പ്രധാനമന്ത്രി നരേന്ദ്രമോദിയുടെ വലംകൈയ്യാണ് ആഭ്യന്തരമന്ത്രി അമിത് ഷാ. മോദി അധികാരത്തില്‍ വരാനും പല സംസ്ഥാനങ്ങള്‍ കൈയ്യിലൊതുക്കാനും കഴിഞ്ഞത് അമിത്ഷായുടെ കൂര്‍മ്മ ബുദ്ധി കൊണ്ടാണ്. രാജ്യമാകെ കോവിഡ് വ്യാപന ഭീതിയില്‍ നില്‍ക്കുമ്പോള്‍ കേന്ദ്ര അഭ്യന്തരമന്ത്രിയായ അമിത് ഷാ നിശബ്ദത പാലിക്കുന്നത് സമൂഹമാധ്യമങ്ങളിളും വാര്‍ത്താമാധ്യമങ്ങളിലും വലിയ ചര്‍ച്ചയായിരുന്നു. ജനത കര്‍ഫ്യൂവിലും പിന്നീട് ലോക്ക് ഡൗണ്‍ തുടങ്ങി ഇത്ര ആഴ്ചകളായിട്ടും അമിത് ഷായുടേതായി ഒരു പരസ്യ പ്രതികരണം ഇതു വരെ വന്നിട്ടില്ല.

മൗനം തുടര്‍ന്നപ്പോള്‍ സഭയിലെ ഒരു പ്രബലന്‍ അത്യാസന്ന നിലയിലാണെന്ന പ്രചാരണം സമൂഹമാധ്യമങ്ങളില്‍ സജീവമായിരുന്നു. അമിത് ഷാ എവിടെയെന്ന ചോദ്യവുമായി ചില പ്രതിപക്ഷ നേതാക്കള്‍ രംഗത്തെത്തുകയും ചെയ്തിരുന്നു.

മോദി സര്‍ക്കാരില്‍ രണ്ടാമനാണെങ്കിലും രാജ്യം കോവിഡെന്ന വന്‍ പ്രതിസന്ധിയെ നേരിടുമ്പോള്‍ അമിത് ഷായെ കാണാനില്ലെന്ന വിമര്‍ശനം പല കോണുകളില്‍ നിന്നും ഉയര്‍ന്നിരുന്നുകൊണ്ടിരുന്നു. കേന്ദ്ര ആഭ്യന്തര മന്ത്രിയുടെ അസാന്നിധ്യം ദേശീയ രാഷ്ട്രീയത്തില്‍ മാത്രമല്ല, സോഷ്യല്‍മീഡിയയിലും വലിയ ചര്‍ച്ചകള്‍ക്കും വഴിവെച്ചു. കുടിയേറ്റ തൊഴിലാളികളുടെ മടക്കയാത്രയുമായി ബന്ധപ്പെട്ട ചര്‍ച്ചകള്‍ക്കിടയിലും ആഭ്യന്തരമന്ത്രി മൗനത്തിലായിരുന്നു. ഇതോടെയാണ് അമിത് ഷായുടെ അസാന്നിധ്യത്തിന് പിന്നില്‍ അദ്ദേഹത്തിന്റെ അനാരോഗ്യമാണെന്ന അഭ്യൂഹങ്ങള്‍ പരക്കാന്‍ തുടങ്ങിയത്.

രാജ്യം വലിയ പ്രതിസന്ധി നേരിടുമ്പോള്‍ പ്രധാനമന്ത്രി നരേന്ദ്ര മോദി മാത്രമാണ് ചിത്രത്തിലുള്ളത്. മൊത്തം നിയന്ത്രണങ്ങളും മോദിയുടെ നേതൃത്വത്തില്‍ മാത്രം. അമിത് ഷാ കളത്തിന് പുറത്ത്. ഇതോടെ അമിത് ഷായെ മോദി മാറ്റിനിര്‍ത്തിയതാണെന്ന ചര്‍ച്ചകളും സോഷ്യല്‍മീഡിയയില്‍ കൊഴുത്തു. ഡല്‍ഹി കലാപത്തെ നേരിടുന്നതില്‍ അമിത് ഷായുടെ ഭാഗത്തു നിന്നുണ്ടായ വീഴ്ചകളാണ് ഈ മാറ്റിനിര്‍ത്തലിന് കാരണമെന്നും സോഷ്യല്‍മീഡിയ പറഞ്ഞു തുടങ്ങി. എന്നാല്‍ ഇതൊന്നുമല്ല, അമിത് ഷായുടെ അനാരോഗ്യമാണ് ഈ മാറിനില്‍ക്കലിന് കാരണമെന്നും അഭ്യൂഹങ്ങള്‍ പരന്നു. അമിത് ഷായ്ക്ക് എന്തോ സംഭവിച്ചിട്ടുണ്ടെന്ന സമാജ്‌വാദി പാര്‍ട്ടി നേതാവിന്റെ ട്വീറ്റും ഈ അഭ്യൂഹത്തിന് ശക്തി പകര്‍ന്നു.

