കൈക്കൂലിയായി വാങ്ങിയ ലക്ഷം രൂപ തിരികെ കൊടുത്ത് തടിയൂരാന്‍ ശ്രമം
തൊടുപുഴ മേഖലയില്‍ പൊലീസ് സേനയെ കളങ്കപ്പെടുത്തുന്നവര്‍ക്കെതിരെ ശക്തമായ നടപടി എടുക്കുമെന്നും അഴിമതിക്കാരെ വച്ചുപൊറുപ്പിക്കില്ലെന്നും ജില്ലാ പൊലീസ് മേധാവി പി.കെ.മധു പറഞ്ഞു. അന്വേഷിച്ചു നടപടിയെടുക്കുമെന്നും അദ്ദേഹം അറിയിച്ചു.
കഞ്ചാവുകടത്തുകാരനില്‍ നിന്നു പണം തട്ടിയെടുത്തതു മുതല്‍ ചാരായക്കേസൊതുക്കാന്‍ രഹസ്യാന്വേഷണ വകുപ്പിലെ ഒരു എസ്‌ഐ ഒരു ലക്ഷം രൂപ കൈക്കൂലി വാങ്ങിയ സംഭവം വരെയുണ്ട്. പള്ളിയിലെ ഭണ്ഡാരപ്പെട്ടിയില്‍ നിന്നു കാന്തം ഉപയോഗിച്ച് അഡീഷനല്‍ എസ്‌ഐ നാണയങ്ങള്‍ കവര്‍ന്ന സംഭവവും സേനയ്ക്ക് നാണക്കേടുണ്ടാക്കി.
രഹസ്യാന്വേഷണ വിഭാഗത്തിലെ ഒരു എസ്‌ഐ ലോ റേഞ്ചില്‍ ചാരായക്കേസൊതുക്കാന്‍ ഒരു ലക്ഷം രൂപ കൈക്കൂലി വാങ്ങിയ സംഭവം ഇന്റലിജന്‍സ് എഡിജിപിയുടെ ശ്രദ്ധയില്‍ പെട്ടിട്ടുണ്ട്. ജില്ലാ പൊലീസ് മേധാവിയും ഇതെക്കുറിച്ച് അന്വേഷണം നടത്തിവരികയാണ്. ഒരു സ്റ്റേഷന്‍ ഹൗസ് ഓഫിസര്‍ക്കു വേണ്ടിയാണു രഹസ്യാന്വേഷണ വിഭാഗത്തിലെ എസ്‌ഐ, മദ്യപസംഘത്തില്‍ നിന്നു കൈക്കൂലി വാങ്ങിയത്. ഈ തുക മോട്ടര്‍ വാഹന വകുപ്പിലെ ഉദ്യോഗസ്ഥനും പങ്കിട്ടുവെന്നാണ് ഇന്റലിജന്‍സ് റിപ്പോര്‍ട്ട്.
മോട്ടര്‍ വാഹന വകുപ്പിലെ ഉദ്യോഗസ്ഥന്‍ ഈ സ്റ്റേഷന്‍ ഹൗസ് ഓഫിസര്‍ക്ക് കൈക്കൂലി തുക കൈമാറാന്‍ എത്തിയിരുന്നു. സംശയം തോന്നിയ മറ്റൊരു സ്റ്റേഷന്‍ ഹൗസ് ഓഫിസര്‍ അന്വേഷണം നടത്തിയപ്പോഴാണ്, രഹസ്യാന്വേഷണ വിഭാഗ എസ്‌ഐ കൈക്കൂലി വാങ്ങിയതായി തെളിഞ്ഞത്. എസ്‌ഐയെ തൊടുപുഴയില്‍ നിന്നു ജില്ലാ ആസ്ഥാനത്തേക്കു മാറ്റിയിട്ടുണ്ട്.
ഭണ്ഡാരപ്പെട്ടിയില്‍ നിന്നു കാന്തം ഉപയോഗിച്ചു നാണയങ്ങള്‍ കവര്‍ന്ന സംഭവത്തില്‍ ആരോപണ വിധേയനായ അഡീഷനല്‍ എസ്‌ഐക്കെതിരായ പരാതി അന്വേഷിച്ചത് കൈക്കൂലിക്കേസില്‍ ആരോപണം നേരിടുന്ന രഹസ്യാന്വേഷണ വിഭാഗം എസ്‌ഐ ആയിരുന്നു. ഈ സംഭവത്തില്‍ തെളിവില്ലെന്ന റിപ്പോര്‍ട്ടാണ് ഉന്നത ഉദ്യോഗസ്ഥര്‍ക്ക് എസ്‌ഐ നല്‍കിയിരിക്കുന്നതെന്നും സൂചനയുണ്ട്.
തൊടുപുഴ മേഖലയിലെ ചില പൊലീസ് ഉദ്യോഗസ്ഥരുടെ വരുമാനസ്രോതസ്സ് അന്വേഷിക്കണമെന്നാവശ്യപ്പെട്ട് വിജിലന്‍സ് ഡയറക്ടര്‍ക്കു പരാതി ലഭിച്ചിട്ടുണ്ട്.
https://www.facebook.com/Malayalivartha
