വിവാദങ്ങൾ കത്തി നിൽക്കുമ്പോഴും സംസ്ഥാനത്തെ പൊലീസ് സേനക്ക് അഭിനന്ദനവുമായി മുഖ്യമന്ത്രി പിണറായി വിജയൻ. നിയമസഭയിലാണ് സംസ്ഥാന പൊലീസ് സേനയുടേത് സ്തുത്യർഹമായ പ്രവർത്തനമാണെന്ന് മുഖ്യമന്ത്രി പിണറായി വിജയൻ അഭിപ്രായം പ്രകടിപ്പിച്ചത് . ഇതിനിടെ ചർച്ചയിൽ വിവാദ വിഷയങ്ങൾ ഉന്നയിച്ച പ്രതിപക്ഷത്തിന് വിഷയദാരിദ്ര്യമാണെന്നും മുഖ്യമന്ത്രി കുറ്റപ്പെടുത്തി. പ്രതിപക്ഷം പറഞ്ഞത് തന്നെ ആവർത്തിക്കുകയാണെന്ന പരിഹാസവും മുഖ്യന്ത്രിയുടെ ഭാഗത്ത് നിന്നുണ്ടായി.

ഗുരുതരമായ കുറ്റകൃത്യങ്ങൾ കുറഞ്ഞെന്നും ഇത് ക്രമസമാധാന നില മെച്ചപ്പെട്ടതിന്റെ തെളിവാണെന്നും അദ്ദേഹം വെളിപ്പെടുത്തി . പൊലീസിന്റെ സൈബർ സെല്ലുകളെ പൊലീസ് സ്റ്റേഷനുകളാക്കുമെന്നും മുഖ്യമന്ത്രി പ്രഖ്യാപിച്ചു. ഇതോടെ സൈബർ കുറ്റകൃത്യങ്ങളിൽ കേസ് രജിസ്റ്റർ ചെയ്യുന്നത് വേഗത്തിലാകും. പോലീസിലെ വനിതാ പ്രാതിനിധ്യം 15 ശതമാനായി ഉയർത്തുമെന്നും മുഖ്യമന്ത്രി അറിയിച്ചു.

പൊലീസുമായി ബന്ധപ്പെട്ട ധനാഭ്യർത്ഥന ചർച്ചയ്ക്കിടെയായിരുന്നു അഭിനന്ദനം . 2019 ൽ 82 ശതമാനം കേസുകളിൽ പ്രതികൾക്ക് ശിക്ഷ ലഭിച്ചെന്ന് മുഖ്യമന്ത്രി പറഞ്ഞു. അതേസമയം പൊലീസിനകത്ത് വിവിധ തലങ്ങളിൽ അസംതൃപ്തിയുണ്ട്. പ്രമോഷനുമായി ബന്ധപ്പെട്ട അസ്ഥിരതയാണ് കാരണം. ഇത് പരിഹരിക്കാൻ നടപടി പുരോഗമിക്കുന്നുവെന്നും അദ്ദേഹം വ്യക്തമാത്തി. പൊലീസിലെ മുഴുവൻ പ്രമോഷനുകളും റഗുലറായി നൽകുമെന്ന് മുഖ്യമന്ത്രി പ്രഖ്യാപിച്ചു.