ഇതോടെയാണ് തന്റെ അസാന്നിധ്യത്തെ കുറിച്ച് അമിത് ഷാ രംഗത്തെത്തിയത്. ട്വിറ്ററിലൂടെയാണ് പ്രതികരിച്ചത്. താന്‍ അസുഖബാധിതനാണെന്ന അഭ്യൂഹങ്ങളെ പൂര്‍ണമായും തള്ളിയാണ് അമിത് ഷായുടെ പ്രതികരണം. താന്‍ പൂര്‍ണ ആരോഗ്യവാനാണെന്നും ആഭ്യന്തരമന്ത്രിയെന്ന നിലയില്‍ ഉത്തരവാദിത്തങ്ങള്‍ അര്‍പ്പണബോധത്തോടെ നിര്‍വഹിക്കുകയാണെന്നും അദ്ദേഹം പറഞ്ഞു. 'ഞാന്‍ പൂര്‍ണ ആരോഗ്യവാനാണ്, ഒരു രോഗവും ബാധിച്ചിട്ടില്ല. തന്റെ ആരോഗ്യസ്ഥിതിയെക്കുറിച്ചുള്ള അഭ്യൂഹങ്ങള്‍ സോഷ്യല്‍ മീഡിയയിലൂടെ പ്രചരിച്ചിക്കുന്നത് ശ്രദ്ധയില്‍പെട്ടിട്ടുണ്ടെന്നും'' ഷാ പറഞ്ഞു. കൊറോണ വൈറസ് സൃഷ്ടിച്ച പ്രതിസന്ധി രാജ്യം അഭിമുഖീകരിക്കുകയാണെന്നും ഇതിന്റെ പശ്ചാത്തലത്തില്‍ താന്‍ തന്റെ ജോലികളില്‍ തിരക്കിലാണെന്നും ആരോഗ്യത്തെക്കുറിച്ചുള്ള അഭ്യൂഹങ്ങള്‍ അവഗണിക്കുകയാണെന്നും ആഭ്യന്തരമന്ത്രി പറഞ്ഞു.

'ഈ വിഷയം എന്റെ ശ്രദ്ധയില്‍പെട്ടപ്പോള്‍, കിംവദന്തികള്‍ പ്രചരിപ്പിക്കുന്ന ആളുകള്‍ അവരുടെ സാങ്കല്‍പ്പിക ചിന്തകള്‍ ആസ്വദിച്ചോട്ടെയെന്ന് ഞാന്‍ കരുതി. അതുകൊണ്ടാണ് ഞാന്‍ ഈ വിഷയത്തില്‍ പ്രതികരിക്കാതിരുന്നത്,' ഷാ പറഞ്ഞു. ലക്ഷക്കണക്കിന് പാര്‍ട്ടി പ്രവര്‍ത്തകരും നേതാക്കളും ആശങ്ക പ്രകടിപ്പിച്ച സാഹചര്യത്തില്‍ അഭ്യൂഹങ്ങള്‍ അവഗണിക്കാന്‍ തനിക്ക് കഴിയില്ലെന്നും ആഭ്യന്തരമന്ത്രി പറഞ്ഞു. ഞാന്‍ പൂര്‍ണ ആരോഗ്യവാനാണ്, എനിക്ക് രോഗമില്ല. തന്റെ ആരോഗ്യത്തെക്കുറിച്ച് ആശങ്കയുള്ളവരോട് നന്ദി അറിയിച്ച ആഭ്യന്തരമന്ത്രി കിംവദന്തികള്‍ പ്രചരിപ്പിക്കുന്നവരോട് തനിക്ക് യാതൊരു വിരോധവുമില്ലെന്നും വ്യക്തമാക്കി.