പ്രകൃതി ചികിത്സകന്‍ എന്ന് അവകാശപ്പെട്ടുന്ന, സോഷ്യല്‍ മീഡിയയിലൂടെ മറ്റും ഏറെ വിവാദങ്ങളുണ്ടാക്കിയിട്ടുള്ള മോഹനന്‍ വൈദ്യരെ അധികൃതര്‍ തടഞ്ഞുവച്ചിരിക്കുന്നവെന്ന വാര്‍ത്തകളാണ് ഇപ്പോള്‍ പുറത്ത് വരുന്നത്. 'കൊറോണ' അടക്കം ഏതു രോഗത്തിനും ചികിത്സിക്കാമെന്ന വാഗ്ദാനവുമായി തൃശൂര്‍ പട്ടിക്കാടുള്ള ഉഴിച്ചില്‍ കേന്ദ്രത്തില്‍ എത്തിയപ്പോഴായിരുന്നു മോഹനന്‍ വൈദ്യരെ ആരോഗ്യ വകുപ്പും പൊലീസും ചേര്‍ന്ന് തടഞ്ഞത്. ചികിത്സിക്കാനെത്തിയതല്ല, ആയുര്‍വേദ ഡോക്ടര്‍മാരുടെ ക്ഷണം സ്വീകരിച്ച് ഉപദേശം നല്‍കാന്‍ എത്തിയതാണെന്നു മോഹനന്‍ വൈദ്യരുടെ വാദം. അതേസമയം, ഇയാള്‍ നേരിട്ടു ചികിത്സ നടത്തിയിട്ടില്ലെന്നതിനാല്‍ ഇതുവരെ അറസ്റ്റ് ചെയ്തിട്ടില്ല. സംഭഴത്തില്‍ ഡിഎംഒയുടെ നേതൃത്വത്തില്‍ ആരോഗ്യവകുപ്പു സംഘവും എസിപിയുടെ നേതൃത്വത്തില്‍ പൊലീസ് സംഘവും മോഹനന്‍ വൈദ്യരെ ചോദ്യംചെയ്യുകയാണ്.

കഴിഞ്ഞയാഴ്ച, കൊറോണ വൈറസ് ബാധയില്‍ സമൂഹ മാധ്യമങ്ങളിലൂടെ വ്യാജ പ്രചരണങ്ങള്‍ നടത്തിയതിന് ജേക്കബ് വടക്കഞ്ചേരിക്കെതിരെയും കേസ് എടുത്തിരുന്നു. കൊവിഡ് 19 വൈറസുമായി ബന്ധപ്പെട്ട് യാതൊരു അസുഖങ്ങളുമില്ലെന്നും സര്‍ക്കാര്‍ മനപ്പൂര്‍വം പ്രശ്നങ്ങള്‍ സൃഷ്ടിക്കുകയാണെന്നും വിവരിച്ച് സമൂബ മാ്ധ്യമങ്ങളില്‍ വീഡിയോ പ്രചരിപ്പിച്ചതിനാണ് സ്വയം പ്രഖ്യാപിത ചികിത്സകനായ ജേക്കബ് വടക്കഞ്ചേരിക്കെതിരെ കേസെടുത്തത്. കൊറോണ വൈറസ് ഉണ്ടെന്ന് തെളിയിക്കാന്‍ വെല്ലുവിളിച്ചായിരുന്നു പ്രകൃതിചികിത്സകന്‍ എന്നവകാശപ്പെടുന്ന ജേക്കബ് വടക്കഞ്ചേരിയുടെ വീഡിയോ സന്ദേശം. കാറോണ എന്നൊരു വൈറസ് നിലവിലില്ല. ആരോഗ്യമേഖലയ്ക്ക് കൂടുതല്‍ ശ്രദ്ധ കിട്ടുന്നതിനു വേണ്ടിയാണ് ഇങ്ങനെയൊരു വൈറസ് ഉണ്ടെന്ന് പ്രചരിപ്പിക്കുന്നത്. ഇത്തരത്തില്‍ എന്തെങ്കിലും അടിയന്തരസാഹചര്യം ഉണ്ടെന്ന് കാണിച്ചാല്‍ മാത്രമേ ആരോഗ്യമേഖലയ്ക്ക് ശ്രദ്ധ കിട്ടുകയുള്ളൂ. അതിനു വേണ്ടിയുണ്ടാക്കിയ കള്ളക്കഥയാണ് കൊറോണ വൈറസ് എന്നാണ് ജേക്കബ് വടക്കഞ്ചേരിയുടെ വാദം. സമാനമായ രീതിയില്‍ നിപ കാലത്തും അങ്ങനെയൊരു വൈറസ് ഇല്ലായെന്ന് പ്രചരിപ്പിച്ചതിന് ജേക്കബ് വടക്കഞ്ചേരിക്ക് എതിരെ കേസെടുത്തിരുന്നു.

കോറൊണ വ്യാപനത്തിനെതിരേ സംസ്ഥാനത്ത് ആരോഗ്യവകുപ്പ് സാധ്യമായ എല്ലാ സംവിധാനങ്ങളും ഉപയോഗിച്ച് പ്രവര്‍ത്തനം നടത്തുന്നതിനിടെയാണ് മോഹനന്‍ വൈദ്യര്‍, ജേക്കബ് വടക്കഞ്ചേരി തുടങ്ങിയവര്‍ സമൂഹ മാധ്യമങ്ങളിലൂടെയും മറ്റും തെറ്റിദ്ധാരണ പരത്താന്‍ ശ്രമിക്കുന്നത്. മുഖ്യധാര ചികിത്സാ രീതികളില്‍ നിന്ന് ജനങ്ങളെ വഴിതിരിച്ചുവിടുന്നവര്‍ ഇത്തരത്തിലുള്ള വ്യാജ പ്രചാരണം നടത്തിയാല്‍ കര്‍ശന നടപടിയുണ്ടാകുമെന്ന് അധികൃതര്‍ നേരത്തെ വ്യക്തമാക്കിയിരുന്നു. ഇത്തരം വ്യാജ ചികിത്സകര്‍ നടത്തുന്ന പ്രചാരണങ്ങളില്‍ വീണുപോകരുത് എന്നും സര്‍ക്കാരിന്റേയും ആരോഗ്യ വകുപ്പിന്റെയും മാര്‍ഗനിര്‍ദ്ദേശങ്ങള്‍ക്ക് അനുസരിച്ച് മുന്നോട്ട് പോകണമെന്നും ആരോഗ്യ മന്ത്രി അഭ്യര്‍ത്ഥിച്ചിരുന്നു. ശാസ്ത്രത്തെയും ആധുനിക വിജ്ഞാനത്തെയും ചോദ്യം ചെയ്ത് ഇരുവരും തെറ്റിദ്ധാരണ പരത്തുകയാണെന്ന് ചൂണ്ടിക്കാണിച്ച് ഡോക്ടര്‍മാര്‍ സാമൂഹ്യമാധ്യമങ്ങളിലൂടെ രംഗത്തെത്തി. സാമനമായ രീതിയില്‍ കോറോണ വൈറസ് വ്യാപനുവുമായി ബന്ധപ്പെട്ട് സമൂഹത്തില്‍ ആശങ്ക വിതയ്ക്കുന്ന തരത്തിലുള്ള സന്ദേശങ്ങള്‍ നവമാധ്യമങ്ങള്‍ വഴി പ്രചരിപ്പിച്ചവര്‍ക്കെതിരേയും നിരവധി കേസുകള്‍ ഇതിനോടകം പൊലീസ് രജിസറ്റര്‍ ചെയ്തിട്ടുണ്ട്.