കഴിഞ്ഞ ദിവസമാണ് സംഭവം. മദ്യപിച്ചെത്തി വഴക്കുണ്ടാക്കുന്നത് പതിവാക്കിയതിന് അച്ഛന്‍ മകനെ കൊലപ്പെടുത്തി. തലയില്‍ കരിങ്കല്ലിട്ടു കൊലപ്പെടുത്തിയ പിതാവ് പൊലീസില്‍ കീഴടങ്ങി. മുരുകേശന്‍ (33) എന്ന യുവാവാണ് കൊല്ലപ്പെട്ടത്.

പിതാവ് ജ്യോതി (60) കൊഴിഞ്ഞാമ്ബാറ പൊലീസ് സ്റ്റേഷനിലെത്തി കീഴടങ്ങിയത്. ഇന്നലെ രാവിലെ ആറ് മണിയോടെയാണ് കൊലപാതകം നടന്നത്. പ്രമേഹം ബാധിച്ച്‌ ഇരു കാല്‍പാദങ്ങളും മുറിച്ചുമാറ്റിയ ജ്യോതി വര്‍ഷങ്ങളായി സ്കൂട്ടറില്‍ ലോട്ടറി ടിക്കറ്റ് വിറ്റാണു കുടുംബം നോക്കിയിരുന്നത്.

കൂലിപ്പണിക്കു പോകുന്ന മുരുകേശന്‍ രാത്രിയില്‍ മദ്യപിച്ചെത്തി വീട്ടില്‍ വഴക്കുണ്ടാക്കുന്നതു പതിവാണെന്നും തന്നെയും ഭാര്യയെയും കൊല്ലുമെന്ന മകന്റെ ഭീഷണി മൂലമാണ് താന്‍ കൊല നടത്തിയതെന്ന് ജ്യോതി പൊലീസിനു മൊഴി നല്‍കി. കഴിഞ്ഞ ദിവസം രാത്രിയും മദ്യപിച്ചെത്തി ബഹളമുണ്ടാക്കിയ മുരുകേശന്‍ അമ്മ വീരമ്മാളിനെ മര്‍ദിച്ചു.

രാവിലെ എഴുന്നേറ്റപ്പോള്‍ വീടിനു പുറത്തു കിടന്നുറങ്ങുകയായിരുന്ന മുരുകേശനെ കരിങ്കല്ല് തലയിലിട്ടു ജ്യോതി കൊലപ്പെടുത്തി. തുടര്‍ന്ന് ഇയാള്‍ പൊലീസ് സ്റ്റേഷനിലെത്തി കീഴടങ്ങി. മദ്യപിച്ച്‌ വഴക്കുണ്ടാക്കുന്നതു പതിവായതോടെ മുരുകേശന്റെ ഭാര്യ മാസങ്ങള്‍ക്ക് മുന്‍പു സ്വന്തം വീട്ടിലേക്കു പോയിരുന്നു. ഇവര്‍ക്ക് രണ്ട് മക്കളുണ്ട്.