കൊല്ലം അഞ്ചലില്‍ ഉത്രയെ പാമ്ബിനെക്കൊണ്ടു കടിപ്പിച്ച്‌ കൊലപ്പെടുത്തിയ കേസില്‍ ഭര്‍ത്താവ് സൂരജിന്റെ അച്ഛന്‍ സുരേന്ദ്രനെ അറസ്റ്റുചെയ്തു. മണിക്കൂറുകള്‍ നീണ്ട ചോദ്യം ചെയ്യലുനൊടുവിലാണ് സുരേന്ദ്രനെ അറസ്റ്റുചെയ്തത്. അന്വേഷണ സംഘം സൂരജിന്റെ വീട്ടില്‍ നടത്തിയ തെളിവെടുപ്പില്‍ കൊല്ലപ്പെട്ട ഉത്രയുടെ സ്വര്‍ണാഭരണങ്ങള്‍ കണ്ടെടുത്തിരുന്നു. സ്വര്‍ണാഭരണങ്ങള്‍ പലയിടങ്ങളില്‍ കുഴിച്ചിട്ട നിലയിലായിരുന്നു. കൊലപാതകത്തിന് മുമ്ബ് ലോക്കറില്‍ നിന്നെടുത്ത സ്വര്‍ണമാണ് ഇന്ന് കണ്ടെടുത്തതെന്നാണ് സൂചന. സൂരജിന്റെ അച്ഛന്‍ സുരേന്ദ്രനാണ് സ്വര്‍ണം കുഴിച്ചിട്ട സ്ഥലം ക്രൈംബ്രാഞ്ച് പരിശോധനാ സംഘത്തിന് കാണിച്ചുകൊടുത്തത്.

ഇയാള്‍ മദ്യപിച്ചു ഉത്രയെ‌ അസഭ്യം പറഞ്ഞിരുന്നതായി വിവരം ലഭിച്ചിരുന്നു. ഇതിനെ അടിസ്ഥാനമാക്കി പൊലീസ് കൂടുതല്‍ ചോദ്യം ചെയ്യലിന് വിധേയനാക്കിയെങ്കിലും സുരേന്ദ്രന്‍ സഹകരിച്ചിരുന്നില്ല. അടൂരിലെ വീട്ടില്‍ നേരത്തെ സൂരജ് പാമ്ബുമായി എത്തിയത് കണ്ടതായി അടുത്ത ബന്ധു വെളിപ്പെടുത്തിയിരുന്നു. യുവതിയുടെ മരണശേഷം ഉത്രയുടെ വീട്ടുകാരോടാണ് ബന്ധു ഇക്കാര്യങ്ങള്‍ വെളിപ്പെടുത്തിയത്. കേസില്‍ ഈ മൊഴി നിര്‍ണായകമായേക്കും.

സൂരജിന്‍്റെ സാമ്ബത്തിക ഇടപാടുകളില്‍ അന്വേഷണം നടന്നുകൊണ്ടിരിക്കുകയാണ്. സൂരജിനെ ബാങ്കുകളില്‍ എത്തിച്ചു തെളിവെടുപ്പ് നടത്താനും ആലോചനയുണ്ട്. ഉത്രയ്ക്ക് എല്‍ഐസി പോളിസി എടുത്തതുമായി ബന്ധപ്പെട്ടും അന്വേഷണം പുരോഗമിക്കുന്നുണ്ട്. അയല്‍വാസികളില്‍ നിന്നും വിവരം ശേഖരിച്ചിരുന്നു. സൂരജിന് പാമ്ബിനെ നല്‍കിയ സുരേഷിനെ വീണ്ടും ചോദ്യം ചെയ്‌തേക്കും.

പാമ്ബ് കടിയേറ്റതിനെ തുടര്‍ന്ന് ചികിത്സയില്‍ കഴിയവെ വീണ്ടും പാമ്ബ് കടിച്ച്‌ മരിച്ച ഉത്രയുടെ മരണം കൊലപാതകമാണെന്ന് കഴിഞ്ഞ ആഴ്ചയാണ് പൊലീസ് കണ്ടെത്തിയത്. ഭര്‍ത്താവായ സൂരജ് വീണ്ടും വിവാഹം കഴിക്കുന്നതിനും ഭാര്യയുടെ സ്വത്ത് കൈവശപ്പെടുത്തുന്നതിനുമായിട്ടാണ് പാമ്ബിനെ കൊണ്ട് ഉത്രയെ കടിപ്പിച്ച്‌ കൊന്നതെന്ന് പൊലീസിനോട് സമ്മതിക്കുകയായിരുന്നു.