വയോധികയെ കബളിപ്പിച്ച് ആഭരണങ്ങളും പണവും മൊബൈലും തട്ടിയെടുത്ത യുവതി പിടിയില്‍
ആറരപ്പവന്റെ ആഭരണങ്ങളും പണവും മൊബൈലും വയോധികയെ കബളിപ്പിച്ച് തട്ടിയെടുത്ത കേസില്‍ യുവതി കിളികൊല്ലൂര്‍ പൊലീസിന്റെ പിടിയിലായി. ചാത്തിനാംകുളം സ്വദേശിനിയെ കബളിപ്പിച്ചു മോഷണം നടത്തിയ കേസില്‍ ശാസ്താംകോട്ട പള്ളിശ്ശേരിക്കല്‍ അശ്വനി ഭവനില്‍ ഷീജ (അമ്പിളി-40) ആണ് പിടിയിലായത്.
വയോധികയുമായി ഓച്ചിറ ക്ഷേത്രത്തില്‍ വച്ചു പരിചയത്തിലായ ഷീജ സ്‌കൂട്ടറില്‍ ഇവരുടെ ചാത്തിനാംകുളത്തെ വീട്ടില്‍ എത്തി. പിന്നീട് ഇരുവരും സ്‌കൂട്ടറില്‍ കൊല്ലം ഭാഗത്തേക്കു പോകുന്നതിനിടെ വയോധികയുടെ ബാഗ് സുരക്ഷിതമായി സൂക്ഷിക്കാമെന്നു പറഞ്ഞു വാങ്ങിച്ച് സ്‌കൂട്ടറിന്റെ ബോക്‌സില്‍ വച്ചു. കല്ലുതാഴത്ത് എത്തിയപ്പോള്‍ വയോധികയോട് വാഹനത്തില്‍ നിന്ന് ഇറങ്ങാന്‍ ആവശ്യപ്പെട്ടു. ഇവര്‍ ഇറങ്ങിയ ഉടന്‍ പ്രതി വണ്ടി വിട്ടുപോകയായിരുന്നു.
കിളികൊല്ലൂര്‍ പൊലീസ് സിസിടിവി ദൃശ്യങ്ങളും മൊബൈലും കേന്ദ്രീകരിച്ചു നടത്തിയ അന്വേഷണത്തിലാണ് പ്രതി പിടിയിലായത്. 1,81,000 രൂപയ്ക്കു കരുനാഗപ്പള്ളിയിലെ ജ്വല്ലറിയില്‍ വിറ്റ ആഭരണങ്ങള്‍ പൊലീസ് കണ്ടെടുത്തു. കിളികൊല്ലൂര്‍ സിഐ ആര്‍.എസ്.ബിജുവിന്റെ നേതൃത്വത്തില്‍ എസ്‌ഐമാരായ ശ്യാം കുമാര്‍, നാസര്‍, ഉദ്യോഗസ്ഥരായ പ്രകാശ് ചന്ദ്രന്‍, താഹ കോയ, ജയന്‍.കെ.സക്കറിയ, ഡെല്‍ഫില്‍ പി.ബോണിഫോസ്, സാബു എന്നിവരടങ്ങിയ സംഘം പിടികൂടിയ പ്രതിയെ റിമാന്‍ഡ് ചെയ്തു.
https://www.facebook.com/Malayalivartha
