കോവിഡിനെത്തുടര്‍ന്നുണ്ടായ സാമ്പത്തിക പ്രതിസന്ധി മറികടക്കാന്‍ ജീവനക്കാരുടെ ശമ്പളം പിടിക്കാനുള്ള തീരുമാനം സ്റ്റേ ചെയ്ത ഹൈക്കോടതി വിധിക്കെതിരെ അപ്പീല്‍ നല്‍കേണ്ടെന്ന് സര്‍ക്കാര്‍ തീരുമാനം. പകരം സാലറി കട്ടില്‍ ഓര്‍ഡിനന്‍സ് ഇറക്കാനാണ് മന്ത്രിസഭയുടെ തീരുമാനം. ഇതുവഴി ശമ്പളം മാറ്റിവെക്കാനുള്ള സര്‍ക്കാര്‍ തീരുമാനത്തിന് നിയമപ്രാബല്യം നല്‍കാനാണ് തീരുമാനമായത്.

സാമ്പത്തിക പ്രതിസന്ധി അടക്കമുള്ള ഘട്ടങ്ങളില്‍ ജീവനക്കാരുടെ ശമ്പളം മാറ്റിവെക്കാന്‍ സര്‍ക്കാരിന് അധികാരം നല്‍കുന്ന നിയമം കൊണ്ടുവരാനാണ് തീരുമാനം. ഹൈക്കോടതി വിധിക്കെതിരെ അപ്പീല്‍ നല്‍കുന്നതും, തുടര്‍ നടപടികളും കൂടുതല്‍ കാലതാമസത്തിന് ഇടയാക്കുമെന്നും സര്‍ക്കാര്‍ വിലയിരുത്തുന്നു. സര്‍ക്കാര്‍ ജീവനക്കാരുടെ മാസത്തിലെ ആറു ദിവസങ്ങളിലെ ശമ്പളം എന്ന ക്രമത്തില്‍ അഞ്ചുമാസം ശമ്പളം മാറ്റിവെക്കാനാണ് സര്‍ക്കാര്‍ തീരുമാനിച്ചിരുന്നത്. ഇതനുസരിച്ച് ഏപ്രില്‍ മുതല്‍ ആഗസ്റ്റ് വരെയുള്ള സാലറി കട്ടിനാണ് തീരുമാനിച്ചിരുന്നത്.

മന്ത്രിസഭ അന്തിമതീരുമാനമെടുത്തുകഴിഞ്ഞാല്‍ ഉടന്‍ തന്നെ ഓര്‍ഡിനന്‍സ് പുറപ്പെടുവിക്കും. ഓര്‍ഡിനന്‍സ് നിയമമാകുന്നതിന് ഗവര്‍ണര്‍ ഒപ്പിടേണ്ടതുണ്ട്. സാലറി കട്ടിനെതിരെ പ്രതിപക്ഷ സര്‍വീസ് സംഘടനകള്‍ ഹൈക്കോടതിയെ സമീപിച്ചു. ഇതേത്തുടര്‍ന്നാണ് സാലറി കട്ടിന് കോടതി താല്‍ക്കാലികമായി സ്റ്റേ ചെയ്തത്. ശമ്പളം ജീവനക്കാരുടെ അവകാശമാണെന്നായിരുന്നു കോടതി അഭിപ്രായപ്പെട്ടത്.

കോവിഡ് പശ്ചാത്തലത്തില്‍ സര്‍ക്കാര്‍, പൊതുമേഖലാ സ്ഥാപനങ്ങളിലെ ജീവനക്കാരുടെ 6 ദിവസത്തെ വീതം ശമ്പളം 5 മാസത്തേക്കു പിടിക്കാനുള്ള സര്‍ക്കാര്‍ ഉത്തരവു ഹൈക്കോടതി 2 മാസത്തേക്കു സ്റ്റേ ചെയ്തു. ശമ്പളം ഔദാര്യമല്ല, ജീവനക്കാരുടെ അവകാശമാണെന്നു കോടതി വ്യക്തമാക്കി. സര്‍ക്കാര്‍ ഉത്തരവിനു പ്രഥമദൃഷ്ട്യാ നിയമ പിന്‍ബലമില്ലെന്നു കുറ്റപ്പെടുത്തി. കേസ് മേയ് 20ലേക്കു മാറ്റി

