സംസ്ഥാനത്ത് മാസ്ക്, സാനിറ്റൈസർ എന്നിവയുടെ വില നിശ്ചയിച്ചു സർക്കാർ സർക്കുലർ ഇറക്കണമെന്ന ഉത്തരവുമായി ഹൈക്കോടതി . കേന്ദ്രസർക്കാർ അവശ്യ സാധന പട്ടികയിൽ ഇവയെ ഉൾപ്പെടുത്തിയതു കണക്കിലെടുത്ത് ചില്ലറ വിൽപന വില (എംആർപി) നിശ്ചയിക്കണമെന്നും നിർദേശം. അതേ സമയം മാസ്കിനും സാനിറ്റൈസറിനും കൃത്രിമ ക്ഷാമം സൃഷ്ടിച്ചു വില കൂട്ടി വിൽക്കാൻ ശ്രമം ഉണ്ടായാൽ ശക്തമായ നടപടിയെടുക്കണമെന്നും നിർദേശമുണ്ട് .

രോഗപ്രതിരോധം സംബന്ധിച്ച മാർഗനിർദേശങ്ങൾ മാധ്യമങ്ങളിലൂടെ പ്രചരിപ്പിക്കണം. അഭിഭാഷകരുടെ സന്നദ്ധ സംഘടനയായ ‘ജസ്റ്റിസ് ബ്രിഗേഡ്’ ഹർജി നൽകിയിരുന്നു . ഇത് തീർപ്പാക്കിയാണു ചീഫ് ജസ്റ്റിസുൾപ്പെട്ട ഡിവിഷൻ ബെഞ്ചിന്റെ നിർദേശങ്ങൾ . എന്നാൽ രോഗവ്യാപനം തടയാൻ പൊതുസ്ഥലങ്ങൾ അടയ്ക്കണമെന്ന് ഈ അവസരത്തിൽ ഉത്തരവിടാൻ കഴിയില്ല. എല്ലാവരാലും സ്വയം നിയന്ത്രണം സ്വീകരിക്കണമെന്നും കോടതി പറഞ്ഞു. കോവിഡ് വ്യാപനം തടയാൻ സർക്കാർ ആവശ്യമായ മുൻകരുതൽ നടപടികളെടുക്കുന്നുണ്ടെന്നു സ്റ്റേറ്റ് അറ്റോർണി കെ. വി. സോഹൻ അറിയിച്ചു.