ലോകമെമ്പാടുമുള്ള മുതലാളിമാരും തൊഴിലാളിമാരും കഷ്ടത്തിലാണ്. തൊഴിലാളിയുണ്ടെങ്കിലേ മുതലാളിയുള്ളൂവെന്നും മുതലാളിയുണ്ടങ്കിലേ തൊഴിലാളിയുണ്ടെന്നുമുള്ള സത്യം ഒരിക്കല്‍ കൂടി അറിയുന്ന നാളുകളാണിത്. എല്ലാവരും നഷ്ടത്തില്‍ നിന്നും നഷ്ടത്തിലേക്ക് കൂപ്പ് കുത്തുമ്പോള്‍ വലിയ മുന്നേറ്റമുണ്ടായിരിക്കുകയാണ് മുകേഷ് അംബാനി.

പതിനഞ്ച് ദിവസത്തിനുള്ളില്‍ മൂന്നാമതും ജിയോയിലേയ്ക്ക് വന്‍ നിക്ഷേപവുമായി ആഗോള കമ്പനികള്‍ എത്തിയിരിക്കുകയാണ്. അമേരിക്ക ആസ്ഥാനമായി പ്രവര്‍ത്തിത്തുന്ന ഇക്വിറ്റി സ്ഥാപനമായ വിസ്റ്റയാണ് റിലയന്‍സ് ജിയോ ഇന്‍ഫോകോം ലിമിറ്റഡിന്റെ 2.3% ഓഹരി വാങ്ങിയത്. അമേരിക്കന്‍ സ്വകാര്യ ഇക്വിറ്റി സ്ഥാപനമായ സില്‍വര്‍ ലേക്കിനും ഫേസ്ബുക്കിനും പിന്നാലെയാണ് വിസ്റ്റയുടെ ഈ നീക്കം.

മാര്‍ക്ക് സുക്കര്‍ബര്‍ഗ് 43573.62 കോടി രൂപ നല്‍കി 9.99 ശതമാനം ഓഹരികള്‍ വാങ്ങിയതിനു പിന്നാലെയാണ് മെയ് അഞ്ചിന് ജിയോ പ്ലാറ്റ്‌ഫോമിലെക്ക് 5,655.75 കോടി രൂപയുടെ നിക്ഷേപം നടത്തി 1.15 ശതമാനം ഓഹരി വാങ്ങിയത്. ഇന്ന് വിസ്റ്റ 11,3657 കോടി രൂപകൂടി നിക്ഷേപിച്ചതോടെ മൂന്നാഴ്ചക്കകം ജിയോ പ്ലാറ്റ്‌ഫോമിലെയ്ക്ക് വന്നുചേര്‍ന്നത് 60,956.37 കോടിരൂപയുടെ നിക്ഷേപമാണ്. അതേസമയം നിക്ഷേപം നടത്തിയ മൂന്നു കമ്പനികളും ടെലികോമുമായി ബന്ധമില്ലാത്തവയാണ് എന്ന പ്രത്യേകതയുമുണ്ട്. പ്രൈവറ്റ് ഇക്വിറ്റി സ്ഥാപനങ്ങളായ സില്‍വര്‍ ലേയ്ക്കും വിസ്റ്റയും ടെക് കമ്പനികളില്‍ നിക്ഷേപം നടത്തുന്ന സ്ഥാപനങ്ങളാണ്. ഫേസ്ബുക്കാകട്ടെ പ്രമുഖ ടെക് കമ്പനിയുമാണ്.

