ്ഞത്.
അദ്ദേഹം മറ്റ് കോണ്‍ഗ്രസ് നേതാക്കള്‍ക്കെതിരെയും പരാതി നല്‍കാറുണ്ടെന്നാണ് ശിവകുമാര്‍ കരുതുന്നത്. വട്ടിയൂര്‍ക്കാവില്‍ മോഹന്‍കുമാര്‍ സ്ഥാനാര്‍ത്ഥിയായപ്പോള്‍ വോട്ട് മറിച്ചു സി പി എമ്മിന് നല്‍കിയതിലും അദ്ദേഹത്തിന് പങ്കുണ്ടെന്ന് സംശയിക്കുന്നു.
2021 ലെ നിയമസഭാ തെരഞ്ഞടുപ്പില്‍ തിരുവനന്തപുരം സീറ്റില്‍ നിന്നും മത്സരിക്കാന്‍ അദ്ദേഹം ആഗ്രഹിക്കുന്നുണ്ട്. മന്ത്രിയായിരിക്കെ കോടികള്‍ സമ്പാദിച്ചപ്പോള്‍ അത് വേണ്ടപ്പെട്ടവര്‍ക്ക് നല്‍കിയില്ലെന്ന് പലര്‍ക്കും പരിഭവമുണ്ട്.
ശിവകുമാറിന് കോടികളുടെ ബിനാമി സ്വത്തുണ്ടെന്ന് തിരുവനന്തപുരത്തെ കോണ്‍ഗ്രസ് നേതാക്കള്‍ പറഞ്ഞു നടക്കുന്നുണ്ട്. അതേസമയം ഇബ്രാഹിം കുഞ്ഞിനെ നരേന്ദ്ര മോദിക്ക് വിട്ടുകൊടുക്കാതിരിക്കാന്‍ പി.കെ. കുഞ്ഞാലിക്കുട്ടിയും സംഘവും രംഗത്തെത്തിയപ്പോള്‍ മുന്‍ മന്ത്രി വി എസ് ശിവകുമാറിനെ രക്ഷിക്കാന്‍ ആരുമില്ല.
ശിവകുമാറിന് വേണ്ടി കോണ്‍ഗ്രസ് നേതാക്കള്‍ പോലും ഇതു വരെ രംഗത്തെത്തിയിട്ടില്ല. തന്നെ രക്ഷിക്കണമെന്ന ശിവകുമാറിന്റെ ആവശ്യത്തോട് ചെന്നിത്തല മുഖം തിരിച്ചതായാണ് റിപ്പോര്‍ട്ട്.
ഇബ്രാഹിം കുഞ്ഞിനെ കൊലയ്ക്ക് കെടുക്കാതിരിക്കാന്‍ കുഞ്ഞാലിക്കുട്ടി പിണറായിയെ കണ്ടു. മുഖ്യമന്ത്രിയുമായുള്ള അഭിപ്രായ വ്യത്യാസം കാരണമാണ് ചെന്നിത്തല വിഷയത്തില്‍ ഇടപെടാത്തത്. ഉമ്മന്‍ ചാണ്ടിയാണെങ്കില്‍ ചെന്നിത്തലയുടെ ഗ്രൂപ്പുകാരനായ ശിവകുമാറിനെ സഹായിക്കില്ല. ശിവകുമാര്‍ വല്ലാത്ത സമ്മര്‍ദ്ദമാണ് അനുഭവിക്കുന്നത്. ആരും സഹായിക്കാനില്ല എന്നതാണ് അദ്ദേഹത്തിന്റെ അവസ്ഥ.
https://www.facebook.com/Malayalivartha
