യുവ എഞ്ചിനീയർ രാത്രി പതുങ്ങിയിരുന്ന് ഭവന ഭേദനം നടത്തി യുവതിയെ കൊലപ്പെടുത്തുമെന്ന് ഭീഷണിപ്പെടുത്തിയ കേസിൽ യുവതിക്ക് ജാമ്യമില്ലാ അറസ്റ്റ് വാറണ്ട്. സാക്ഷി വിസ്താര വിചാരണക്ക് പല കുറി ഹാജരാകാത്തതിനാലാണ് തിരുവനന്തപുരം ചീഫ് ജുഡീഷ്യൽ മജിസ്ട്രേട്ട് കോടതി ഒന്നാം സാക്ഷിയായ പരാതിക്കാരിക്കെതിരെ ജാമ്യമില്ലാ അറസ്റ്റ് വാറണ്ടുത്തരവ് പുറപ്പെടുവിച്ചത്.

വിചാരണക്ക് മുന്നോടിയായി പ്രതിക്ക് മേൽ കോടതി കുറ്റം ചുമത്തിയിരുന്നു. പ്രതി പ്രഥമദൃഷ്ട്യാ കുറ്റ കൃത്യം ചെയ്തതായി അനുമാനിക്കാവുന്ന തെളിവുകൾ ഉള്ളതിനാൽ വിചാരണ നേരിടാനും സി.ജെ.എം. ഉത്തരവിട്ടിരുന്നു. തനിക്കെതിരായി പോലീസ് ഹാജരാക്കിയ കുറ്റപത്രം അടിസ്ഥാന രഹിതമായതിനാൽ തന്നെ വിചാരണ കൂടാതെ കുറ്റവിമുക്തനാക്കണമെന്നാവശ്യപ്പെട്ട് പ്രതി സമർപ്പിച്ച വിടുതൽ ഹർജി തള്ളിക്കൊണ്ടാണ് കോടതി വിചാരണ ഉത്തരവ് പുറപ്പെടുവിച്ചത്.

തിരുവനന്തപുരം പട്ടം സ്വദേശിയും യുവ എഞ്ചിനീയറുമായ എസ്.എം.മോഹനാണ് കേസിലെ പ്രതി. ക്രിമിനൽ നടപടി ക്രമത്തിലെ വകുപ്പ് 239 പ്രകാരം പ്രതി സമർപ്പിച്ച വിടുതൽ ഹർജി തള്ളിളിക്കൊണ്ടാണ് 240 പ്രകാരം കോടതി പ്രതിക്ക് മേൽ കുറ്റം ചുമത്തിയത്. 2014 മെയ് മാസത്തിലാണ് കേസിനാസ്പദമായ ഭവന കൈയ്യേറ്റ സംഭവം നടന്നത്. യുവതിയുടെ പരാതിയിൽ മ്യൂസിയം പോലീസ് കേസെടുത്ത് കുറ്റപത്രം തിരുവനന്തപുരം മൂന്നാം ജുഡീഷ്യൽ ഒന്നാം ക്ലാസ്സ് മജിസ്ട്രേട്ട് കോടതിയിൽ സമർപ്പിച്ചിരുന്നു. കേരള പോലീസ് ആക്റ്റിലെ വകുപ്പിട്ടാണ് കുറ്റപത്രം സമർപ്പിച്ചത്. രണ്ടു വർഷം വരെ ശിക്ഷിക്കാവുന്ന സമൻസ് കേസ് ഗണത്തിൽപ്പെടുന്നതിനാലാണ് മ്യൂസിയം പോലീസ് സ്റ്റേഷൻ പരിധിയിൽ വരുന്ന രണ്ടാം ക്ലാസ്സ് കുറ്റകൃത്യങ്ങൾ വിചാരണ ചെയ്യുന്ന മൂന്നാം മജിസ്ടേട്ട് കോടതിയിൽ പോലീസ് കുറ്റപത്രം സമർപ്പിച്ചത്.

സമൻസ് കൈപ്പറ്റി മൂന്നാം കോടതിയിൽ ഹാജരായ പ്രതി വിടുതൽ ഹർജി സമർപ്പിച്ചു. കേരള പോലീസ് നിയമത്തിലെ ബന്ധപ്പെട്ട വകുപ്പ് ഭരണ ഘടനാ വിരുദ്ധമാണെന്ന ഹൈക്കോടതി വിധിന്യായം ഹാജരാക്കിയായിരുന്നു പ്രതിയുടെ വാദം. തുടർന്ന് കോടതി ആ വകുപ്പ് കുറവ് ചെയ്തു. അതേ സമയം കോടതി സ്വമേധയാ ഇന്ത്യൻ ശിക്ഷാ നിയമത്തിലെ വകുപ്പുകളായ 457 ( രാത്രി പതുങ്ങിയിരുന്നുള്ള ഭവനഭേദനം) , 506 ( ii ) ( ഭീഷണിപ്പെടുത്തി മരണഭയമുണ്ടാക്കൽ ) എന്നീ വകുപ്പുകൾ ചേർത്ത് പ്രതിക്കെതിരെ കേസെടുത്തു. ക്രിമിനൽ നടപടി ക്രമത്തിിലെ വകുപ്പ് 216 പ്രകാരമാണ് കോടതി സ്വമേധയാ കുറ്റപത്രത്തിലെ വകുപ്പ് ഭേദഗതി ചെയ്ത് മാറ്റം വരുത്തിയത്.

പുതുതായി ചേർത്ത വകുപ്പുകൾ 2 വർഷത്തിന് മേൽ ശിക്ഷിക്കാവുന്ന വാറണ്ട് കേസായതിനാൽ മ്യൂസിയം സ്റ്റേഷന്റെ വാറണ്ട് വിചാരണ കേസുകൾ വിചാരണ ചെയ്യാൻ അധികാരപ്പെട്ട ചീഫ് ജുഡീഷ്യൽ മജിസ്ട്രേട്ട് കോടതിയിലേക്ക് കേസ് ഫയൽ സമർപ്പിക്കുകയായിരുന്നു. ക്രിമിനൽ നടപടി ക്രമത്തിലെെ വകുപ്പ് 322 (1) (സി) പ്രകാരമാണ് വിചാരണക്കായി അധികാര പരിധിയുള്ള കോടതിയിലേക്ക് കേസ് റെക്കോർഡുകൾ കേസിൻ്റെ സ്വഭാവം വിശദീകരിച്ചുള്ള ചുരുക്ക റിപ്പോർട്ട് സഹിതം അയച്ചത്.

ഒരു കേസിൽ രണ്ട് വിടുതൽ ഹർജികൾ സമർപ്പിച്ചതിന്റെ നിയമ സാധുതയെ പ്രോസിക്യൂഷൻ ഡെപ്യൂട്ടി ഡയറക്‌ടർ ശക്തമായി എതിർത്തിരുന്നു.