72 അതിഥി തൊഴിലാളികളെ കൊച്ചിയില് നിന്ന് രാജസ്ഥാനിലേക്ക് കടത്താന് ശ്രമം
രാജസ്ഥാനിലേക്ക് കേരളത്തില് നിന്ന് ലോറിയില് പോയ അതിഥി തൊഴിലാളികള് തമിഴ്നാട്ടില് പിടിയിലായി. തമിഴ്നാട് പൊലീസാണ് ഗൂഢല്ലൂരിനടുത്ത് കാക്കനഹള്ളിയില് ലോറി തടഞ്ഞത്. ഒരു ലോറിയില് 72 അതിഥി തൊഴിലാളികളെ കുത്തിനിറച്ചായിരുന്നു യാത്ര. തമിഴ്നാട് സര്ക്കാര് ബസുകളില് ഇവരെ കൊച്ചിയിലേക്ക് തിരിച്ചുകൊണ്ടുവരും.
ഒരു പരിശോധനയും കൂടാതെ പല ജില്ലകളും കടന്ന് മലപ്പുറത്തെ വഴിക്കടവ് ചെക്പോസ്റ്റു കടന്ന് തമിഴ്നാടിന് അടുത്തുള്ള നാടുകാണി ചെക്പോസ്റ്റും കടന്നാണ് ഇവര് ഗൂഢല്ലൂരിനടുത്ത് കാക്കനഹള്ളി ചെക്പോസ്റ്റില് എത്തിയത്. ഇവിടെ വച്ചാണ് ഇവര് പിടിയിലായത്.
ലോറിയുടെ ബോഡിക്ക് ഉയരമുള്ളതു കൊണ്ട് അതില് മറഞ്ഞിരിക്കാന് ആളുകള്ക്ക് കഴിയും. തൊഴിലാളികളെ കാക്കനഹള്ളി ചെക്പോസ്റ്റില് തന്നെ ഇറക്കി രണ്ടു ബസുകളിലായി തമിഴ്നാട് പൊലീസിന്റെ അകമ്പടിയോടെയാണ് കൊച്ചിയിലേക്ക് തിരികെ കൊണ്ടുവരുന്നത്.
ലോറി ഡ്രൈവര്ക്കെതിരെയും ഉടമയ്ക്കെതിരെയും കേസെടുത്തതായാണ് സൂചന. തൊഴിലാളികളെ കൊച്ചിയില് ജോലിക്കെത്തിച്ച കമ്പനി തന്നെയാണ് ഇവരെ കടത്തുന്നതിനു പിന്നിലെന്നാണ് തമിഴ്നാട് പൊലീസിന്റെ വിലയിരുത്തല്.
https://www.facebook.com/Malayalivartha