കഴിഞ്ഞ ഒന്നിന് രാത്രി ആലപ്പുഴ ഇഎംഎസ് സ്റ്റേഡിയത്തിന് സമീപത്തെ വീട്ടിൽ സൗത്ത് പൊലീസ് പരിശോധന നടത്തി 40 കുപ്പി വിദേശ മദ്യം പിടിച്ചെടുത്തെങ്കിലും പിന്നീട് തൊണ്ടിമുതൽ കാണാതായ സംഭവത്തിൽ എസ്ഐ അടക്കം നാല് പൊലീസ് ഉദ്യോ​ഗസ്ഥരെ സസ്പെൻഡ് ചെയ്തു . ആലപ്പുഴ സൗത്ത് എസ്ഐ കെ.ജി.രതീഷ്, പ്രബേഷനറി എസ്ഐ സുനേഖ് എം.ജയിംസ്, സിപിഒ മാരായ അബീഷ്, ദിനുലാൽ എന്നിവർക്കാണ് സസ്പെൻഷൻ.

വിലയേറിയ വിദേശമദ്യമായിരുന്നു പിടിച്ചെടുത്തത് . കൈക്കൂലി തന്നാൽ കേസെടുക്കാതെ സം​ഗതി ഒതുക്കാമെന്ന് പൊലീസ് പറയുകയും കൈക്കൂലി തുകയ്ക്കായി വിലപേശുകയും ചെയ്തുവെന്നു ദൃക്സാക്ഷികൾ മൊഴി നൽകിയിട്ടുണ്ട് . വൻ തുക ചോദിച്ചതു നൽകാൻ പ​റ്റില്ലെന്ന് വീട്ടുടമ അറിയിച്ചതിനെ തുടർന്ന് കൊണ്ടുപോയ മദ്യമാണ് സ്റ്റേഷനിൽ തൊണ്ടിമുതലായി എത്താതിരുന്നത് . സ്പെഷൽ ബ്രാ‍ഞ്ച് ഡിവൈഎസ്പി അന്വേഷണം നടത്തിയിരുന്നു. സ്പെഷ്യൽ ബ്രാഞ്ചിന്റെ റിപ്പോർട്ടിന് മേൽ ജില്ലാ പൊലീസ് മേധാവി കൂടുതൽ അന്വേഷണം നടത്തിയ ശേഷമാണ് എസ്ഐക്കെതിരെ അടക്കം നടപടി എടുത്തത്.