വിവിധ വകുപ്പുകളിലെ ജീവനക്കാരും സംഘടനകളും സമര്‍പ്പിച്ച ഒരുകൂട്ടം ഹര്‍ജികള്‍ ഫയലില്‍ സ്വീകരിച്ചാണു ജസ്റ്റിസ് ബെച്ചു കുര്യന്‍ തോമസിന്റെ ഇടക്കാല ഉത്തരവ്. ശമ്പളം പിടിച്ചുവയ്ക്കുന്നതു ഭരണഘടന പൗരന് അനുവദിച്ചിട്ടുള്ള സ്വത്ത് ആര്‍ജിക്കാനുള്ള അവകാശത്തിന്റെ നിഷേധമാണെന്നു കോടതി വിലയിരുത്തി. പകര്‍ച്ചവ്യാധി തടയല്‍ നിയമത്തിന്റെയും ദുരന്ത കൈകാര്യ നിയമത്തിന്റെയും അടിസ്ഥാനത്തിലാണു നടപടിയെന്ന സര്‍ക്കാര്‍ വാദം കോടതി തള്ളി.

കോവിഡ് പടരുന്ന പശ്ചാത്തലത്തില്‍ റേഷന്‍, ഭക്ഷ്യസാമഗ്രികള്‍, സഹായധന വിതരണം എന്നിവയ്ക്കും ക്ഷേമ, സുരക്ഷാ പ്രവര്‍ത്തനങ്ങള്‍ക്കുമായി 8000 കോടി ചെലവിട്ടെന്നും ഇനിയും കോടികള്‍ വേണമെന്നും വരുമാനം നിലച്ചിരിക്കുകയാണെന്നും സര്‍ക്കാര്‍ ബോധിപ്പിച്ചു. എന്നാല്‍ ദുരന്ത കൈകാര്യ നിയമ വ്യവസ്ഥകള്‍ ദുരന്ത കാലത്തു ശമ്പളം പിടിച്ചുവയ്ക്കാനുള്ള അധികാരം സര്‍ക്കാരിനു നല്‍കുന്നില്ലെന്നു കോടതി വ്യക്തമാക്കി. മേല്‍പറഞ്ഞ 2 നിയമങ്ങളിലും സര്‍ക്കാര്‍ നടപടിക്കു ന്യായീകരണം കാണാനാകുന്നില്ലെന്നും പറഞ്ഞു.

കേരള ബാങ്ക് ജീവനക്കാരുടെ ശമ്പളം പിടിക്കുന്നതിനും സ്റ്റേ

കൊച്ചി ന്മ കേരള ബാങ്ക് ജീവനക്കാരുടെ ഒരുമാസത്തെ അടിസ്ഥാന ശമ്പളം 3 മാസം കൊണ്ട് പിടിക്കുന്നതും ഹൈക്കോടതി സ്റ്റേ ചെയ്തു. ജീവനക്കാരുടെ ഹര്‍ജികള്‍ ഫയലില്‍ സ്വീകരിച്ചാണു ജസ്റ്റിസ് ബെച്ചു കുര്യന്‍ തോമസിന്റെ ഉത്തരവ്.

സംഘടനകളുമായി ചര്‍ച്ച ചെയ്ത് ഒരു മാസത്തെ അടിസ്ഥാന ശമ്പളം നല്‍കാന്‍ തീരുമാനിച്ചെന്നും ബാങ്കിന്റെ തനതുഫണ്ടില്‍ നിന്ന് 15 കോടി രൂപ നല്‍കിയെന്നുമുള്ള കേരള ബാങ്കിന്റെ സര്‍ക്കുലറാണു ചോദ്യം ചെയ്തത്.