കോവിഡ് കെയര്‍ സെന്ററുകള്‍ തിരഞ്ഞെടുത്ത റെയില്‍വേ സ്റ്റേഷനുകളില്‍ ആരംഭിക്കുന്നതിനാവശ്യമായ കോച്ചുകള്‍ തയാറാണെന്നും സംസ്ഥാന ആരോഗ്യ വകുപ്പിന്റെ ആവശ്യം അനുസരിച്ചായിരിക്കും ഇവ ആരംഭിക്കുകയെന്നും റെയില്‍വേ.

തിരുവനന്തപുരം ഡിവിഷന്‍ 60 കോച്ചുകളും പാലക്കാട് ഡിവിഷന്‍ 32 ഐസലേഷന്‍ കോച്ചുകളും ഒരുക്കിയിട്ടുണ്ട്. രാജ്യത്തെ 215 സ്റ്റേഷനുകളുടെ പട്ടികയില്‍ കേരളത്തില്‍ നിന്ന് എറണാകുളം, ഷൊര്‍ണൂര്‍, പാലക്കാട് സ്റ്റേഷനുകളാണ് പട്ടികയിലുളളത്.

കോവിഡ് കെയര്‍ സെന്ററുകള്‍ റെയില്‍വേ സ്റ്റേഷനുകളില്‍ ആരംഭിക്കുന്നതിനാവശ്യമായ മാര്‍ഗനിര്‍ദേശം കേന്ദ്ര ആരോഗ്യ മന്ത്രാലയം കഴിഞ്ഞ ദിവസം പുറത്തിറക്കിയിട്ടുണ്ട്. റെയില്‍വേ ഡോക്ടര്‍മാരുളള സ്റ്റേഷനുകള്‍ക്കാണു മുന്‍ഗണന നല്‍കിയിരിക്കുന്നത്. ഗുരുതരമല്ലാത്ത രോഗികളെയായിരിക്കും സ്റ്റേഷനില്‍ നിര്‍ത്തിയിടുന്ന കോച്ചുകളിലേക്കു മാറ്റുക.സ്റ്റേഷനുകളില്‍ നിന്നു രോഗികളെ ആവശ്യമെങ്കില്‍ അടുത്തുളള ആശുപത്രിയിലേക്കു മാറ്റും. രോഗമുളളവരെയും രോഗം സംശയിക്കുന്നവരെയും വെവ്വേറെ കോച്ചുകളില്‍ വേണം പാര്‍പ്പിക്കാനെന്നും നിര്‍ദേശിച്ചിട്ടുണ്ട്.

കോച്ചുകളിലേക്ക് ആവശ്യമായ ഭക്ഷണവും ഓക്‌സിജനും കിടക്ക വിരികളും റെയില്‍വേ നല്‍കും. റെയില്‍വേ ഡോക്ടര്‍മാരില്ലാത്ത സ്ഥലങ്ങളില്‍ സംസ്ഥാന സര്‍ക്കാര്‍ ആരോഗ്യ വിദഗ്ധരെ വിട്ടു നല്‍കിയാല്‍ മാത്രമേ കെയര്‍ സെന്റര്‍ ആരംഭിക്കൂ. എറണാകുളം ജംക്ഷന്‍ സ്റ്റേഷനില്‍ 3-ാം നമ്പര്‍ പ്ലാറ്റ്‌ഫോമിലാണ് ഐസലേഷന്‍ കോച്ചുകളുളള ട്രെയിന്‍ തല്‍ക്കാലം നിര്‍ത്തിയിരിക്കുന്നത്. 24 കോച്ചുകളുള്ള ട്രെയിനാണിത്. സ്ലീപ്പര്‍, ജനറല്‍ കോച്ചുകളാണു ഐസലേഷന്‍ കോച്ചുകളാക്കിയിരിക്കുന്നത്.