കോട്ടയം താഴത്തങ്ങാടിയില്‍ വീട്ടമ്മ കൊല്ലപ്പെട്ട സംഭവത്തിനുപിന്നില്‍ മോഷണം തന്നെയെന്ന നിഗമനത്തില്‍ ബന്ധുക്കള്‍. പാറപ്പാടം ഷാനി മന്‍സിലില്‍ ഷീബ(60)യാണ് കൊല്ലപ്പെട്ടത്. ഗുരുതരമായി പരിക്കേറ്റ നിലയില്‍ കണ്ടെത്തിയ ഭര്‍ത്താവ് സാലി(65)യെ കോട്ടയം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. മോഷണത്തിനിടെ നടന്ന ആക്രമണത്തിലാണ് വീട്ടമ്മ കൊല്ലപ്പെട്ടതെന്ന് സംഭവ സ്ഥലത്തെത്തിയ ഉദ്യോഗസ്ഥരും വ്യക്തമാക്കിയിരുന്നു ഭര്‍ത്താവിന് പരിക്കേറ്റതെന്നുമാണ് പോലീസിന്റെ നിഗമനം.അടിയേറ്റ് ഗുരുതരമായി പരിക്കേറ്റ ഭര്‍ത്താവ് മുഹമ്മദ് സാലിയുടെ നില ഗുരുതരമായി തുടരുകയാണ്.ഷീബയുടെ സ്വര്‍ണാഭരണങ്ങള്‍ നഷ്ടപ്പെട്ടിട്ടുണ്ട്. ഭാര്യയ്ക്കും ഭര്‍ത്താവിനും ആരുമായി ശത്രുതയുമുണ്ടായിരുന്നില്ല. ഇതാണ് കൊലപാതകത്തിനുപിന്നില്‍ മോഷണമാണെന്ന് ബന്ധുക്കള്‍ പറയാന്‍ കാരണം.

രണ്ട് നില വീട്ടില്‍ മുഹമ്മദ് സാലിയും ഭാര്യ ഷീബാ സാലിയും മാത്രമാണ് താമസിച്ചിരുന്നത്. കൊല നടന്നെങ്കിലും വീട്ടിനുള്ളില്‍ നിന്ന് നിലവിളിയോ മറ്റോ കേട്ടതായി റിപ്പോര്‍ട്ടില്ല. സമീപത്തെ വീടുകളില്‍ താമസിക്കുന്നത് പ്രായമുള്ളവരാണ്. അതിനാലാകാം ശബ്ദം കേള്‍ക്കാത്തതെന്നാണ് കരുതുന്നത്. മാതാപിതാക്കളെ ഫോണിലൂടെ ബന്ധപ്പെടാന്‍ കഴിയുന്നില്ലെന്ന് വിദേശത്തുള്ള മകള്‍ അയല്‍വാസികളെ അറിയിച്ചതോടെയാണ് കൊലപാതക വിവരം പുറത്തറിയുന്നത്. അയല്‍ക്കാരന്‍ വന്നുനോക്കിയപ്പോള്‍ ഗ്യാസ് സിലിണ്ടര്‍ ലീക്കുചെയ്യുന്നതായി കണ്ടു.ഉടന്‍ തന്നെ ഫയര്‍ഫോഴ്സിനെ വിവരമറിയിച്ചു. അവരെത്തി വീട്ടിനുള്ളിലേക്ക് പ്രവേശിക്കാന്‍ നോക്കിയെങ്കിലും വിജയിച്ചില്ല. ജനാലയ്ക്കുള്ളിലൂടെ വീട്ടിനുള്ളിലേക്ക് നോക്കിയപ്പോഴാണ് ഉള്ളില്‍ രക്തം തളംകെട്ടി നില്‍ക്കുന്നത് കണ്ടത്.ഇതോടെ പുറത്ത് നിന്ന് പൂട്ടിയ വാതില്‍ ഫയര്‍ഫോഴ്സ് വെട്ടിപ്പൊളിച്ച് അകത്ത് കയറിയപ്പോഴാണ് സാലിയും ഷീബയും രക്തത്തില്‍ കുളിച്ച് കിടക്കുന്നത് കണ്ടത്. ഉടന്‍ തന്നെ ഇരുവരേയും കോട്ടയം മെഡിക്കല്‍ കോളേജ് ആശുപത്രിയിലെത്തിച്ചെങ്കിലും അപ്പോഴേക്കും ഷീബ മരിച്ചിരുന്നു.

