കോവിഡ്-19 ഭീതി പടരുന്നതിനിടെ സംസ്ഥാനത്ത് സ്വകാര്യബസ് വ്യവസായം വന്‍ പ്രതിസന്ധിയിലേക്ക് നീങ്ങുന്നു. പകുതിയോളം സ്വകാര്യബസുകള്‍ ഭാഗികമായോ പൂര്‍ണമായോ സര്‍വിസ് നിര്‍ത്തിവെച്ചു. ചില ബസുകള്‍ സര്‍വിസ് ഒന്നിടവിട്ട ദിവസങ്ങളിലായി വെട്ടിച്ചുരുക്കി. കോവിഡ്-19 ജാഗ്രതയുടെയും മുന്‍കരുതലുകളുടെയും ഭാഗമായി ആളുകള്‍ പുറത്തിറങ്ങുന്നത് പരമാവധി കുറഞ്ഞതോടെ യാത്രക്കാരുടെ എണ്ണത്തിലുണ്ടായ ഗണ്യമായ ഇടിവാണ് കെ.എസ്.ആര്‍.ടി.സിക്ക് എന്നതുപോലെ സ്വകാര്യബസുകള്‍ക്കും തിരിച്ചടിയായത്.

12000ഓളം സ്വകാര്യബസുകളാണ് സംസ്ഥാനത്ത് സര്‍വിസ് നടത്തുന്നത്. ഇവയില്‍ ആറായിരത്തോളം ബസുകള്‍ പൂര്‍ണമായോ ഭാഗികമായോ നിലവില്‍ സര്‍വിസ് നിര്‍ത്തിവെച്ചിരിക്കുകയാണ്. ബാക്കിയുള്ളവതന്നെ നഷ്ടം സഹിച്ചാണ് ഓടുന്നതെന്നും പല ബസിലും യാത്രക്കാര്‍ വിരലിലെണ്ണാവുന്നവര്‍ മാത്രമാണെന്നും ബസുടമ സംഘടനയുടെ പ്രതിനിധികള്‍ പറയുന്നു. സര്‍വിസുകള്‍ പ്രതിസന്ധിയിലായതോടെ ആയിരക്കണക്കിന് ജീവനക്കാരുടെ ഉപജീവനമാര്‍ഗവുമില്ലാതായി.

അതേസമയം കോവിഡ് ഭീതിയില്‍ ആളുകള്‍ യാത്ര ഒഴിവാക്കുന്നതിനാല്‍ ട്രെയിനുകള്‍ റദ്ദാക്കുന്നു. കേരളത്തില്‍നിന്ന് 20 മുതല്‍ ഏപ്രില്‍ ഒന്നു വരെ ചെന്നൈയിലേക്കും തിരിച്ചുമുള്ള പ്രതിവാര, സ്‌പെഷല്‍ ട്രെയിനുകള്‍ റദ്ദാക്കി. എറണാകുളത്തുനിന്ന് വേളാങ്കണ്ണിയിലേക്ക് 21നും 22ന് തിരിച്ചുമുള്ള സര്‍വിസും റദ്ദാക്കി. സെന്‍ട്രല്‍ റെയില്‍വേ ചൊവ്വാഴ്ച 23ഉം വെസ്‌റ്റേണ്‍ റെയില്‍വേ അഞ്ചു ട്രെയിനും റദ്ദാക്കി. റദ്ദാക്കിയ തീരുമാനം വ്യാഴാഴ്ച പ്രാബല്യത്തിലാകും.