കൊറോണ വൈറസിന്റെ പേരിലും കേരളത്തിൽ രാഷ്ട്രീയത്തല്ല്. പൗരത്വ വിഷയത്തിലെന്ന പോലെ ഇക്കാര്യത്തിലും ഭരണപക്ഷവും പ്രതിപക്ഷം ഒരുമിച്ചാണ് രംഗത്തിറങ്ങിയത്. വസ്തുതകൾ കൃത്യമായി മനസിലാക്കാതെ പ്രതികരിച്ചവർക്കെതിരെ കേന്ദ്രമന്ത്രി വി. മുരളീധരൻ രംഗത്തെത്തി.

യുദ്ധ സമാനമായ സാഹചര്യമാണുള്ളതെന്ന് കേന്ദ്ര മന്ത്രി വി. മുരളീധരൻ പറഞ്ഞു. രാജ്യം ഒറ്റ കെട്ടായി നീങ്ങണം. അതിനിടയിൽ രാഷ്ട്രീയം കളിക്കരുത്. സംസ്ഥാനവും കേന്ദ്രവും തമ്മിലുള്ള ഏറ്റുമുട്ടലായി രോഗത്തെ ചിത്രീകരിക്കുന്നത് ശരിയല്ല. അത്തരത്തിൽ ചെയ്യുന്നത് രാഷ്ട്രീയ ലാഭം ലക്ഷ്യമിട്ട് മാത്രമാണ്. മലയാളികളെ തിരിച്ചു കൊണ്ടുവരണം എന്ന് ആവശ്യപ്പെട്ട് മുഖ്യമന്ത്രി പ്രധാനമന്ത്രിക്ക് കത്തെഴുതിയ കാര്യം മാധ്യമങ്ങളിലൂടെ മനസിലാക്കിയിട്ടുണ്ട്. മുൻ മുഖ്യമന്ത്രി ഉമ്മൻചാണ്ടി തന്നെ വിളിച്ചു. ഇറ്റലിയിൽ കുടുങ്ങിയവരെ തിരികെ കൊണ്ടുവരണമെന്നാണ് അദ്ദേഹം ആവശ്യപ്പെട്ടത്. താൻ കേന്ദ്ര വിദേശകാര്യമന്ത്രി ജയശങ്കറുമായി സംസാരിച്ചു. ഇറ്റലിയിലും കൊറിയയിലുമാണ് രോഗബാധിതർ ഏറെ കൂടുതൽ ഉള്ളത്.

ഇവർക്ക് ഇന്ത്യയിലേക്ക് വരാനുള്ള യാത്രാവിലക്ക് ഏർപ്പെടുത്തിയത് ആരോഗ്യ വകുപ്പാണ്. വിമാനത്തിൽ രോഗമുള്ളവരും ഇല്ലാത്തവരും 8 മണിക്കർ ഒരുമിച്ച് യാത്ര ചെയ്താൽ രോഗം പടരും. അതിന് നോ കൊറോണാ സർട്ടിഫിക്കറ്റ് വേണം. ഇത് നൽകാൻ ഇറ്റലിയിലെ ഡോക്ടർമാർ തയ്യാറല്ല. സർട്ടിഫിക്കേറ്റ് കിട്ടാൻ ബുദ്ധിമുട്ടുള്ള സാഹചര്യത്തിൽ ഇന്ത്യയിൽ നിന്ന് മെഡിക്കൽ സംഘത്തെ അയക്കണം. ഇക്കാര്യത്തിൽ ഉടൻ തീരുമാനമെടുക്കും. ഇറാനിൽ അകപ്പെട്ട മത്സ്യബന്ധന തൊഴിലാളികളെ മടക്കി കൊണ്ടുവരും. ഓരോ മത്സ്യതൊഴിലാളികളെയും ഞങ്ങൾക്ക് നേരിട്ട് ബന്ധപ്പെടാനാവില്ല. വിദേശകാര്യ മന്ത്രാലയം നടത്തുന്ന ഓരോ പ്രവർത്തനവും ആ നിമിഷം മാധ്യമങ്ങളെ അറിയിക്കാൻ ആവില്ല. അത്തരം കാര്യങ്ങളിൽ നയതന്ത്രമര്യാദ യുണ്ട്. മാധ്യമങ്ങൾ നിഷ്പക്ഷമായി റിപ്പോർട്ട് ചെയ്യണം. പ്രതിരോധ വകുപ്പിന്റെ വിമാനത്തിൽ ഇറാനിൽ നിന്നും ആദ്യ സംഘത്തെ കൊണ്ടുവന്നു. വിദേശകാര്യ മന്ത്രി ഇക്കാര്യത്തിൽ രാജ്യസഭയിൽ പ്രതികരിക്കുമെന്നും മുരളീധരൻ പറഞ്ഞു.

