ഗുരുവായൂർ ദേവസ്വം ബോർഡ് ഫണ്ടിൽ നിന്നും മുഖ്യമന്ത്രിയുടെ ദുരിതാശ്വാസ നിധിയിലേക്ക് അഞ്ചു കോടി രൂപസംഭാവന നൽകിയതിനെതിരായ പൊതു താല്പ്പര്യ ഹര്‍ജി കേരള ചീഫ് ജസ്റ്റിസിന്റെ പരിഗണനയ്ക്ക് വിട്ടു.

ബോര്‍ഡ് ചെയര്‍മാന്‍ കെ ബി മോഹന്‍ദാസിന്റെ നടപടിക്കെതിരെ  ഡെമോക്രാറ്റിക് സോഷ്യൽ ജസ്റ്റിസ് പാർട്ടി (ഡിഎസ്ജെപി) പ്രസിഡന്റ് കെ എസ് ആര്‍ മേനോന്‍  സമര്‍പ്പിച്ചതുള്‍പ്പെടെ ഒരു കൂട്ടം ഹര്‍ജികള്‍ ആണ് ജസ്റ്റിസ് ഷാജി പി. ചാലി, ജസ്റ്റിസ് എം. ആർ. അനിത എന്നിവരുൾപ്പെട്ട ഡിവിഷൻ ബെഞ്ച് മെയ്‌ എട്ടാം തീയതി പരിഗണിച്ചത്.

 ഇതിനകം 5 കോടി രൂപ കൈമാറിയ നടപടി ഹർജിയിലെ തീർപ്പിനു വിധേയമായിരിക്കുമെന്നു ഡിവിഷൻ ബെഞ്ച് വ്യക്തമാക്കി. ഗുരുവായൂർ ദേവസ്വം നിയമപ്രകാരം ക്ഷേത്രത്തിന്റെയും ഭക്തരുടെയും ആവശ്യത്തിനല്ലാതെ ദേവസ്വം ഫണ്ട് വിനിയോഗിക്കാനാവില്ലെന്നു ഹർജിഭാഗം വാദിച്ചു. 

ദുരിതാശ്വാസനിധിയിലേക്ക് പണം നൽകിയതിന്റെ സാധുത കോടതിയുടെ തീർപ്പിന് വിധേയമായിരിക്കും എന്നും ഹൈക്കോടതി അറിയിച്ചു. ദേവസ്വം ബോർഡ് ഫണ്ട്‌ കൈകാര്യം ചെയ്യുന്നത് സംബന്ധിച്ച് വ്യത്യസ്തമായ വിധികൾ നിലവിലുള്ള സാഹചര്യത്തിലാണ് കേസ് ചീഫ് ജസ്റ്റിസിന്റെ പരിഗണനയ്ക്ക് വിട്ടത്.

അതേസമയം, ദുരിതാശ്വാസ നിധിയിലേക്ക് കൂടുതൽ സംഭാവന നൽകാൻ തീരുമാനിച്ചിട്ടില്ലെന്ന് ദേവസ്വം ബോർഡ് കോടതിയെ അറിയിച്ചു.

തുക തിരിച്ചുപിടിക്കണമെന്നും, അധികാര ദുർവിനിയോഗം കാട്ടിയ ദേവസ്വം ബോർഡ് പിരിച്ചുവിട്ട് റിസീവർ ഭരണം ഏപ്പെടുത്തണമെന്നുമാണ് ഹര്‍ജികള്‍ വാദിച്ചത്.

കണ്ണന്‍റെ കാണിക്ക വഞ്ചിയില്‍ കയ്യിട്ടു വാരിയ അധാര്‍മിക പ്രവൃത്തി ചെയ്തഗുരുവായൂർ ദേവസ്വം ബോര്‍ഡ് ചെയര്‍മാന്‍ തല്‍സ്ഥാനത്ത് നിന്ന് രാജി വക്കണമെന്ന് ഡിഎസ്ജെപിപ്രസിഡന്റ്‌ മേനോന്‍ മലയാളിവാര്‍ത്തയോട് പറഞ്ഞു.