കോവിഡ് ലോക്ഡൗണിനെ തുടര്‍ന്നു ജില്ലയില്‍ കുടുങ്ങിയ അതിഥി തൊഴിലാളികള്‍ക്കുള്ള ട്രെയിന്‍ തൃശൂര്‍ റെയില്‍വേ സ്റ്റേഷനില്‍ നിന്നു ഇന്നലെ വൈകിട്ട് 4.45-ന് ഉത്തര്‍ പ്രദേശിലേക്ക് യാത്രയായി. അതിഥി തൊഴിലാളികള്‍ക്കായി ജില്ലയില്‍ നിന്നും അവരുടെ നാടുകളിലേക്കുള്ള രണ്ടാമത്തെ ട്രെയിന്‍ ആണിത്. 1140 പേരാണ് പ്രത്യേക 'ശ്രമിക്' ട്രെയിനില്‍ നാട്ടിലേക്കു യാത്ര തിരിച്ചത്.

വിവിധ നഗരസഭകളില്‍ നിന്ന് 159 പേരും പഞ്ചായത്തുകളില്‍ നിന്ന് 584 പേരും തൃശൂര്‍ കോര്‍പറേഷന്‍ പ്രദേശങ്ങളിലെ വിവിധ ലേബര്‍ ക്യാംപുകളില്‍ നിന്നുള്ള 397 പേരും ഉള്‍പ്പെട്ട സംഘമാണു യാത്ര തിരിച്ചത്. ക്യാംപുകളില്‍ നിന്നു ആരോഗ്യ പരിശോധനയ്ക്കു ശേഷം തൊഴിലാളികളെ കെഎസ്ആര്‍ടിസി ബസുകളില്‍ റെയില്‍വേ സ്റ്റേഷനിലെത്തിച്ചു. നേരത്തെ ബിഹാറിലേക്ക് 1143 പേരുമായി പ്രത്യേക ട്രെയിന്‍ പോയിരുന്നു.

മന്ത്രി എ.സി.മൊയ്തീന്‍, ചീഫ് വിപ് കെ.രാജന്‍, കലക്ടര്‍ എസ്.ഷാനവാസ്, പൊലീസ് മേധാവികളായ കെ.പി.വിജയകുമാര്‍, ആര്‍.ആദിത്യ എന്നിവര്‍ അതിഥി തൊഴിലാളികളെ യാത്രയാക്കാന്‍ റെയില്‍വേ സ്റ്റേഷനിലെത്തി. ജില്ലാ ലേബര്‍ ഓഫിസര്‍ ടി.ആര്‍.രാജീവ്, പഞ്ചായത്ത് ഡപ്യൂട്ടി ഡയറക്ടര്‍ പ്രസാദ് എന്നിവര്‍ യാത്രയുടെ ഏകോപന ചുമതല നിര്‍വഹിച്ചു.