കേരളത്തിലെ എല്‍.ഡി.എഫ് സര്‍ക്കാര്‍ ഇന്ന് അഞ്ചാം വര്‍ഷത്തിലേക്ക്. കോവിഡിന്റെ പശ്ചാത്തലത്തില്‍ ആഘോഷങ്ങളൊന്നുമില്ലാതെയാണ് വാര്‍ഷികം കടന്നുപോകുന്നതെന്ന് മുഖ്യമന്ത്രി പിണറായി വിജയന്‍ അറിയിച്ചു. അതേസമയം, ഫേസ്ബുക്കിലൂടെ ഇന്ന് മുഖ്യമന്ത്രി ജനങ്ങളുമായി സംവദിക്കും. വൈകിട്ട് നടക്കുന്ന പതിവ് വാര്‍ത്താ സമ്മേളനത്തിന് ശേഷമാകും സംവാദം. സര്‍ക്കാറിന്റെ പ്രവര്‍ത്തനങ്ങളുമായി ബന്ധപ്പെട്ട് ജനങ്ങളുടെ സംശയങ്ങള്‍ക്ക് നേരിട്ട് മറുപടി പറയാനാണ് മുഖ്യമന്ത്രി എത്തുന്നത്. ഇന്ന് (തിങ്കളാഴ്ച) രാവിലെ 11 വരെ മുഖ്യമന്ത്രിയുടെ ഏതെങ്കിലും സാമൂഹിക മാധ്യമ അക്കൗണ്ടിലൂടെ ജനങ്ങള്‍ക്ക് ചോദ്യങ്ങള്‍ ഉന്നയിക്കാം. ഇവക്കുള്ള മറുപടിയാണ് പറയുക. ആരോഗ്യ വകുപ്പിന്റെ നേട്ടങ്ങളുടെ തോളിലേറിയാണ് എല്‍.ഡി.എഫ് സര്‍ക്കാര്‍ അഞ്ചാം വര്‍ഷത്തിലേക്ക് കടക്കുന്നത്.

നിപയെ വിജയകരമായി മറികടന്നതിന് ശേഷം, സര്‍വരുടെയും അഭിനന്ദനം നേടുന്ന രീതിയില്‍ കോവിഡ് പ്രതിരോധം നിര്‍വഹിക്കാനായതും വലിയ നേട്ടമാണ്. കോവിഡ് പ്രതിരോധത്തില്‍ കേരളം നടത്തിയ മുന്നേറ്റം ലോകമാധ്യമങ്ങളുടെ വരെ ശ്രദ്ധ തേടി. ആദ്യഘട്ടം മുതല്‍ സര്‍ക്കാര്‍ നടപ്പാക്കിയ നിയന്ത്രണങ്ങളും മുന്നൊരുക്കങ്ങളും രോഗവ്യാപനം തടയുന്നതില്‍ വലിയ പങ്കാണ് വഹിച്ചത്. കോവിഡ് പ്രതിരോധത്തില്‍ നേടിയ വിജയത്തിന്റെ മറവിലാണ് സ്പ്രിംഗ്ലര്‍ ഇടപാട് പോലുള്ളവയില്‍ സംഭവിച്ച വീഴ്ച മറികടന്നത്. പ്രതിസന്ധികളായി എത്തിയ രണ്ട് പ്രളയങ്ങളും നിപയും കോവിഡിന്റെ ആദ്യഘട്ടവും വിജയകരമായി കൈകാര്യം ചെയ്തതിലൂടെ മറ്റു വീഴ്ചകളെ മറികടക്കാന്‍ സര്‍ക്കാറിനായി.