കോവിഡ്-19 എന്ന മഹാമാരി ഉയര്‍ത്തുന്ന വെല്ലുവിളിയിലൂടെ കടന്നു പോകുകയാണ് ലോകം. ലോകാരോഗ്യ സംഘടനയുടെ കണക്കനുസരിച്ച് 130ലേറെ രാജ്യങ്ങളില്‍ കൊറോണ വൈറസ് ബാധ റിപ്പോര്‍ട്ട് ചെയ്തിട്ടുണ്ട്. ഓരോ രാജ്യവും ഓരോ സമൂഹവും അവര്‍ക്ക് അറിയുന്നതും ആവുന്നതുമായ രീതിയില്‍ ഈ വെല്ലുവിളിയെ നേരിടുന്നു. നമ്മുടെ രാ്ജ്യവും ഒറ്റക്കെട്ടായി കോറോണ വൈറസ് ബാധ ഉയര്‍ത്തുന്ന ഭീഷണിയെ നേരിടുകയാണ്. ഭീതിയല്ല ജാഗ്രതയാണ് വേണ്ടതെന്ന സന്ദേശം ഉള്‍ക്കൊണ്ട് കേരളവും കോറൊണ വൈറസിനെതിര പ്രതിരോധം ഉയര്‍ത്തുന്നു. സംസ്ഥാനം മുഴുവന്‍ അടച്ചിടാന്‍ തീരുമാനിച്ചിട്ടില്ലെങ്കിലും രോഗം ഉണ്ടാകാന്‍ സാധ്യതയുള്ള ഓരോരുത്തരെയും കണ്ടുപിടിച്ച് ടെസ്റ്റ് ചെയ്ത് അവരില്‍ രോഗമുള്ളവരെ ഐസൊലേറ്റ് ചെയ്ത് ചികില്‍സിക്കുകയും അവരുമായി ബന്ധപ്പെട്ടവരെ കണ്ടെത്തി സ്വയം ക്വാറന്റൈന്‍ ആവശ്യപ്പെടുകയും ചെയ്യുന്ന രീതിയാണ് ഇതുവരെ കേരളം സ്വീകരിച്ചിരിക്കുന്നത്. ഇതിലൂടെ കൊറോണയുടെ ഒന്നാം വരവ് പിടിച്ചുകെട്ടാനും സാധിച്ചു.

ഇതിനിടെ, വാളെക്കെടുന്നവരെല്ലാം വെളിച്ചപാടാണെന്ന രീതിയില്‍ ചിലരുടെഅണിത പ്രതിരോധ പ്രവൃത്തികള്‍ മലയാളി സമൂഹത്തെ കുറച്ചൊന്നുമല്ല പ്രതിസന്ധിയിലാക്കുന്നത്. ഏറ്റവും ഒടുവില്‍ കോറോണ വൈറസ് ബാധയുടെ ഭീതിയില്‍ തൃശൂരിലെ ഡോക്റ്ററും കുടുംബവുമാണ് ദുരവസ്ഥയിലായിരിക്കുന്നത്. കൊറോണ ബാധ സംശയിച്ച് തൃശൂരില്‍ ഫ്‌ളാറ്റിനകത്ത് ഡോക്ടറെ പൂട്ടിയിട്ടെന്ന പരാതിയാണ് ഇപ്പോള്‍ പുറത്തു വന്നിരിക്കുന്നത്. ഫ്‌ലാറ്റ് അസോസിയേഷന്‍ ഭാരവാഹികള്‍ ചേര്‍ന്ന് ഡോക്ടറെ പൂട്ടിയിടുകയും മുറിയ്ക്ക് പുറത്ത് കൊറോണ എന്നെഴുതി വയ്ക്കുകയും ചെയ്തുവെന്നാണ് പരാതി. ഇവര്‍ സൗദി സന്ദര്‍ശനം കഴിഞ്ഞെത്തിയവരാണെന്നു ചൂണ്ടിക്കാട്ടിയായിരുന്നു നടപടി. അതേസമയം, ഡോക്ടര്‍ക്ക് കൊവിഡ് ഉണ്ടെന്ന് ഇത് വരെ ഒരു പരിശോധനയിലും സ്ഥിരീകരിച്ചിട്ടില്ലെന്നിരിക്കെയാണ് ഫ്‌ലാറ്റ് അസോസിയേഷന്‍ ഭാരവാഹികളുടെ കിരാത നടപടി.

