കേരളത്തില്‍ ഇത്തവണയും കാലവര്‍ഷം ശക്തമാകുമെന്ന് കാലാവസ്ഥാ നിരീക്ഷണ കേന്ദ്രം. കഴിഞ്ഞ വര്‍ഷത്തിന് സമാനമായോ അതില്‍ കൂടുതലോ അളവില്‍ ഇക്കുറി മഴ ലഭിക്കുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ പ്രവചനം. പ്രളയം ഉണ്ടാകുന്ന തരത്തില്‍ മഴ പെയ്തില്ലെങ്കിലും ഡാമുകള്‍ നിറയാം എന്നും കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കുന്നുണ്ട്.

ഇക്കുറി ജൂണ്‍ ഒന്നിന് തന്നെ കാലവര്‍ഷം ഉണ്ടാകും. പ്രധാന നദികള്‍ കരകവിഞ്ഞൊഴുകാന്‍ സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം അറിയിച്ചിട്ടുണ്ട്.

കേരളത്തിൽ കഴിഞ്ഞ രണ്ട് വർഷമായി കാലവർഷ മഴയുടെ തോത് കുറവാണ്. അതേസമയം, കഴിഞ്ഞ വർഷം വടക്കുകിഴക്കൻ കാലവർഷം ഇന്ത്യയിൽ ശക്തമായിരുന്നു. 30 ശതമാനം അധിക മഴയാണ് വടക്കുകിഴക്കൻ കാലവർഷത്തിൽ രാജ്യത്ത് ലഭിച്ചത്. ഒക്ടോബർ മുതൽ ഡിസംബർ വരെയാണ് വടക്കു കിഴക്കൻ കാലവർഷം.

മദ്ധ്യപൂര്‍വ്വ ശാന്തസമുദ്ര നിരപ്പിലെ ഊഷ്മാവാണ് കേരളത്തില്‍ മഴയുടെ തോത് നിര്‍ണ്ണയിക്കുന്ന മുഖ്യ ഘടകം. ഇപ്പോള്‍ അവിടെ തണുപ്പാണ്. അതിനാല്‍ മഴമേഘങ്ങള്‍ക്ക് കട്ടി കൂടും. കട്ടികൂടിയ മേഘങ്ങള്‍ പശ്ചിമഘട്ടം കടന്നു പോകില്ല. ഈ മേഘങ്ങള്‍ മഴയായി സംസ്ഥാനത്ത് പെയ്യും.

അതേസമയം സംസ്ഥാനത്ത് ഇക്കുറി വേനല്‍ മഴ പകുതി പോലും ലഭിച്ചിട്ടില്ല. മാര്‍ച്ച് ഒന്നു മുതല്‍ മെയ് 31 വരെ 379.7 മില്ലീലിറ്റര്‍ മഴയാണ് സംസ്ഥാനത്ത് കിട്ടേണ്ടത്. എന്നാല്‍ ആകെ 169.9 മില്ലീ ലിറ്റര്‍ മഴമാത്രമാണ് ഇതുവരെ ലഭിച്ചത്. അതിനാല്‍ സംസ്ഥാനത്ത് താപനില ഒന്നരമാസമായി കൂടുതല്‍ ആണ്.

പകല്‍ 35 ഡിഗ്രിക്ക് താഴെയും രാത്രി 26 ഡിഗ്രിക്ക് താഴെയും താപനില എത്തിയിട്ടില്ല. ഇത് വായു ചൂടുപിടിക്കാനും വടക്കു പടിഞ്ഞാറന്‍ കാറ്റ് വീശിയടിക്കാനും ഇടയാക്കും. ഇതും മഴക്ക് അനുകൂല ഘടകമാകുമെന്നും കാലാവസ്ഥാ വിദഗ്ധര്‍ അറിയിച്ചിട്ടുണ്ട്

രാജ്യത്ത് 70 ശതമാനം മഴയും ലഭിക്കുന്നത് തെക്ക് പടിഞ്ഞാറൻ മൺസൂണിലാണ്. രാജ്യത്ത് മൺസൂൺ സമയത്ത് ലഭിക്കുന്ന സാധാരണ തോതിലുള്ള മഴ ഇത്തവണയും ലഭിക്കുമെന്ന് കാലാവസ്ഥ നിരീക്ഷണ കേന്ദ്രം ഡയറക്‌ടർ എം.മോഹപാട്ര അറിയിച്ചു. നാല് മാസത്തെ കാലയളവിലുള്ള കാലവർഷം സെപ്‌റ്റംബർ 30 ഓടെ കേരളത്തിൽ നിന്നു പിന്മാറും. അതിനുശേഷമാണ് വടക്കു കിഴക്കൻ മൺസൂൺ കേരളത്തിലെത്തുന്നത്.

ഈ വര്‍ഷം മുതല്‍ രാജ്യത്തിന്റെ ചില ഭാഗങ്ങളില്‍ മണ്‍സൂണിന്റെ സാധാരണ ആരംഭവും പിന്‍വലിക്കല്‍ തിയതിയും പരിഷ്‌കരിക്കാന്‍ ഇന്ത്യന്‍ കാലാവസ്ഥ വകുപ്പ് തീരുമാനിച്ചതായി നേരത്തെ റിപ്പോർട്ടുകളുണ്ടായിരുന്നു. ഇതേ തുടർന്ന് കേരളത്തില്‍ മണ്‍സൂണ്‍ മാറിയേക്കുമെന്നും വാർത്തകൾ പുറത്തുവന്നിരുന്നു. കേരളത്തിലെ കാലാവസ്ഥാ വ്യതിയാനമാണ് ഇതിനു കാരണം. ചുരുക്കം ദിവസങ്ങളിൽ അതിതീവ്രമഴ പെയ്യുന്നതും ദീർഘനാൾ മഴയില്ലാതിരിക്കുന്നതും ഭാവിയിൽ മൺസൂണിൽ സ്ഥിരമാകുമെന്നും ശാസ്ത്രജ്ഞർ സൂചിപ്പിക്കുന്നു.

കേരളത്തിൽ മഴയുടെ വരവ് വലിയ രീതിയിൽ മാറിയിട്ടുണ്ട്. കഴിഞ്ഞ 13 വർഷത്തിനിടെ ഒരു തവണയാണ് കൃത്യം ജൂൺ ഒന്നിന് മൺസൂൺ മഴ ലഭിച്ചിട്ടുള്ളത്. മറ്റുള്ള സമയങ്ങളിലെല്ലാം മൺസൂൺ മാറിമറിയാറുണ്ട്. ആറോ ഏഴോ ദിവസങ്ങൾ വൈകിയെല്ലാം മൺസൂൺ കേരളത്തിലെത്താറുണ്ട്.