മഹാപ്രളയവും ഉരുള്‍പൊട്ടലിന്റെ ദുരിതപ്പെയ്ത്തും കടന്ന് മാസങ്ങള്‍ കഴിയും മുന്‍പേ ഇടുക്കിയില്‍ മഴ വീണ്ടും സജീവമാകുന്നു. കൊറോണക്കാലത്തോടൊപ്പം പ്രളയം കൂടി താങ്ങാന്‍ ജില്ലയ്ക്ക് കഴിയില്ല. 2 മാസത്തിനിടെ നെടുങ്കണ്ടം മേഖലയില്‍ 13 ഭൂചലനങ്ങള്‍; ഭൂമിക്കടിയില്‍ നിന്നു പ്രകമ്പനവും. 2018, 2019 വര്‍ഷത്തെ പ്രളയ കാലത്ത് മേഖലയില്‍ ഉരുള്‍പൊട്ടലും ജീവഹാനിയും ഉണ്ടായിരുന്നു. സമീപകാല ഭൂചലനങ്ങളുടെ പ്രഭവ കേന്ദ്രമായി നെടുങ്കണ്ടവും തൂക്കുപാലവും മാറിയിരിക്കുകയാണ് . ഇത്തരം സ്ഥലങ്ങളില്‍ ഭൂചലനം അനുഭവപ്പെടുന്നതാണ് ആശങ്ക സൃഷ്ടിക്കുന്നത്. ബുധന്‍ പുലര്‍ച്ചെ ഉണ്ടായ ഭൂചലനത്തില്‍ മുല്ലപ്പെരിയാര്‍ വൃഷ്ടിപ്രദേശവും കുലുങ്ങിയിരുന്നു. ഇതും ആശങ്കയുയര്‍ത്തി. അത് മാത്രമല്ല സംസ്ഥാന ദുരന്തനിവാരണ അതോറിറ്റിയുടെ പഠന പ്രകാരം സംസ്ഥാനത്തെ ഉരുള്‍പൊട്ടല്‍ സാധ്യതാ പ്രദേശങ്ങളില്‍ മുന്‍പന്തിയിലാണ് ജില്ല. 388.3 ചതുരശ്ര കിലോമീറ്റര്‍ പ്രദേശമാണ് അതീവ ഉരുള്‍പൊട്ടല്‍ സാധ്യതയുള്ള സ്ഥലങ്ങള്‍. ദേവികുളം, തൊടുപുഴ. ഉടുമ്പന്‍ചോല താലൂക്കുകളിലാണ് അതീവ ജാഗ്രതാപ്രദേശങ്ങള്‍.

ഭൂചലനമുണ്ടായതു നെടുങ്കണ്ടം മേഖലയില്‍ ഭൂമിയുടെ ഉപരിതലത്തില്‍ നിന്നു 2 കിലോമീറ്റര്‍ താഴെയെന്നാണ് കണ്ടെത്തല്‍. ഭൂചലനങ്ങളുടെ പ്രഭവ കേന്ദ്രമായ ചോറ്റുപാറയില്‍ നാഷനല്‍ സീസ്‌മോളജി സെന്ററിലെ വിദഗ്ധ സംഘം പരിശോധന നടത്തിയ ശേഷം ഇടുക്കി ഡാം റിസര്‍വോയര്‍, ആലടി, ചോറ്റുപാറ എന്നീ പോയിന്റുകളില്‍ ഡിജിറ്റല്‍ സീസ്‌മോഗ്രാഫ് സ്ഥാപിച്ചിരുന്നു. 3 മാസം വരെ നിരീക്ഷണം തുടര്‍ന്ന ശേഷം തുടര്‍പഠനം ആവശ്യമെങ്കില്‍ മൈക്രോ സീസ്മിക് ഡിറ്റക്ഷന്‍ സ്റ്റഡി നടത്തും.

ഗൂഗിള്‍ ആപ്പിന്റെ സഹായത്തോടെ മുല്ലപ്പെരിയാര്‍ ദുരന്തബാധിത മേഖലകളിലെ മൊബൈല്‍ ഫോണുകളെ ബന്ധിപ്പിച്ച് കോവിഡ് 19-ന്റെ മുന്നറിയിപ്പിനു സമാനമായ രീതിയില്‍ അപായസൂചന നല്‍കാമെന്ന് നിര്‍ദേശമുയര്‍ന്നിരുന്നു.

