മെയ് 17-ന് ശേഷം ലോക്ക്ഡൗണ്‍ തുടരണോ, നിയന്ത്രണങ്ങളില്‍ എന്തെല്ലാം ഇളവുകളാകാം എന്നതിലൊക്ക വിശദമായ ചര്‍ച്ചനടത്താന്‍ പ്രധാനമന്ത്രി നരേന്ദ്രമോദി വിളിച്ച മുഖ്യമന്ത്രിമാരുടെ യോഗത്തില്‍ കേന്ദ്രസര്‍ക്കാരിനെതിരെ രൂക്ഷവിമര്‍ശനവുമായി പശ്ചിമബംഗാള്‍ മുഖ്യമന്ത്രി മമതാ ബാനര്‍ജി. കൊവിഡിനെച്ചൊല്ലി കേന്ദ്രസര്‍ക്കാര്‍ രാഷ്ട്രീയം കളിക്കുകയാണെന്ന് മമത വിമര്‍ശിച്ചു. പല സംസ്ഥാനങ്ങളോടും കേന്ദ്രസര്‍ക്കാര്‍ വിവേചനപരമായ നിലപാടാണ് സ്വീകരിക്കുന്നതെന്നാണ് മമതയുടെ ആരോപണം.

''കേന്ദ്രസര്‍ക്കാര്‍ ഒരു തിരക്കഥ അനുസരിച്ചാണ് പ്രവര്‍ത്തിക്കുന്നത്. ഇത്തരം നാടകം കളിക്കാനുള്ള സമയമല്ല ഇത്. കൊവിഡ് പ്രതിരോധത്തില്‍ രാഷ്ട്രീയം കളിക്കരുത്. ഞങ്ങളുടെ അഭിപ്രായം ആരും ചോദിക്കുന്നത് പോലുമില്ല. ഫെഡറല്‍ സംവിധാനം അട്ടിമറിക്കരുത്'', എന്ന് മമത ആഞ്ഞടിച്ചു.

ലോക്ക്ഡൗണില്‍ നിന്ന് ഘട്ടം ഘട്ടമായി പുറത്തുകടക്കേണ്ടതിനെക്കുറിച്ചും, അതിഥിത്തൊഴിലാളികള്‍ക്കുള്ള സാമ്പത്തിക പാക്കേജിനെക്കുറിച്ചും വിശദമായ ചര്‍ച്ചകള്‍ നടക്കുന്നതിനിടെയാണ് മമതയുടെ വിമര്‍ശനം. പരിശോധനാഫലം കൃത്യമായി പശ്ചിമബംഗാള്‍ പുറത്തുവിടുന്നില്ല എന്നും, ശ്രമിക് ട്രെയിനുകള്‍ കടത്തി വിടേണ്ടതില്ലെന്നുമുള്ള ബംഗാളിന്റെ നിലപാടിനെതിരെയും ഉള്ള കേന്ദ്ര ആരോപണം മുന്‍നിര്‍ത്തിയാണ് മമതാ ബാനര്‍ജിയുടെ രൂക്ഷവിമര്‍ശനം. പശ്ചിമബംഗാളിലെ സ്ഥിതി വിലയിരുത്താന്‍ കേന്ദ്രസംഘം വരുന്ന വിവരം തനിക്ക് അറിയാമായിരുന്നില്ലെന്നും, ഇത് നേരത്തേ അറിയിക്കേണ്ടതായിരുന്നുവെന്നും മമത പ്രധാനമന്ത്രിക്ക് എഴുതിയ കത്തില്‍ ആഞ്ഞടിച്ചിരുന്നു.

മുഖ്യമന്ത്രി പിണറായി വിജയനും യോഗത്തില്‍ പങ്കെടുത്തു അതിനാല്‍ ഇന്ന് പതിവ് പോലെ അഞ്ച് മണിക്കുള്ള വാര്‍ത്താസമ്മേളനം ഇല്ലായിരുന്നു. ലോക്ക്ഡൗണ്‍ തുടങ്ങിയ ശേഷം മോദി വിളിച്ച് ചേര്‍ക്കുന്ന മുഖ്യമന്ത്രിമാരുടെ അഞ്ചാമത്തെ യോഗമാണിത്. ലോക്ക് ഡൗണ്‍ നീട്ടണമെന്ന് പശ്ചിമബംഗാള്‍ അടക്കമുള്ള നാല് സംസ്ഥാനങ്ങള്‍ നേരത്തേ ആവശ്യപ്പെട്ടിരുന്നു. മെയ് 31 വരെ ലോക്ക്ഡൗണ്‍ നീട്ടണമെന്നായിരുന്നു ആവശ്യം.