പ്രളയ ദുരിതാശ്വാസ ഫണ്ട് തട്ടിപ്പ് കേസിൽ പ്രതിയായ സക്കീർ ഹുസൈനെ പാർട്ടിയിൽ നിന്നും പുറത്താക്കാനുള്ള സാക്ഷാൽ പിണറായി വിജയന്റെ ശ്രമം പാളി. സി പി എം കളമശേരി ഏരിയാ സെക്രട്ടറിയായ സക്കീർ ഹുസൈനെ തൽസ്ഥാനത്ത് നിന്നും നീക്കി സി എം ദിനേശ് മണിയെ നിയമിക്കാനുള്ള നീക്കമാണ് പാളിയത്.

തിങ്കളാഴ്ച ചേർന്ന ജില്ലാ സെക്രട്ടേറിയറ്റ് യോഗത്തിൽ സക്കീർ ഹുസൈന്റെ പ്രവർത്തനങ്ങളെ കുറിച്ച് അന്വേഷിക്കാൻ പാർട്ടി കമ്മീഷനെ നിയോഗിച്ചതു മാത്രമാണ് പിണറായിയെ കൊണ്ട് സാധ്യമായ ഏക കാര്യം. പി.എം. ഇസ്മായിൽ, പി.ആർ. മുരളീധരൻ എന്നിവർ അടങ്ങിയ കമ്മറ്റിയെയാണ് അന്വേഷണ ചുമതല ഏൽപ്പിച്ചത്. ഒരാഴ്ചക്കുള്ളിൽ റിപ്പോർട്ട് നൽകണമെന്നാണ് നിർദ്ദേശം. റിപ്പോർട്ട് കിട്ടിയാലുടൻ സക്കീർ ഹുസൈനെ പുറത്താക്കുമെന്നാണ് ജില്ലയിലെ സി പി എം നേതാക്കൾ പറയുന്നത്. ഇക്കാര്യത്തിൽ പിണറായിക്ക് വ്യക്തിപരമായ താത്പര്യമുണ്ട്.

പാർട്ടിക്ക് നിരന്തരം പേരുദോഷം കേൾപ്പിക്കുന്ന സക്കീർ ഹുസൈനെതിരെ നടപടി വേണമെന്ന് ജില്ലാ സെക്രട്ടറിസി എൻ. മോഹനൻ ഉൾപ്പെടെയുള്ളവർ ആവശ്യപ്പെട്ടെങ്കിലും പി രാജീവ് പക്ഷത്തിന്റെ ശക്തമായ ചെറുത്തുനിൽപ്പ് കാരണം യാതൊരു നടപടികളും സ്വീകരിക്കാനായില്ല. അന്വേഷണ കമ്മീഷനെ വയ്ക്കാൻ തീരുമാനിച്ചത് മാത്രമാണ് പിണറായി പക്ഷത്തിന്റെ ഏക നേട്ടം.

സി പി എം പ്രവർത്തകനായ സിയാദ് വാഴക്കാലയുടെ ആത്മഹത്യാ കുറിപ്പിൽ സക്കീറിന്റെ പേര് പരാമർശിച്ചിട്ടുണ്ട്. സക്കീറിനെതിരായ ആരോപണങ്ങൾ അന്വേഷിക്കണമെന്ന് മുതിർന്ന സി പി എം നേതാവ് എം എം ലോറൻസ് ആവശ്യപ്പെട്ടു. നേരത്തെ വ്യവസായിയെ തട്ടി കൊണ്ടുപോയി ഭീഷണിപ്പെടുത്തിയ കേസിൽ സക്കീറിനെ പാർട്ടി ചുമതലകളിൽ നിന്ന് ഒഴിവാക്കിയിരുന്നു. എന്നാൽ എളമരം കരീമിന്റെ അന്വേഷണ റിപ്പോർട്ടിനെ തുടർന്ന് സക്കീറിനെ തിരിച്ചെടുത്തു. അന്ന് പാർട്ടി ജില്ലാ സെക്രട്ടറിയായിരുന്ന പി. രാജീവാണ് സക്കീറിനെ സഹായിച്ചത്. രാജീവാണ് എളമരം കരീം വഴി സക്കീറിനെ സഹായിച്ചത്.

സക്കീറിന്റെ തലയിൽ ചാരി പ്രളയ ദുരിതാശ്വാസ തട്ടിപ്പ് ഒതുക്കാനാണ് സി പി എം ശ്രമിക്കുന്നത്. കൊറോണയുടെ മറവിൽ കേസ് ഒരുക്കാൻ സാധിക്കുമെന്ന പ്രതീക്ഷയിലാണ് പാർട്ടി മുന്നോട്ടുപോകുന്നത്. ഫണ്ടിൽ നിന്നും 335 ലേറെ തെറ്റായ അക്കൗണ്ടിലേക്ക് അടച്ച 81.5 കോടി രൂപ തിരിച്ചുവന്നു. ഈ തുകയിലാണ് ക്രമക്കേട് നടന്നത്. 120 ലക്ഷം ബാങ്ക് അക്കൗണ്ടുകൾ ക്രൈംബ്രാഞ്ചിന് പരിശോധിക്കേണ്ടതുണ്ട്. എന്നാൽ അതിനുള്ള സൗകര്യം ക്രൈംബ്രാഞ്ചിനില്ല. 2019 ജനുവരി മുതൽ ഒരു വർഷം നീണ്ടു നിന്ന തട്ടിപ്പാണ് ഇത് . അർഹതപ്പെട്ട പലരും പ്രളയ ദുരിതാശ്വാസം ലഭിക്കാതെ ബുദ്ധിമുട്ടുമ്പോഴാണ് സി പി എം നേതാക്കൾ കോടികൾ തട്ടിയത്.

ക്രൈംബ്രാഞ്ചിന് കേസന്വേഷണം കൈമാറിയത് ടോമിൻ ജെ തച്ചങ്കരിയെ മുൻകണ്ടാണ്. പിണറായിക്ക് ആവശ്യമുള്ള കേസുകൾ അദ്ദേഹത്തിന്റെ രീതിക്ക് തച്ചങ്കരി അന്വേഷിക്കും. എന്തുവന്നാലും സക്കീർ ഹുസൈനെ അകത്താക്കാനുള്ള നീക്കമാണ് നടക്കുന്നത്.