എറണാകുളം, വടക്കേക്കരയ്ക്കടുത്ത് ജല അതോറിറ്റിയുടെ പൈപ്പ് എന്നു കരുതി കെഎസ്ഇബിയുടെ കേബിള്‍ ഡ്രില്‍ ചെയ്ത തൊഴിലാളി ഷോക്കേറ്റ് തെറിച്ചുവീണെങ്കിലും അദ്ഭുതകരമായി രക്ഷപ്പെട്ടു. കരാര്‍ തൊഴിലാളി ചേന്ദമംഗലം വടക്കുംപുറം സ്വദേശി വിന്‍സെന്റാണു രക്ഷപ്പെട്ടത്. ജല അതോറിറ്റിയുടെ പൈപ്പ് എന്നു കരുതി വിന്‍സെന്റ് ഡ്രില്‍ ചെയ്തത് കുഞ്ഞിത്തൈ കപ്പേളയ്ക്കു സമീപത്തു നിന്നു പള്ളിയുടെ ഭാഗത്തേക്ക് ഭൂമിക്കടിയിലൂടെ വലിച്ചിരിക്കുന്ന 11 കെവി ലൈനിലാണ്.

രണ്ടര ഇഞ്ച് കേബിളില്‍ ക്ലാംപ് പിടിപ്പിച്ചശേഷം ഡ്രില്‍ ചെയ്തപ്പോള്‍ കേബിളിന്റെ മുകള്‍തട്ടിലൂടെ പോയിരുന്ന എര്‍ത്ത് ലൈനില്‍ ഡ്രില്ലര്‍ തട്ടി ഷോര്‍ട്ടായി. വിന്‍സെന്റ് തെറിച്ചു വീണു. ഡ്രില്ലര്‍ കൂടുതല്‍ താഴേക്ക് ഇറങ്ങിയിരുന്നെങ്കില്‍ ജീവഹാനി സംഭവിക്കുമായിരുന്നു. ആശുപത്രിയില്‍ ചികിത്സ തേടിയ വിന്‍സെന്റ് പിന്നീടു വീട്ടിലേക്കു മടങ്ങി.

ജല അതോറിറ്റി ഉദ്യോഗസ്ഥരുടെ സാന്നിധ്യമില്ലാതിരുന്നതു കൊണ്ടാണ് അപകടമുണ്ടായതെന്ന് ആരോപണമുണ്ട്. ലൈന്‍ ടാപ്പിങ് നടത്തുന്ന സമയത്തു ജല അതോറിറ്റിയുടെ ലൈന്‍മാന്‍ ഉണ്ടാകണമെന്നാണു വ്യവസ്ഥ. ഇന്നലെ തൊഴിലാളിക്കൊപ്പം കരാറുകാരന്‍ മാത്രമേ ഉണ്ടായിരുന്നുള്ളൂ. കേബിള്‍ പൈപ്പ് പോലെ തോന്നിയതിനാലാണു വിന്‍സെന്റ് ഡ്രില്‍ ചെയ്തതെന്നു കരാറുകാരനായ അബ്ദുല്‍ കരിം പറഞ്ഞു.

ജീവനക്കാരുടെ കുറവുള്ളതിനാല്‍ വടക്കേക്കര സെക്ഷന്റെ കീഴിലുള്ള ജോലികള്‍ പലപ്പോഴും കരാറുകാരന്‍ നേരിട്ടാണു ചെയ്യുന്നത്. എഇ, പ്യൂണ്‍ എന്നിവര്‍ മാത്രമേ വടക്കേക്കര സബ് ഡിവിഷനിലുള്ളൂ. ഓവര്‍സിയറുടെ പോസ്റ്റ് ഒഴിഞ്ഞുകിടക്കുന്നു. ദിവസ വേതനാടിസ്ഥാനത്തില്‍ ജീവനക്കാരെ നിയോഗിച്ചാണു മറ്റു പ്രവര്‍ത്തനങ്ങള്‍ നടത്തുന്നത്. സംഭവത്തെത്തുടര്‍ന്നു പ്രദേശത്തു വൈദ്യുതി തടസ്സമുണ്ടായി. മറ്റൊരു ട്രാന്‍സ്‌ഫോര്‍മറില്‍ നിന്നു ലൈന്‍ കൊടുത്തു താല്‍ക്കാലികമായി വൈദ്യുതി പുനഃസ്ഥാപിച്ചു.