കണ്ണൂർ മെഡിക്കൽ കോളേജിൽ മരിച്ച മയ്യഴി സ്വദേശി മെഹ്റൂഫിന്റെ പേരിലുള്ള വാദം മുറുകുന്നു. കേരളത്തിന്റെ ലിസ്റ്റിൽ ഉൾപെടുത്തണമെന്ന കേന്ദ്രത്തിന്റെ നിർദ്ദേശം നാൽപത് ദിവസമായിട്ടും സംസ്ഥാനം നടപ്പിലാക്കിയില്ല. കേരളത്തിൽ വച്ചായിരുന്നു ഇദ്ദേഹം മരിച്ചത്. എന്നാൽ മയ്യഴി സ്വദേശിയായതിനാൽ പുതുച്ചേരിയുടെ കണക്കിലാണ് വരേണ്ടതെന്നാണ് കേരളം വാദിക്കുന്നത് . പക്ഷേ മഹാരാഷ്ട്രയിൽ നാല് മലയാളികൾ മരിച്ചപ്പോൾ അത് ആ സംസ്ഥാനത്തിന്റെ കണക്കിലായിരുന്നു ചേർത്തത് എന്ന് ചൂണ്ടിക്കാട്ടുകയായിരുന്നു കേന്ദ്ര സർക്കാർ . കേരളം കൈയ്യൊഴിഞ്ഞതിന് പിന്നാലെ പ്രതിഷേധിച്ചമറിയിച്ച് മെഹ്റൂഫിന്റെ കുടുംബം രംഗത്ത്. നിയമ നടപടിക്ക് ഒരുങ്ങുകയാണ് ഇവർ .

ഏപ്രിൽ പതിനൊന്നിനായിരുന്നു ചികിത്സയിലിരിക്കെ മെഹറൂഫ് മരിച്ചത്. ചെറുകല്ലായിയിലെ പൊതുപ്രവർത്തകനായിരുന്ന മെഹ്റൂഫ്. അദ്ദേഹം മരിച്ചതിന്റെ നാൽപതാം നാളത്തെ പ്രാർത്ഥന ചടങ്ങ് കഴിഞ്ഞു. മകനും മകളുടെ ഭർത്താവും മാത്രം സ്വന്തം വാഹനത്തിൽ 70 കിലോമീറ്റർ ദൂരെയുള്ള ഖബറിടത്തിൽ എത്തിയായിരുന്നു പ്രാർത്ഥന നടത്തി മടങ്ങിയത്.

എന്നാൽ ഇതുവരെയും കേരളത്തിന്റെയോ പുതുച്ചേരിയുടെ കണക്കിൽ ഈ മരണം ചേർത്തിട്ടില്ല.  കേരളത്തിൽ കഴിഞ്ഞ ദിവസം വരെ 666 പേർക്ക് കൊവിഡ് ബാധിച്ചെന്ന കണക്ക് കേന്ദ്രത്തിലേയും കേരളത്തിലേയും വെബ്സൈറ്റുകളിൽ ഒരുപോലെ നൽകിയിട്ടുണ്ട്. എന്നാൽ മരിച്ചവരുടെ ലിസ്റ്റിൽ മാത്രം കേന്ദ്രത്തിന്റെ കണക്കിൽ നിന്നും ഒരെണ്ണം കുറവായിട്ടാണ് കേരളം രേഖപ്പെടുത്തിയിരിക്കുന്നത്. പുതുച്ചേരി സ്വദേശി ആയത് കൊണ്ട് അവരുടെ ലിസ്റ്റിൽ ഉൾപെടുത്തണമെന്ന് കേരളം വാദിക്കുകയാണ് ചെയ്യുന്നത് . രോഗം സ്ഥിരീകരിച്ചതും മരിച്ചതും എവിടെയാണോ അവിടത്തെ ലിസ്റ്റിലാണ് ഉൾപെടുത്തേണ്ടത് എന്ന കേന്ദ്ര നിർദ്ദേശ പ്രകാരം കേരളം പേര് ചേർക്കണമെന്ന് പുതുച്ചേരി സർക്കാരും വ്യക്തമാക്കുന്നു.