ചൈനയിലെ വുഹാനില്‍നിന്നു വ്യാപിച്ച കില്ലർ വൈറസ് കോവിഡ്– 19 ഇന്ന് നൂറിലധികം രാജ്യങ്ങളില്‍ മരണം വിതച്ചു പടർന്നു പിടിക്കുകയാണ് .. പനി, ചുമ എന്നിവയാണ് കൊറോണയുടെ ലക്ഷണങ്ങളായി കണക്കാക്കുന്നത് ..എന്നാൽ ഈ ലക്ഷണങ്ങൾ ഇപ്പോഴും കൊറോണയുടേത് ആകണമെന്ന് ഒരു നിർബന്ധവുമില്ല നമ്മിൽ പലർക്കും ഇതിനോടകം തന്നെ ജലദോഷമടക്കമുള്ള പനിയിലേക്ക് നയിക്കുന്ന ലക്ഷണങ്ങൾ കണ്ടിരിക്കാം. രാജ്യത്താകമാനം വലിയ തോതിലെ പ്രതിരോധ പ്രവര്‍ത്തനങ്ങളാണ് നടക്കുന്നത്. രോഗം സ്ഥിരീകരിച്ച ആളുകളെയും രോഗമുണ്ടെന്നു സംശയിക്കുന്ന ആളുകളെയും ഐസലേറ്റ് ചെയ്യുകയാണ് ഇപ്പോള്‍
എന്നാൽ ഏത് സാഹചര്യത്തിലാണ് വൈദ്യ സഹായം തേടേണ്ടത്, എങ്ങനെ ടെസ്റ്റ് ചെയ്യണം തുടങ്ങിയ വിവരങ്ങൾ എന്തൊക്കെയെന്ന് നോക്കാം…

പരിശോധിക്കേണ്ടത് എപ്പോൾ ?
പനി, ചുമ, ശ്വാസ തടസം എന്നിവയാണ് കൊറോണ ലക്ഷണങ്ങൾ. ഏതെങ്കിലും തരത്തിൽ കൊറോണ ബാധിക്കാൻ സാധ്യതയുള്ള വ്യക്തിയാണ് നിങ്ങളെന്ന് തോന്നുന്നുണ്ടെങ്കിൽ മേൽപ്പറഞ്ഞ ലക്ഷണങ്ങളിൽ ഏതെങ്കിലുമൊന്ന് പ്രകടമായാൽ കൊറോണ സംശയിക്കേണ്ടതാണ്. നിങ്ങൾ സെൽഫ് ക്വാറന്റീനിൽ ഇരിക്കണമന്നാണ് വിദഗ്ധർ അഭിപ്രായപ്പെടുന്നത്

പുറത്തിറങ്ങുന്നത് ഒഴിവാക്കി പരമാവധി സുരക്ഷിതമായ സ്ഥാനങ്ങളില്‍ കഴിയുക എന്നതാണ് ക്വാറന്‍റീൻ കൊണ്ട് ഉദേശിക്കുന്നത്. കോവിഡ് രോഗലക്ഷണങ്ങളില്‍ ഏതെങ്കിലും ഉണ്ടെന്നു തോന്നിയാല്‍ രോഗിയോട് സെൽഫ് ക്വാറന്‍റീൻ ചെയ്യാൻ നിര്‍ദേശിക്കുന്നുണ്ട്. ഇത് രോഗം മറ്റുള്ളവര്‍ക്ക് പടരാതെ നോക്കാനാണ്. ഒപ്പം രോഗിക്ക് ചികിത്സ നല്‍കുകയും ചെയ്യും. പ്രതിരോധ ശേഷി കൂടാനുള്ള ആഹാരം, മരുന്നുകള്‍ എന്നിവ രോഗിക്ക് നല്‍കും. രോഗിക്ക് ഫോണ്‍ ഉപയോഗിക്കാനോ പ്രിയപ്പെട്ടവരെ ബന്ധപ്പെടാനോ തടസ്സങ്ങള്‍ ഉണ്ടാവില്ല. എന്നാല്‍ സന്ദര്‍ശകരെ പരമാവധി ഒഴിവാക്കുകയാണ് നല്ലത് . പതിനാല് ദിവസമാണ് ഇത്തരത്തില്‍ രോഗി ഐസലേഷനില്‍ കഴിയേണ്ടത്.

എങ്ങനെ പരിശോധിക്കണം ?
സെൽഫ് ക്വാറന്റീനിൽ ഇരുന്ന ശേഷം അടുത്ത 48 മണിക്കൂർ നിർണായകമാണ്. രോഗ ലക്ഷണങ്ങൾ മൂർച്ഛിക്കുന്നുണ്ടോ എന്ന് നോക്കണം. ഉണ്ടെങ്കിൽ വീട്ടിലിരുന്ന് തന്നെ ആരോഗ്യ വിഭാഗത്തെ അറിയിക്കാം. അവർ വീട്ടിലെത്തി വേണ്ട പരിശോധനകൾ നടത്തും. ആവശ്യമെങ്കിൽ ആരോഗ്യ വിഭാഗ അധികൃതർ നിങ്ങളെ ആശുപത്രിയിലേക്ക് മാറ്റും..പനി, വരണ്ട ചുമ, തൊണ്ട വേദന, തലവേദന, ശ്വാസ തടസം എന്നിവയാണ് കൊറോണ ലക്ഷണങ്ങൾ..

എങ്ങനെ സെൽഫ് ക്വാറന്റീൻ ചെയ്യണം ?
സെൽഫ് ക്വാറന്റീനിൽ ഇരിക്കുന്ന സമയത്ത് ദിവസം രണ്ട് നേരം ശരീരോഷ്മാവ് പരിശോധിക്കണം. വീടുകളിലാണ് ഐസലേഷനില്‍ കഴിയേണ്ടതെങ്കില്‍ രോഗം സംശയിക്കുന്ന ആള്‍ മറ്റുള്ളവരുമായി ഇടപഴകാതെ നോക്കണം. രോഗി മറ്റുള്ളവര്‍ ഉപയോഗിക്കുന്ന വസ്തുക്കള്‍ ഒന്നും ഉപയോഗിക്കരുത്. കൈകള്‍ അടിക്കടി കഴുകുക, സാനിറ്റൈസര്‍ ഉപയോഗിക്കുക എന്നതും പ്രധാനം

ചുംബനം, ഹാന്‍ഡ്‌ ഷേക്ക്, ലൈംഗികബന്ധം എന്നിവ രോഗബാധ സംശയിക്കുന്നവരുമായി പാടില്ല. മൂക്കൊലിപ്പ്, ചുമ എന്നിവ ഉണ്ടെങ്കില്‍ മാസ്ക് നിര്‍ബന്ധമായും ഉപയോഗിക്കണമെന്നും CDC (Centres of Disease Control and Prevention) പറയുന്നു. ഐസലെഷനില്‍ കഴിയുന്നവര്‍ ഒരുകാരണവശാലും ഒറ്റയ്ക്ക് ആശുപത്രിയില്‍ പോകരുത്. പകരം ആരോഗ്യപ്രവര്‍ത്തകരുമായി ബന്ധപ്പെട്ട് അവര്‍ അയയ്ക്കുന്ന വാഹനത്തില്‍ വേണം ആശുപത്രിയില്‍ എത്താന്‍