കൊടുങ്ങല്ലൂര്‍, ഇരിങ്ങാലക്കുട എന്നിവിടങ്ങളില്‍ നിന്നും പച്ചക്കറി ലോറികളില്‍ ഒളിപ്പിച്ചു കടത്തിയ 80 കിലോഗ്രാം കഞ്ചാവ് പൊലീസ് പിടികൂടി. കൊടുങ്ങല്ലൂരില്‍ നിന്ന് 78 കിലോയും ഇരിങ്ങാലക്കുടയില്‍ നിന്ന് 2 കിലോയുമാണ് പിടികൂടിയത്. കഞ്ചാവു കടത്തിയതിന് പടിയൂര്‍ തൊഴുത്തുങ്ങപറമ്പില്‍ സജീവന്‍ (41), പറവൂര്‍ ചെറിയപല്ലംതുരുത്ത് കാക്കനാട്ട് സന്തോഷ് (35), ഗോതുരത്ത് കടവന്‍തുരുത്ത് കല്ലറയ്ക്കല്‍ ബിജു (47), മൂത്തുകുന്നം മടപ്ലാതുരുത്ത് വാടെപറമ്പില്‍ യദു (29) എന്നിവര്‍ അറസ്റ്റിലായി.

കൊടുങ്ങല്ലൂര്‍ പുല്ലൂറ്റ് പാലത്തിനു സമീപത്തു നിന്നാണ് സവാളച്ചാക്കുകള്‍ക്കിടയില്‍ ഒളിപ്പിച്ച 78 കിലോ കഞ്ചാവുമായി ലോറി പിടികൂടിയത്. പിടിച്ചെടുത്ത കഞ്ചാവിന് 80 ലക്ഷത്തോളം രൂപ വിപണിമൂല്യം വരുമെന്നു കണക്കാക്കുന്നു. റൂറല്‍ പൊലീസ് മേധാവി കെ.പി. വിജയകുമാരനു ലഭിച്ച രഹസ്യ വിവരത്തിന്റെ അടിസ്ഥാനത്തില്‍ ആന്റി നര്‍കോട്ടിക് സ്‌പെഷല്‍ ആക്ഷന്‍ ഫോഴ്‌സിന്റെ നേതൃത്വത്തില്‍ ജില്ലയിലെ വിവിധ പൊലീസ് ടീമുകള്‍ ചേര്‍ന്നായിരുന്നു പരിശോധന. ഇരിങ്ങാലക്കുടയില്‍ നടത്തിയ വാഹന പരിശോധനയ്ക്കിടെ പച്ചക്കറി ലോറിയില്‍ നിന്നു 2 കിലോ കഞ്ചാവു പിടികൂടിയതിനു പിന്നാലെയാണ് മറ്റൊരു ലോറിയില്‍ പറവൂര്‍ ഭാഗത്തേക്കു കഞ്ചാവ് കടത്തുന്നുണ്ടെന്ന വിവരം ലഭിച്ചത്.

ഡിവൈഎസ്പിമാരായ എം.കെ. ഗോപാലകൃഷ്ണന്‍, ഷാജ് ജോസ്, ഫേമസ് വര്‍ഗീസ്, സി.ആര്‍. സന്തോഷ്, സിഐമാരായ പി.ആര്‍. ബിജോയ്, പി.കെ. പദ്മരാജന്‍, എം.ജെ. ജീജോ, എസ്‌ഐ ഇ.ആര്‍. ബൈജു, ക്രൈം ബ്രാഞ്ച് എസ്‌ഐ എം.പി. മുഹമ്മദ് റാഫി, അഡീഷനല്‍ എസ്‌ഐ സി.സി. ബസന്ത്, എസ്‌ഐ ഷാജു എടത്താടന്‍ എന്നിവരുടെ നേതൃത്വത്തിലായിരുന്നു പരിശോധന. പ്രതികളെ റിമാന്‍ഡ് ചെയ്തു.