മാവോവാദി ബന്ധം ആരോപിച്ച് അറസ്റ്റിലായ അലന്‍ ഷുഹൈബിനും താഹ ഫസലിനുമെതിരായ കുറ്റപത്രം എന്‍ഐഎ കോടതിയില്‍ സമര്‍പ്പിച്ചു. എറണാകുളത്തെ പ്രത്യേക എന്‍.ഐ.എ കോടതിയിലാണ് കുറ്റപത്രം സമര്‍പ്പിച്ചത്. മാവോയിസ്റ്റ് ലഘുലേഖകള്‍ വിതരണം ചെയ്തുവെന്നാരോപിച്ച് കോഴിക്കോടുവെച്ച് 2019 നവംബറിലാണ് ഇരുവരെയും അറസ്റ്റ് ചെയ്തത്. സി.പി ഉസ്മാനെയും(40) കുറ്റപത്രത്തില്‍ പ്രതി ചേര്‍ത്തിട്ടുണ്ട്. ഇയാള്‍ ഇപ്പോഴും ഒളിവിലാണ്.

പന്തീരങ്കാവ് പോലീസാണ് അലനെയും താഹയെയും അറസ്റ്റ് ചെയ്തത്. ഇരുവരുടയും അറസ്റ്റിന് ശേഷം ആറ് മാസം പൂര്‍ത്തിയാകുമ്പോഴാണ് കുറ്റപത്രം സമര്‍പ്പിക്കുന്നത്.ആദ്യം ലോക്കല്‍ പോലീസ് അന്വേഷിച്ച കേസ് പിന്നീട് എന്‍.എ.എയ്ക്ക് കൈമാറുകയായിരുന്നു. ഗൂഢാലോചന, നിയമവിരുദ്ധ പ്രവര്‍ത്തനം, നിരോധിത സംഘടയില്‍ പ്രവര്‍ത്തിച്ചു എന്നീ കുറ്റങ്ങള്‍ ചുമത്തിയാണ് മൂവര്‍ക്കുമെതിരെ കുറ്റപത്രം സമര്‍പ്പിച്ചിരിക്കുന്നത്.