ലോക്ക് ഡൗണിനു ശേഷം ട്രയിൻ സര്‍വീസുകള്‍ നാളെ മുതൽ തുടങ്ങുന്നു. ഒട്ടേറെ നിയന്ത്രങ്ങളോടെയാണ് ട്രെയിൻ ഗതാഗതം ആരംഭിക്കുന്നത്.. .ന്യൂഡൽഹിയില്‍ നിന്ന് തിരുവനന്തപുരത്തേയ്ക്കും തിരിച്ചും ഉള്‍പ്പെടെ 15 ട്രെയിനുകളാണ് നാളെ മുതല്‍ സര്‍വീസ് നടത്തുന്നത്. തിങ്കളാഴ്ച വൈകിട്ട് നാലുമണിയ്ക്കാണ് ടിക്കറ്റ് വിതരണം ആരംഭിക്കുക.

ചൊവ്വ, ബുധൻ, ശനി ദിവസങ്ങളില്‍ ന്യൂഡൽഹിയില്‍ നിന്ന് തിരുവനന്തപുരത്തേയ്ക്കും ചൊവ്വ, വ്യാഴം, വെള്ളി ദിവസങ്ങളില്‍ തിരുവനന്തപുരത്തു നിന്ന് ന്യൂഡൽഹിയ്ക്കുമാണ് പ്രത്യേക ട്രെയിൻ സര്‍വീസ് നടത്തുക. രണ്ട് സര്‍വീസുകള്‍ക്കും കൊല്ലം, ആലപ്പുഴ, എറണാകുളം ജംഗ്ഷൻ, തൃശ്ശൂര്‍, ഷൊര്‍ണൂര്‍ ജംഗ്ഷൻ, കോഴിക്കോട്, കണ്ണൂര്‍, കാസര്‍കോട്, മംഗലുരു, ഉടുപ്പി, കര്‍വാര്‍, മഡ്ഗാവ്, സാവന്ത്‍‍വാഡി റോഡ്, രത്നഗിരി, പൻവേൽ, വാസൈ റോഡ്, വഡോദര, കോട്ട എന്നിവിടങ്ങളില്‍ സ്റ്റോപ്പുകളുണ്ട്.

സ്റ്റേഷനുകളില്‍ നിന്ന് ടിക്കറ്റുകള്‍ വിതരണം ചെയ്യില്ലെന്ന് റെയിൽവേ അറിയിച്ചിട്ടുണ്ട്. ഓൺലൈൻ വഴി മാത്രം വിതരണം ചെയ്യുന്ന ടിക്കറ്റുകളുമായി ട്രെയിൻ പുറപ്പെടുന്നതിനു ഒരു മണിക്കൂര്‍ മുൻപെങ്കിലും സ്റ്റേഷനിലെത്തണം. ഐആര്‍സിടിസി വെബ്സൈറ്റ് വഴി മാത്രമേ ടിക്കറ്റ് ബുക്ക് ചെയ്യാനാകൂ .

ട്രെയിനില്‍ കയറുന്നതിനു മുൻപായി യാത്രക്കാരുടെ ശരീരോഷ്മാവ് പരിശോധിക്കുകയും കൊവിഡ് രോഗലക്ഷണങ്ങള്‍ ഇല്ലെന്ന് ഉറപ്പാക്കുകയും ചെയ്യും. യാത്രക്കാര്‍ നിര്‍ബന്ധമായും മാസ്ക് ധരിക്കുകയും ചെയ്യണം. രോഗലക്ഷണങ്ങള്‍ ഉള്ളവരെ സ്റ്റേഷന്‍റെ ഉള്ളിലേയ്ക്കു പോലും പ്രവേശിപ്പിക്കില്ല. യാത്രക്കാര്‍ക്കു മാത്രമേ പ്ലാറ്റ്ഫോമുകളിലേയ്ക്ക് പ്രവേശനം അനുവദിക്കൂ. യാത്രാടിക്കറ്റുകളോ പ്ലാറ്റ്ഫോം ടിക്കറ്റുകളോ സ്റ്റേഷനുകളിലെ കൗണ്ടറുകളില്‍ നിന്ന് നല്‍കില്ല.

രാജധാനി റൂട്ടുകളില്‍ ഉള്‍പ്പെടെ 30 സര്‍വീസുകളാണ് ആദ്യഘട്ടത്തില്‍ റയിൽവേ നടത്തുന്നത്. മുഴുവൻ എസി കോച്ചുകളുമായി ഓടുന്ന ട്രെയിനുകള്‍ക്ക് സൂപ്പര്‍ ഫാസ്റ്റ് നിരക്കായിരിക്കും ഈടാക്കുക. എന്നാല്‍ എസി കോച്ചുകളില്‍ യാത്രക്കാര്‍ക്ക് പുതപ്പുകള്‍ നല്‍കില്ല. ഇതിനു പകരമായി താപനില അൽപം ഉയര്‍ത്തിയാണ് ക്രമീകരിക്കുന്നത്.

ന്യൂഡൽഹിയില്‍ നിന്നും തിരുവനന്തപുരത്തിനു പുറമെ ബെംഗളൂരു, ചെന്നൈ, ഗോവ, മുംബൈ സെൻട്രൽ, അഗര്‍ത്തല, ദിബ്രൂഗഡ്, ഹൗറ, പട്ന, ബിലാസ്പൂര്‍, റാഞ്ചി എന്നിവിടങ്ങളിലേയ്ക്കും ആദ്യ ഘട്ടത്തില്‍ ട്രെയിനുകളുണ്ട്.