വിദേശത്തു നിന്നെത്തിയ രോഗസാധ്യതയുള്ളവർക്കു ബോധവൽക്കരണം നടത്തുന്ന ഒരു ഹെൽത്ത് ഇൻസ്പെക്ടരുടെ അനുഭവം വായിച്ചാൽ ചിരിക്കണോ അതോ കരയണോ എന്നറിയാതെ വിഷമിച്ചുപോകും...

സ്വന്തം ആരോഗ്യത്തെപോലും കാര്യമാക്കാതെയാണ് ഹെൽത്ത് ഇൻസ്പെക്ടർമാരും മെഡിക്കൽ സംഘവുമെല്ലാം കൊറോണ പ്രതിരോധത്തിന് വേണ്ടി അധ്വാനിക്കുന്നത്...അവരുടെ പ്രവർത്തനങ്ങളെ നിഷ്ഫലമാക്കുന്ന തരത്തിൽ പ്രവർത്തിക്കുന്നത് പലപ്പോഴും സമൂഹത്തിലെ മാന്യന്മാരെന്നു നടിക്കുന്നവർ തന്നെ ആണെന്നതാണ് വിരോധാഭാസം... ഹെൽത്ത് ഇൻസ്പെക്ടർക്കുണ്ടായ രസകരമായ ആ അനുഭവം റിപ്പോർട്ട് ചെയ്തിരിക്കുന്നത് ഇങ്ങനെയാണ്

യുകെ പൗരത്വമുള്ള മലയാളി ആലപ്പുഴയിലെത്തിയപ്പോഴേ, ഞങ്ങൾ അദ്ദേഹത്തെപ്പോയി കണ്ട് വീട്ടിൽ നിരീക്ഷണത്തിൽ ഇരിക്കണമെന്നു നിർദേശിച്ചിരുന്നു. യുകെയിൽ വച്ച് ഞാൻ ടെസ്റ്റ് ചെയ്തതാണെന്നും അതിലും വലുതാണോ ഈ ദരിദ്രരാജ്യത്തിലെ ടെസ്റ്റ് എന്നുമാണ് അദ്ദേഹത്തിന്റെ നിലപാട്.

വൈറസ് ശരീരത്തിൽ കടന്നിട്ടുണ്ടെങ്കിൽ ആരംഭത്തിലെ പരിശോധനയിൽ ചിലപ്പോൾ ശ്രദ്ധയിൽപ്പെടില്ലെന്നും പിന്നീട് രോഗലക്ഷണങ്ങൾ ഉണ്ടാകാമെന്നും അദ്ദേഹത്തെ ബോധ്യപ്പെടുത്താൻ ശ്രമിച്ചു

അദ്ദേഹം വീടുവിട്ടു പുറത്തിറങ്ങാൻ സാധ്യത തോന്നിയതിനാൽ അയൽ വീട്ടുകാരുമായി ഞങ്ങൾ നിരന്തരം ബന്ധപ്പെട്ടിരുന്നു. പിറ്റേ ദിവസം ഇയാളും ഭാര്യയും കാറിൽ പുറത്തിറങ്ങിയെന്ന് അയൽക്കാർ ഞങ്ങളെ അറിയിച്ചു. അദ്ദേഹത്തിന്റെ അച്ഛനുമായി ബന്ധപ്പെട്ട് അവരെ ഉടൻ തിരിച്ചു വിളിക്കണമെന്നു നിർദേശിച്ചു. പക്ഷേ, തിരിച്ചു വരാൻ അവർ തയാറായില്ല.

അതിനിടെ പൊലീസ് ഉദ്യോഗസ്ഥൻ എന്നു പരിചയപ്പെടുത്തി ഞങ്ങൾക്ക് ഒരു ഫോൺ കോൾ വന്നു. നിങ്ങളെന്തിനാണ് യുകെക്കാരനെ ശല്യപ്പെടുത്തുന്നതെന്നു ഭീഷണി. ആ ഫോൺ നമ്പർ ഞങ്ങൾ പൊലീസിനു തന്നെ കൈമാറി. പിന്നീട് പ്ലസ് ടു അധ്യാപകൻ എന്നു പരിചയപ്പെടുത്തി മറ്റൊരാൾ. യുകെക്കാരൻ തന്റെ സ്വാധീനം ഞങ്ങളെ അറിയിക്കുകയാണ്.

ഒടുവിൽ ഇവർ പോയ കാറിന്റെ നമ്പർ ഉൾപ്പെടെ മാധ്യമങ്ങൾക്കു കൈമാറുമെന്നു പറഞ്ഞപ്പോഴാണ് അവർ തിരിച്ചെത്തിയത്. അടൂർ വരെ കാർ ഓടിച്ചു പോയെന്നും എങ്ങും ഇറങ്ങിയിട്ടില്ലെന്നും പൊലീസ് സ്പെഷൽ ബ്രാഞ്ചിന്റെ അന്വേഷണത്തിൽ മനസ്സിലായി.

വൈകിട്ട് വീണ്ടും വീട്ടിലെത്തി കാര്യങ്ങൾ ബോധ്യപ്പെടുത്താൻ ശ്രമിച്ചു. അപ്പോൾ ആ പ്ലസ്ടു അധ്യാപകൻ അവിടെയുണ്ട്. നല്ല ഫോമിലാണ്. അയാൾ അലറുന്നു. ‘വി ആർ നോട്ട് ക്രിമിനൽസ്. ഐ ആം എ ഗസറ്റഡ് ഓഫിസർ’. അറിയാതൊരു പുച്ഛച്ചിരി മുഖത്തു വന്നു പോയി

ഇത്തരം ആളുകളാണ് സന്നദ്ധപ്രവർത്തകർക്കും മെഡിക്കൽ സംഘങ്ങൾക്കും ഭീഷണിയായി വരുന്നത്. പൊങ്ങച്ചത്തിന്റെ നിറുകയിൽ കയറിയിരുന്നു അവർ ചെയ്യുന്ന പ്രവർത്തികൾ പലപ്പോഴും ഉണ്ടാക്കുന്ന പ്രത്യാഘാതങ്ങൾ വളരെ വലുതാണ്

ജാഗ്രതയോടെയുള്ള പ്രവർത്തനങ്ങൾ മാത്രമാണ് കൊവിഡ് 19നെ പ്രതിരോധിക്കാൻ നമുക്ക് മുന്നിലുള്ള ഏക വഴി. ആരോഗ്യ പ്രവർത്തകർ നൽകുന്ന നിർദേശങ്ങൾ പാലിച്ച് ആളുകൾ കൂടുന്ന സാഹചര്യം പരമാവധി ഒഴിവാക്കേണ്ടത് വരുന്ന ആഴ്ചകളിൽ നിർബന്ധമാണ്.

കേരള ആരോഗ്യ വകുപ്പ് ആവിഷ്കരിച്ച് ബ്രേക്ക് ദ ചെയിൻ ക്യാമ്പയിനിലും മറ്റും പറയുന്നതുപോലെ വൈറസ് വ്യാപനം തടയാനായി ഒരേ മനസോടെ മുന്നോട്ട് പോകാൻ ഓരോരുത്തരും തയ്യാറാകണം...