തുടര്‍ന്ന് ഡോക്ടര്‍ നല്‍കിയ പരാതിയെ തുടര്‍ന്ന് തൃശൂര്‍ ഈസ്റ്റ് പൊലീസ് കേസെടുത്തിട്ടുണ്ട്. മുണ്ടൂപാലത്തെ ഫ്‌ളാറ്റ് അസോസിയേഷന്‍ ഭാരവാഹികളെയാണ് പൊലീസ് അറസ്റ്റ് ചെയ്തത്. ഡോക്ടര്‍ ഫോണില്‍ വിളിച്ചറിയിച്ചത് അനുസരിച്ച് ഈസ്റ്റ് പൊലീസ് എത്തിയാണ് ഇവരെ അറസ്റ്റ് ചെയ്തത്. ഡോക്ടര്‍ക്കോ ഭാര്യയ്‌ക്കോ കോവിഡ് ലക്ഷണങ്ങളൊന്നും ഇല്ലെന്നാണ് പൊലീസില്‍ നിന്നു ലഭിച്ച വിവരം.

കഴിഞ്ഞയാഴ്ച കോട്ടയം മെഡിക്കല്‍ കോളേജിലെ മൂന്ന് മെയില്‍ നഴ്‌സുമാര്‍ക്കും സമാനമായ രീതിയില്‍ പ്രതിസന്ധിയിലായിരുന്നു. കോട്ടയം മെഡിക്കല്‍ കോളെജിലെ കൊറോണ ഐസൊലേഷന്‍ വാര്‍ഡില്‍ ജോലി ചെയ്യുന്ന നേഴ്സുമാരോട് വാടകവീട് ഒഴിയണമെന്ന് വീട്ടുടമസ്ഥന്‍ ആവശ്യപ്പെടുകയായിരുന്നു. ഐസൊലേഷന്‍ വാര്‍ഡില്‍ ജോലി ചെയ്യുന്ന നേഴ്സുമാരായതിനാല്‍ വൈറസ് ബാധയുണ്ടാകുമോ എന്ന ഭീതി വീട്ടുടമസ്ഥനുണ്ടായിരുന്നു. തുടര്‍ന്നാണ് വീടൊഴിയണമെന്ന് നേഴ്സുമാരോട് ആവശ്യപ്പെട്ടത്. വീട്ടുടമയുടെ ആവശ്യത്തെ തുടര്‍ന്ന് ഇവര്‍ വീടൊഴിയുകയായിരുന്നു. അതേസമയം, അദ്ദേഹം ഹൃദയശസ്ത്രക്രിയ കഴിഞ്ഞ വിശ്രമിക്കുന്നതിനാല്‍ അണുബാധയ്ക്കുള്ള സാധ്യത ഉള്ളതിനാലാണ് നേഴ്സുമാരോട് മാറാന്‍ നിര്‍ദേശിച്ചതെന്ന് വീട്ടുടമസ്ഥന്‍ പറയുന്നു.

എന്തായാലും കോറോണ വൈറസ് ബാധയുടെ പശ്ചാത്തലത്തില്‍ ചിലര്‍ കാണിക്കുന്ന അമിത ഉത്കണ്ഠ, മറ്റുള്ളവരെ ദുരിതത്തിലാക്കുമെന്നതിന് തര്‍ക്കമില്ല. ഇത്തരം പ്രവണതകള്‍ വീണ്ടും ആവര്‍ത്തിക്കാന്‍ അനുവദിച്ചാല്‍, തെറ്റിദ്ധാരണയുടെ പേരിലോ ഒന്നോ രണ്ടോ പേരുടെ തെറ്റായ പെരുമാറ്റത്തിന്റെ പേരിലോ സമൂഹത്തെ വിവിധ ഗ്രൂപ്പുകളായി തിരിച്ച് ഒറ്റപ്പെടുത്തുന്ന രീതി വരും. അടുത്ത വീട്ടില്‍ ഒരാള്‍ക്ക് സാധാരണ ഫ്‌ലൂ വന്നാല്‍ പോലും അവരെ ഒറ്റപ്പെടുത്തുകയോ അവിടെ നിന്നും മാറാന്‍ നിര്‍ബന്ധിക്കുകയോ ചെയ്യുന്ന അവസ്ഥ വരും. ഇത്തരം അന്തരീക്ഷം സമൂഹത്തില്‍ അക്രമത്തിലേക്ക് നയിച്ചേക്കാം.