കോവിഡ് 19 രോഗബാധയെ തുടര്‍ന്ന് പ്രവാസികൾ നിരവധി പ്രയാസങ്ങള്‍ നേരിടുന്നത് ശ്രദ്ധയില്‍പ്പെട്ടിട്ടുണ്ടെന്നാണ് മുഖ്യമന്ത്രി പ്രധാനമന്ത്രിക്ക് അയച്ച കത്തിൽ പറഞ്ഞത്. വിമാന സര്‍വ്വീസുകള്‍ റദ്ദാക്കിയതുകാരണം ഗള്‍ഫ് രാജ്യങ്ങളിലേക്ക് അവധി കഴിഞ്ഞ് തിരികെ പോകേണ്ടവരും ബുദ്ധിമുട്ടിലാണ്. അന്തര്‍ദേശീയതലത്തില്‍ തന്നെ ഇതൊരു പ്രധാന പ്രശ്‌നമായതിനാല്‍ പല രാജ്യങ്ങളും വിദേശയാത്രയ്ക്ക് നിയന്ത്രണങ്ങള്‍ ഏര്‍പ്പെടുത്തിയിരിക്കുകയാണ്.

ഇന്ത്യൻ പൗരൻ രോഗി ആയിപ്പോയാൽ ഇങ്ങോട്ട് വരാൻ പാടില്ലെന് പറയാമോ എന്നാണ് മുഖ്യമന്ത്രി കേന്ദ്രത്തോട് ചോദിക്കുന്നത്. നമ്മുടെ രാജ്യത്തെ പൗരൻമാർ ഇങ്ങോട്ട് വരാൻ പാടില്ല എന്ന കേന്ദ്രസമീപനം അപരിഷ്കൃതമാണ്. ഇതുമായി ബന്ധപ്പെട്ട് സിവിൽ ഏവിയേഷൻ മന്ത്രാലയം ഇറക്കിയ സർക്കുലർ പിൻവലിക്കണമെന്ന് മുഖ്യമന്ത്രി പ്രധാനമന്ത്രിയോട് ആവശ്യപ്പെട്ടു.

പ്രശ്നം സംബന്ധിച്ച് നിയമസഭയിൽ അവതരിപ്പിച്ച പ്രമേയം ഭരണ- പ്രതിപക്ഷങ്ങൾ ഒറ്റക്കെട്ടായി പാസാക്കി. ഇതിന് പിന്നാലെയാണ് വി. മുരളീധരൻ രംഗത്തെത്തിയത്. അടുത്തിടെ കേന്ദ്ര സർക്കാരിന്റെ വിലക്ക് നേരിട്ട ഒരു പ്രമുഖ ചാനലിനെയും പേരെടുത്ത് പറയാതെ മുരളീധരൻ വിമർശിച്ചു. സംസ്ഥാനം കടുത്ത പ്രതിസന്ധിയിലായിരിക്കുമ്പോൾ കേന്ദ്രവും സംസ്ഥാനവും തമ്മിലുള്ള ഏറ്റുമുട്ടൽ ഒരിക്കലും അഭികാമ്യമല്ല.