മുഖ്യമന്ത്രിക്കെതിരെ ആഞ്ഞടിച്ച് കെ മുരളീധരന്‍; മുഖ്യമന്ത്രി പിണറായി വിജയന്‍ നടത്തുന്നത് 'റിയാലിറ്റി ഷോ'
കോവിഡ് കാലത്ത് മുഖ്യമന്ത്രി പിണറായി വിജയന്‍ നടത്തുന്നത് 'റിയാലിറ്റി ഷോ' ആണെന്നും, ഇത് പ്രതിപക്ഷത്തെ അധിക്ഷേപിക്കുക എന്ന ഒറ്റ ലക്ഷ്യം മുന്നില്‍ കണ്ടുകൊണ്ട് മാത്രമാണെന്നും കോണ്‍ഗ്രസ് നേതാവ് കെ മുരളീധരന്‍. ലോക്ക്ഡൗണില്‍ വിദേശത്ത് കുടുങ്ങിയ പ്രവാസികളെ നാട്ടിലെത്തിക്കാന്‍ സാധിച്ചത് എല്ലാവരുടെയും ശ്രമഫലമായാണെന്ന് മുരളീധരന്‍ പറയുന്നു. നാട്ടിലെത്തുന്ന പ്രവാസികള്‍ക്ക് സര്‍ക്കാര്‍ ക്വാറന്റൈന്‍ സൗകര്യം ഒരുക്കിയത് കേന്ദ്രസര്‍ക്കാര്‍ ഹൈക്കോടതിയില്‍ സമര്‍പ്പിച്ച സത്യവാങ്മൂലത്തിന് വിരുദ്ധമായാണെന്നും മുരളീധരന്‍ കുറ്റപ്പെടുത്തി.
പ്രവാസികള്‍ക്ക് സര്‍ക്കാര്‍ വേണ്ടത്ര സൗകര്യങ്ങള്‍ ഒരുക്കിയിട്ടില്ലെന്നും അവര്‍ക്ക് താമസത്തിന് പോലും കൃത്യമായ സംവിധാനമില്ലെന്നും മുരളീധരന്‍ കുറ്റപ്പെടുത്തി. അന്യ സംസ്ഥാനങ്ങളില്‍ നിന്നും മലയാളികളെ എങ്ങനെ നാട്ടിലെത്തിക്കുമെന്ന കാര്യത്തില്‍ സര്‍ക്കാരിന് ആശയക്കുഴപ്പമാണെന്നും സര്‍ക്കാറിന് കഴിയില്ലെങ്കില്‍ മറ്റ് സംസ്ഥാനങ്ങളില്‍ നിന്നുള്ളവരെ സ്വന്തം പണം ഉപയോഗിച്ച് കോണ്‍ഗ്രസ് നാട്ടിലെത്തിക്കുമെന്നും അദ്ദേഹം പറഞ്ഞു.
https://www.facebook.com/Malayalivartha
