ദുരൂഹ സാഹചര്യത്തില്‍ എരുമേലി മുക്കൂട്ടുതറയില്‍നിന്നും കാണാതായ ജെസ്നയെ പറ്റിയുള്ള കേസ്​ നിര്‍ണായക വഴിത്തിരിവിലേക്കെന്ന് സൂചന. കേസ്​ അന്വേഷണം ഇപ്പോള്‍ ക്രൈംബ്രാഞ്ചാണ്​ നടത്തുന്നത്​. നിര്‍ണായക വിവരങ്ങള്‍ ക്രൈംബ്രാഞ്ചിന് ലഭിച്ചുവെന്ന് ക്രൈംബ്രാഞ്ച് എ.ഡി.ജി.പി ടോമിന്‍ ജെ. തച്ചങ്കരി വ്യക്തമാക്കി.

പത്തനംതിട്ട എസ്​.പി കെ.ജി. സൈമണി​​െന്‍റ നേതൃത്വത്തിലാണ്​ അന്വേഷണം നടക്കുന്നത്​. അന്വേഷണം നിര്‍ണായക ഘട്ടത്തിലാണെന്നും ചില പുതിയ വിവരങ്ങള്‍ ലഭിച്ചിട്ടുണ്ടെന്നും കെ.ജി. സൈമണും സൂചിപ്പിച്ചു. എന്നാല്‍, കൂടുതല്‍ വിവരങ്ങള്‍ പറഞ്ഞാല്‍ തിരോധാനത്തിന് പിന്നിലുള്ളവര്‍ ജാഗരൂകരാകുമെന്നും അതിനാലാണ്​ വിവരങ്ങള്‍ വെളിപ്പെടുത്താത്തതെന്നും ടോമിന്‍ തച്ചങ്കരി കൊച്ചിയില്‍ പറഞ്ഞു.

ലോക് ഡൗണായതിനാല്‍ കേസ്​ അന്വേഷണം അതിവേഗം നടത്തുന്നതിന്​ തടസ്സങ്ങളുണ്ട്​. 2018 മാര്‍ച്ച്‌ 20നാണ്​ ​ എരുമേലി മുക്കൂട്ടുതറയിലെ വീട്ടില്‍നിന്ന് പിതൃസഹോദരിയുടെ വീട്ടിലേക്കെന്ന് പറഞ്ഞ്​ ജസ്ന മരിയ പോയത്​.