ഇതോടെ ജിയോ പ്ലാറ്റ്‌ഫോം കണ്‍സ്യൂമര്‍ ടെക്‌നോളജി കമ്പനിയായി മാറുകയാണ്. നിലവിലുണ്ടായ നിക്ഷേപത്തോടെ ജിയോയ്ക്ക് ഓഹരി വിപണിയില്‍ 80% നേട്ടാമാണുണ്ടായത്. ഇന്ത്യയിലുടനീളമുള്ള 130 കോടിയുള്ള ജനങ്ങളിലേയ്ക്ക് ജിയോ സേവനങ്ങള്‍ എത്തിക്കുകയും അതുവഴി ചെറുകിട വ്യാപാര സ്ഥാപനങ്ങള്‍ക്കും കര്‍ഷകര്‍ക്കമുള്‍പ്പെടുന്ന ജനതയ്ക്കായി ഒരു ഡിജിറ്റല്‍ ഇന്ത്യയെ പ്രാപ്തമാക്കുക എന്നതാണ് ജിയോയുടെ ലക്ഷ്യമെന്ന് റിലയന്‍സ് ഇന്റസ്ട്രീസ് ലിമിറ്റഡ് സ്ഥാപക, ചെയര്‍മാന്‍ മുകേഷ് അംബാനി പറഞ്ഞു. വിസ്റ്റയുടെ തീരമാനത്തില്‍ സന്തോഷമുണ്ടെന്നും അദ്ദേഹം വ്യക്തമാക്കി.

ഏഷ്യയിലെ അതിസമ്പന്നരില്‍ ആലിബാബ ഗ്രൂപ്പ് സ്ഥാപകന്‍ ജാക് മായെ പിന്തള്ളി മുകേഷ് അംബാനി വീണ്ടും അടുത്തിടെ ഒന്നാമതെത്തിയിരുന്നു. ജിയോ പ്ലാറ്റ്‌ഫോംസ് ലിമിറ്റഡില്‍ ഫെയ്‌സ് ബുക്ക് 9.9 ശതമാനം ഓഹരികള്‍ വാങ്ങിയതോടെ റിലയന്‍സ് ഓഹരികള്‍ ബുധനാഴ്ച പത്തുശതമാനത്തിലധികം നേട്ടമുണ്ടാക്കിയിരുന്നു. ഇതാണ് വിപണിമൂല്യത്തിന്റെ കണക്കില്‍ മുകേഷ് അംബാനിയെ മുന്നിലെത്തിച്ചത്. ബ്ലൂംബര്‍ഗിന്റെ അതിസമ്പന്നരുടെ പട്ടികയില്‍ ലോകത്തില്‍ 17ാം സ്ഥാനത്താണ് മുകേഷ് അംബാനിയിപ്പോള്‍. 4920 കോടി ഡോളറിന്റെ (3.74 ലക്ഷം കോടി രൂപ) വിപണിമൂല്യമാണ് അദ്ദേഹത്തിനുള്ളത്.

ഇന്ത്യയിലെ പ്രധാന വ്യവസായിയാണ് മുകേഷ് അംബാനി പ്രമുഖ വ്യവസായി ധീരുഭായ് അംബാനിയുടേയും കോകിലബെന്‍ അംബാനിയുടേയും മകനാണ്. റിലയന്‍സ് ഇന്‍ഡസ്റ്റ്രീസിന്റെ ചെയര്‍മാനും, മാനേജിംഗ് ഡയറക്ടറുമാണ് മുകേഷ് അംബാനി ഇന്ത്യയിലെ ഏറ്റവും വലിയ ധനികനാണ്. കേന്ദ്ര സര്‍ക്കാര്‍ ആദ്യമായി ഇസെഡ് കാറ്റഗറി സുരക്ഷ അനുവദിച്ച ഇന്ത്യന്‍ വ്യവസായിയും ഇദ്ദേഹമാണ്. 24 മണിക്കൂറും ആയുധധാരികളായ 28 സെന്‍ട്രല്‍ റിസര്‍വ് പോലീസ് ഫോഴ്‌സ് കമാന്‍ഡോകള്‍ ഇദ്ദേഹത്തിന്റെ സുരക്ഷ ഉറപ്പാക്കുന്നു. ഇന്ത്യന്‍ മുജാഹിദീനില്‍ നിന്നുള്ള ഭീഷണി കണക്കിലെടുത്താണ് ഇദ്ദേഹത്തിന് ഇത്ര കനത്ത കാവല്‍ ഏര്‍പ്പെടുത്തിയിരിക്കുന്നത്. കൂടാതെ പ്രധാനമന്ത്രി മോദിയുടെ അടുത്ത സുഹൃത്തും കൂടിയാണ്.