വിവരം അറിഞ്ഞ് അഗ്‌നിരക്ഷാ സേനാ സംഘം സ്ഥലത്ത് എത്തുമ്പോള്‍ മൃതദേഹം കിടന്ന മുറിയില്‍ ഗ്യാസ് സിലിണ്ടര്‍ തുറന്ന് വിട്ടിരിക്കുകയായിരുന്നു. രണ്ടു പേരുടെയും തലയ്ക്കാണ് അടിയേറ്റിരിക്കുന്നത്. ഇരുവരുടെയും കൈകള്‍ ഇരുമ്പ് കമ്പി ഉപയോഗിച്ച് കെട്ടിയിരുന്നു. ഈ ഇരുമ്പ് കമ്പിയിലേയ്ക്ക് വൈദ്യുതി പ്രവഹിക്കാന്‍ ക്രമീകരണം ചെയ്തിരുന്നു. മെയിന്‍ സ്വിച്ച് ഓഫ് ചെയ്താണ് അഗ്‌നി രക്ഷാസേനാ വൈദ്യുതി പ്രവാഹം നിയന്ത്രിച്ചത്.

രണ്ട് പേര്‍ക്കും തലയ്ക്കടിയേറ്റിട്ടുണ്ട്. ഷീബയെ ഷോക്കടിപ്പിക്കാനും ശ്രമം നടന്നു. കമ്പി ഇവരുടെ കാലില്‍ ചുറ്റിയ നിലയിലായിരുന്നു. ഒരു ഗ്യാസ് സിലിണ്ടര്‍ സ്വീകരണമുറിയില്‍ കൊണ്ടുവച്ച് തുറന്നുവിട്ടിരുന്നു. അലമാര വാരിവലിച്ചിട്ട നിലയിലായിരുന്നു.ഇതിനൊപ്പം സെറ്റിയും ടീപ്പോയുമുള്‍പ്പെടെ തകര്‍ത്ത നിലയിലാണ്.ഇതും മോഷണത്തിലേക്കാണ് വിരല്‍ ചൂണ്ടുന്നതെന്നാണ് പൊലീസ് പറയുന്നത്. തുമ്പുണ്ടാക്കാന്‍ സമീപത്തെ വീടുകളിലെ സി.സി.ടി.വി ദൃശ്യങ്ങള്‍ പൊലീസ് പരിശോധിക്കുന്നുണ്ട് .രാവിലെ പത്തുമണിയോടെയായിരിക്കും കൊലപാതകമെന്നാണ് പൊലീസ് കരുതുന്നത്.വീടിനു പുറത്തു കിടന്ന വാഗണ്‍ ആര്‍ കാര്‍ കാണാതായിട്ടുണ്ട്. ഈ കാര്‍ കേന്ദ്രീകരിച്ചാണ് ഇപ്പോള്‍ അന്വേഷണം മുന്നോട്ടുപോവുന്നത്.കാര്‍ കണ്ടെത്താനുള്ള ശ്രമം പൊലീസ് തുടങ്ങിയിട്ടുണ്ട്. ചെക്പോസ്റ്റുകളിലും മറ്റും പരിശോധന നടത്തുന്നുണ്ട്.

പോലീസ് സയന്റിഫിക്ക് എക്‌സ്‌പേര്‍ട്ട് സംഘവും ഡോഗ് സ്‌ക്വാഡും സ്ഥലത്ത് എത്തി പരിശോധന നടത്തി. ജില്ലാ പോലീസ് മേധാവി ജി.ജയദേവ്, ഡിവൈ.എസ്.പി ആര്‍.ശ്രീകുമാര്‍, ജില്ലാ ക്രൈം ബ്രാഞ്ച് ഡിവൈ.എസ്.പി ഗിരീഷ് പി.സാരഥി, വെസ്റ്റ് സ്റ്റേഷന്‍ ഹൗസ് ഓഫിസര്‍ എം.ജെ അരുണ്‍ , എസ്.ഐ ടി. ശ്രീജിത്ത് എന്നിവരുടെ നേതൃത്വത്തിലാണ് അന്വേഷണം.