കേന്ദ്രീയ വിദ്യാലയത്തില്‍ ലോക്ഡൗണിനിടയില്‍ വാട്‌സാപ്പിലൂടെ നടത്തിയ പരീക്ഷ എഴുതിയത് 60% കുട്ടികള്‍ മാത്രം. പരീക്ഷ എഴുതാന്‍ സാധിച്ചിട്ടില്ലാത്ത 40 ശതമാനത്തോളം കുട്ടികള്‍ക്കായി പ്രത്യേകം പരീക്ഷ നടത്തില്ല.സ്‌കൂളില്‍ റജിസ്റ്റര്‍ ചെയ്ത രക്ഷിതാക്കളുടെ മൊബൈല്‍ കയ്യില്‍ ഇല്ലാതെയും വേഗമുള്ള ഇന്റര്‍നെറ്റ് കണക്ഷന്‍ ലഭിക്കാതെയും വന്നതിനാലാണ് 40 ശതമാനത്തോളം കുട്ടികള്‍ക്ക് പരീക്ഷ എഴുതാന്‍ കഴിയാത്തത് എന്ന് അധികൃതര്‍ തന്നെ വ്യക്തമാക്കി.

ഏഴു മുതല്‍ 10 വരെ ക്ലാസുകാര്‍ക്ക് പ്രോഗ്രാം ഫോര്‍ ഇന്റര്‍നാഷനല്‍ സ്റ്റുഡന്റ് അസസ്‌മെന്റിന്റെ ഭാഗമായുള്ള പരീക്ഷയുടെ പ്രബന്ധം, റജിസ്റ്റര്‍ ചെയ്ത മൊബൈല്‍ നമ്പറില്‍ ഒന്‍പതു മണിയോടെ അയച്ചു കൊടുക്കുകയായിരുന്നു. കേന്ദ്രീയ വിദ്യാലയങ്ങളില്‍ ഓണ്‍ലൈന്‍ സംവിധാനങ്ങള്‍ നടപ്പിലാക്കാനും ആധുനികവല്‍ക്കരണത്തിനുമായി 62 കോടിയോളം അനുവദിച്ചിരിക്കെയാണ് ഒരു മുന്നൊരുക്കവുമില്ലാതെ വാട്‌സാപ്പിലൂടെ പരീക്ഷ നടത്തിയത്.

12.30നു മുന്‍പ് ഉത്തരങ്ങള്‍ വെള്ളക്കടലാസില്‍ എഴുതി ചിത്രമെടുത്ത് അധ്യാപകന്റെ വാട്‌സാപ് നമ്പറില്‍ തിരികെ അയയ്ക്കണമെന്ന നിര്‍ദേശവും
ഇതുമായി ബന്ധപ്പെട്ട ചോദ്യങ്ങളും പിന്നാലെ വന്നു. എന്നാല്‍, ജോലിയുമായി ബന്ധപ്പെട്ട് രക്ഷിതാക്കള്‍ വീട്ടില്‍ ഇല്ലാത്ത കുട്ടികള്‍ക്ക് മൊബൈല്‍ ലഭിക്കാത്തതിനാല്‍ പരീക്ഷ എഴുതാന്‍ കഴിഞ്ഞിട്ടില്ല.

ഗ്രാമ പ്രദേശങ്ങളില്‍ കണക്ടിവിറ്റി പ്രശ്‌നങ്ങള്‍ ഉള്ളതിനാല്‍ ചിലര്‍ക്ക് ഡൗണ്‍ലോഡ് ചെയ്യാന്‍ സാധിച്ചില്ല. രക്ഷിതാക്കളുടെ പരാതികള്‍ സ്‌കൂള്‍ അധികൃതരെ അറിയിച്ചിട്ടുണ്ട്. ഇരുനൂറോളം കുട്ടികളുടെ ഉത്തരക്കടലാസുകള്‍ അധ്യാപകര്‍ എങ്ങനെ ഡൗണ്‍ലോഡ് ചെയ്ത് വിലയിരുത്തുമെന്നതും ചോദ്യമായി അവശേഷിക്കുന്നു