കൊറോണ വൈറസിന്റെ വ്യാപനം ലോകം ഭീതിയോടെയാണ് ഉറ്റുനോക്കുന്നത്. കൊറോണ വ്യാപനം തടയുന്നതിനായി പൊതുയിടങ്ങളിൽ തുപ്പരുതെന്ന കർശന നിർദ്ദേശം ആരോഗ്യവകുപ്പ് നൽകിയിട്ടുണ്ട്. എന്നാൽ നിർദ്ദേശം മറികടന്ന് പൊതുസ്ഥലങ്ങളില്‍ തുപ്പിയതിന് മൂന്ന് പേരില്‍ നിന്ന് ആയിരം രൂപ പിഴ ഈടാക്കിയിരിക്കുകയാണ് നാസിക് മുന്‍സിപ്പല്‍ കോര്‍പ്പറേഷന്‍. സംസ്ഥാനത്ത് കൊറോണ വൈറസ് വ്യാപനത്തിന്റെ പശ്ചാത്തലത്തില്‍ പൊതുസ്ഥലങ്ങളില്‍ തുപ്പരുതെന്ന് കോര്‍പ്പറേഷന്‍ നിര്‍ദേശം നല്‍കിയിരുന്നു. ഇത് ലംഘിച്ചതിനാണ് പിഴ ഈടാക്കിയത്.

കോര്‍പ്പറേഷന്‍ ഉദ്യോഗസ്ഥര്‍ നടത്തിയ പരിശോധനയിലാണ് മൂന്ന് പേര്‍ പൊതുസ്ഥലങ്ങളില്‍ തുപ്പുന്നത് കണ്ടത്. ഇവരില്‍ നിന്ന് ആയിരം രൂപ വീതം പിഴ ഈടാക്കിയതായി ഉദ്യോഗസ്ഥര്‍ പറഞ്ഞു. വരും ദിവസങ്ങളില്‍ മാര്‍ക്കറ്റ്, ബസ് സ്റ്റാന്റ്, തിരക്കേറിയ സ്ഥലങ്ങള്‍ എന്നിവിടങ്ങളില്‍ കൂടുതല്‍ ഉദ്യോഗസ്ഥരെ വിന്യസിക്കും. നിയമം ലംഘിക്കുന്നവരില്‍ നിന്ന് ആയിരം രൂപ ഈടാക്കുമെന്ന് കോര്‍പ്പറേഷന്‍ അധികൃതര്‍ അറിയിച്ചു.
ഇതുകൂടാതെ നഗരത്തിലെ ബോക്‌സ് ക്രിക്കറ്റ് വേദികള്‍ അടച്ചിടാനും നഗരസഭ തീരുമാനിച്ചു. ഇത് ലംഘിക്കുന്നവരില്‍ നിന്ന് 5000 രൂപ ഈടാക്കുമെന്ന് അധികൃതര്‍ അറിയിച്ചു.

കഴിഞ്ഞ ദിവസം വാഹനമോടിച്ചുപോകവെ പൊതുസ്ഥലത്ത് തുമ്മിയതിന് യുവാവിനെ ആള്‍ക്കൂട്ടം മര്‍ദ്ദിച്ചിരുന്നു. വ്യാഴാഴ്ച വൈകിട്ട് കോലാപൂര്‍ നഗരത്തിനടുത്ത് ഗുജാരിയിലായിരുന്നു സംഭവം. ബൈക്കില്‍ പോകുന്ന വ്യക്തി തൂവാല ഉപയോഗിച്ച്‌ മുഖം മറക്കാതെ തുമ്മിയെന്ന് പറഞ്ഞ് മറ്റൊരു ബൈക്കിലെത്തിയവര്‍ ചോദ്യം ചെയ്യുകയായിരുന്നു. തുടര്‍ന്ന് എത്തിയ ആള്‍ക്കൂട്ടം ഇയാളെ മര്‍ദ്ദിക്കുകയായിരുന്നു. മഹാരാഷ്ട്രയില്‍ 52പേര്‍ക്കാണ് ഇതുവരെ രോഗം സ്ഥിരീകരിച്ചത്. ഇത് ആളുകളില്‍ പരിഭ്രാന്തി പരത്തിയിട്ടുണ്ട്.

അതേസമയം കൊറോണ വൈറസ് മഹാമാരിയില്‍ ഇന്ത്യയില്‍ ഒരു മരണം കൂടി റിപ്പോർട്ട് ചെയ്തു. രാജസ്ഥാനില്‍ ഇറ്റാലിയന്‍ പൗരനായ 69-കാരന്‍ മരിച്ചതാണ് പുതുതായി റിപ്പോര്‍ട്ട് ചെയ്തിരിക്കുന്നത്. ഇതോടെ രാജ്യത്ത് മരിച്ചവരുടെ എണ്ണം അഞ്ചായി.ജയ്പൂരിലെ ഫോര്‍ടിസ് ആശുപത്രിയില്‍ ചികിത്സയിലായിരുന്ന ആന്‍ഡ്രി കാര്‍ളിയാണ് മരിച്ചത്. ഇയാള്‍ ടൂറിസ്റ്റ് വിസയിലാണ് ഇന്ത്യയിലെത്തിയത്.