പ്രകൃതിദുരന്ത പ്രവര്‍ത്തനങ്ങളില്‍ പരിചയസമ്പന്നരായ റവന്യൂ ഉദ്യോഗസ്ഥരാണ് ഈ നിര്‍ദേശം മുന്നോട്ടുവച്ചത്. എന്നാല്‍ ഈ നിര്‍ദേശവും പരിഗണിക്കാന്‍ ഇതുവരെ സര്‍ക്കാര്‍ തയ്യാറായിട്ടില്ല.
നിലവില്‍ ദുരന്തഭീതിയില്‍ പെരിയാര്‍ തീരങ്ങളില്‍ കഴിയുന്നവര്‍ക്ക് അപായസൂചന നല്‍കാനുള്ള ഒരു സംവിധാനവും സര്‍ക്കാരിന്റെ പക്കലില്ല.

കോവിഡ് കാലത്തും ജനമനസ്സില്‍ ഉരുണ്ടുകൂടുന്ന ചോദ്യം. നാടിനെ വീണ്ടും പ്രളയം വിഴുങ്ങുമോ? കൃത്യമായ ഉത്തരം സാധ്യമല്ലാത്തവിധം സങ്കീര്‍ണമാണു മണ്‍സൂണ്‍. കേരളം വലിയൊരു ജലാശയമാണെന്ന് 2018ലെയും 2019ലെയും മഴക്കാലം പഠിപ്പിച്ചു. കോഴിക്കോട് മുതല്‍ തിരുവനന്തപുരം വരെ ജലം പരന്നൊഴുകി. കേരളം വെള്ളത്തിന്റെ ഒറ്റപ്പാളിയായി. ശരാശരി കാലവര്‍ഷം പെയ്യുന്ന സമയങ്ങളില്‍ പോലും ജാഗ്രത കാട്ടേണ്ട സംസ്ഥാനമാണു കേരളം. 2002 2015 വര്‍ഷങ്ങളിലെ മഴക്കുറവു കണ്ട് ഇനി പ്രളയമില്ലെന്ന ധാരണയില്‍ നദീതീരവും മറ്റും കയ്യേറി നടത്തിയ നിര്‍മാണമാണ് തുടര്‍ച്ചയായ പ്രളയദുരന്തം വിതച്ചതെന്നു വിദഗ്ധര്‍.ദക്ഷിണ കേരളത്തിലും തമിഴ്‌നാട്ടിലും ഈ വര്‍ഷം കൂടുതല്‍ കാലവര്‍ഷം ലഭിക്കാനുള്ള സാധ്യതയുണ്ടെന്ന് കാലാവസ്ഥാ സംഘടനയായ സൗത്ത് ഏഷ്യന്‍ ക്ലൈമറ്റ് ഫോറത്തിന്റെ (സാസ്‌കോഫ്) പഠനമുണ്ട്

കഴിഞ്ഞ 2 വര്‍ഷമായി ജില്ലയിലുണ്ടായ പല മണ്ണിടിച്ചിലുകള്‍ക്കും കാരണം മനുഷ്യന്റെ ചെയ്തികളാണെന്ന് ജിയോളജി വകുപ്പ്. നീര്‍ച്ചാലുകള്‍ അടച്ചും നിര്‍മാണ പ്രവര്‍ത്തനങ്ങള്‍ നടത്തിയും മുന്നറിയിപ്പ് അവഗണിച്ചും ദുരന്തങ്ങള്‍ വരുത്തിവയ്ക്കുകയാണ്.മണ്ണിടിച്ചില്‍ മുന്നറിയിപ്പുള്ള സ്ഥലങ്ങളില്‍ ശക്തമായ മഴ പെയ്യുന്ന സമയത്തെങ്കിലും താമസം പരമാവധി ഒഴിവാക്കണം.വിദഗ്‌ധോപദേശം തേടിയശേഷം മാത്രമേ നിര്‍മാണപ്രവര്‍ത്തനങ്ങള്‍ പാടുള്ളൂ. തടഞ്ഞുവച്ചിരിക്കുന്ന നീര്‍ച്ചാലുകള്‍ തുറന്നുവിടുക.25 ഡിഗ്രിയില്‍ കൂടുതല്‍ ചെരിവുള്ള പ്രദേശങ്ങളില്‍ മഴക്കുഴികള്‍, തടയണകള്‍ എന്നിവ പാടില്ല. കയ്യാല കെട്ടിയുയര്‍ത്തുമ്പോള്‍ വെള്ളമൊഴുകിപ്പോകാന്‍ സംവിധാനം വേണം