വിദേശ വിനോദ സഞ്ചാരികളോട് മോശമായി പെരുമാറരുതെന്ന നിർദേശവുമായി മുഖ്യമന്ത്രി പിണറായി വിജയന്‍. സംസ്ഥാനത്ത് പലസ്ഥലത്തും അവർക്കെതിരെ മോശമായ പെരുമാറ്റം ഉണ്ടാകുന്നു. ഇതൊരിക്കലും അംഗീകരിക്കാനാവില്ല എന്നദ്ദേഹം വ്യക്തമാക്കി. രോഗപ്രതിരോധത്തിന് വേണ്ടി ആരും നിയമം കയ്യിലെടുക്കരുതെന്നും മുഖ്യമന്ത്രി പറഞ്ഞു. കഴിഞ്ഞ ദിവസം ഫ്രാന്‍സില്‍ നിന്നും ഇറ്റലിയില്‍ നിന്നും വന്ന രണ്ടുപേര്‍ക്ക് വടക്കന്‍ കേരളത്തില്‍ ഒരു സ്ഥലത്തും താമസിക്കാന്‍ സ്ഥലം കിട്ടിയില്ല. കഴിക്കാന്‍ ഭക്ഷണം പോലുമില്ലാത്ത അവസ്ഥയായിരുന്നു. രണ്ട് ദിവസമായിരുന്നു അവര്‍ കഷ്ടപ്പെട്ടതെന്നും അദ്ദേഹം വ്യക്തമാക്കി. മറ്റൊരു വിദേശസഞ്ചാരിയെ ആളുകള്‍ ചേര്‍ന്ന് ബസില്‍ നിന്നും ഇറക്കിവിട്ട സാഹചര്യം ഉണ്ടായി. മറ്റൊരു യുവതിക്കും കുഞ്ഞിനും ഭക്ഷണം കിട്ടാതെ അലയേണ്ടിവന്നു. കുട്ടികള്‍ ഉള്‍പ്പെടെയുള്ള മറ്റൊരു റഷ്യന്‍ കുടുംബത്തിന് താമസിക്കാന്‍ മുറി കിട്ടിയില്ല.

നാണംകെട്ട പരിപാടിയാണ് ഇതെന്നും . ഇത്തരം രീതികള്‍ നമ്മുടെ നാടിന് ചേര്‍ന്ന പണിയല്ലെന്ന് മനസ്സിലാക്കണമെന്നും അദ്ദേഹം പറഞ്ഞു.ഇങ്ങനെ ചെയ്താൽ എല്ലാത്തിനും അവസാനമാകുന്നില്ല. രോഗത്തെ പ്രതിരോധിക്കാനാണ് നമ്മള്‍ ശ്രമിക്കുന്നത്. അതിജീവിച്ചെന്ന നാട് എന്ന നിലയില്‍ സംസ്ഥാനത്തെ എത്തിക്കേണ്ടതുണ്ട്. വിദേശസഞ്ചാരികള്‍ക്ക് മോശം അനുഭവം ഉണ്ടാവുന്നത് തുടര്‍ന്നാല്‍ അത് കേരളത്തെക്കുറിച്ച്‌ മോശം അഭിപ്രായം ഉണ്ടാക്കുമെന്നും അദ്ദേഹം വ്യക്തമാക്കി . കേരളത്തിന്റെ പ്രതിച്ഛായയെ ഈ കാര്യം ബാധിക്കും. മനുഷ്യത്വത്തെ ഹനിക്കുന്ന നടപടികള്‍ കേരളത്തിലെ ജനങ്ങളുടെ ഭാഗത്ത് നിന്നും ഉണ്ടാവരുത്. വിനോദസഞ്ചാരമേഖലയെ ഇത് ഗുരുതരമായി ബാധിക്കും. അതിനാല്‍ ടൂറിസ്റ്റുകള്‍ക്കെതിരെ മോശം ഇടപെടല്‍ ഉണ്ടാകരുതെന്നും ഇത്തരം സംഭവങ്ങള്‍ക്കെതിരെ ശക്തമായ നടപടി എടുക്കുമെന്നും മുഖ്യമന്ത്രി പറഞ്ഞു.