ആര്‍.എസ്.എസിന്റെ കേരളത്തിലെ ആദ്യ കാല പ്രചാരകന്മാരില്‍ ഒരാളും കേസരി വാരിക പത്രാധിപകരുമായിരുന്ന ആര്‍.വേണുഗോപാലിനെ അനുസ്മരിച്ച് കേന്ദ്രമന്ത്രി വി.മുരളീധരന്റെ ഫേസ്ബുക് കുറിപ്പ്. പ്രത്യയശാസ്ത്ര വേലിക്കെട്ടുകള്‍ക്കപ്പുറത്തായിരുന്നു അദ്ദേഹത്തിന്റെ സുഹൃദ് ബന്ധങ്ങള്‍. ആയിരക്കണക്കിന് പ്രവര്‍ത്തകര്‍ക്ക് സ്‌നേഹവും കരുതലും പകര്‍ന്നു നല്‍കിയാണ് ഇക്കാലമത്രയും അദ്ദേഹം ജീവിച്ചത്. വലിയ ബന്ധങ്ങളും സുഹൃദ് വലയവും തന്നെയായിരുന്നു നിലമ്പൂര്‍ രാജകുടുംബത്തിലെ പിന്‍മുറക്കാരന്റെ ഏക സമ്പാദ്യം. ആര്‍ക്കും മാതൃകയാക്കാവുന്ന ജീവിതമാണ് വേണുവേട്ടന്റേത്. നിസ്വാര്‍ഥ സാമൂഹ്യസേവനത്തിന്റെ വലിയ ഉദാഹരണമായ വേണുവേട്ടനുവേണ്ടി നമുക്ക് അര്‍പ്പിക്കാവുന്ന ആദരാഞ്ജലിയെന്ന് കേന്ദ്രമന്ത്രി ഫെയ്‌സ്ബുക്ക് പോസ്റ്റില്‍ ചൂണ്ടിക്കാട്ടി.

പോസ്റ്റിന്റെ പൂര്‍ണ്ണരൂപം:

രാഷ്ട്രീയ സ്വയം സേവകസംഘത്തിന്റെകേരളത്തിലെ ആദ്യ പ്രചാരകൻമാരിൽ ഒരാളായ ആർ.വേണുഗോപാൽ ഇനി നമുക്കൊപ്പമില്ല.
പ്രിയപ്പെട്ടവരുടെ ‘വേണുവേട്ടനാണ്’ നമ്മെയെല്ലാവരേയും വിട്ടുപിരിഞ്ഞത്. പ്രത്യയശാസ്ത്ര വേലിക്കെട്ടുകൾക്കപ്പുറത്തായിരുന്നു അദ്ദേഹത്തിന്റെ സുഹൃദ് ബന്ധങ്ങൾ. ആയിരക്കണക്കിന് പ്രവർത്തകർക്ക് സ്നേഹവും കരുതലും പകർന്നു നൽകിയാണ് ഇക്കാലമത്രയും അദ്ദേഹം ജീവിച്ചത്.

കേസരി വാരികയുടെ പത്രാധിപരായി വേണുവേട്ടൻ പ്രവർത്തിച്ചിരുന്നു. ഭാരതീയ മസ്ദൂർ സംഘത്തിന്റെ സംസ്ഥാന ജനറൽ സെക്രട്ടറിയായും ദേശീയ വർക്കിംഗ് പ്രസിഡന്റായും പ്രവർത്തിച്ചു. മസ്ദൂർ സംഘത്തെ കേരളത്തിലെ പ്രബലമായ തൊഴിലാളി സംഘടനയാക്കുന്നതിൽ അദ്ദേഹം വഹിച്ച പങ്ക് വളരെ വലുതാണ്. നിലമ്പൂർ രാജകുടുംബത്തിലെ അംഗമായിരുന്നു അദ്ദേഹം. പക്ഷേ എക്കാലവും തൊഴിലാളികൾക്കൊപ്പമായിരുന്നു ജീവിതം. അവരുടെ ഉന്നമനത്തിനുവേണ്ടിയാണ് രാവും പകലും പ്രവർത്തിച്ചത്.

ഒരിക്കൽ മെട്രോമാൻ ഇ ശ്രീധരൻ വേണുവേട്ടനെക്കുറിച്ച് പറഞ്ഞത് ഓ‍ർക്കുന്നു. അദ്ദേഹം പാലക്കാട് വിക്ടോറിയ കോളജിൽ പഠിക്കുന്ന സമയം. പ്രചാരകനായിരുന്ന വേണുവേട്ടനുമായി പരിചയപ്പെട്ടു. ആർക്കും ബഹുമാനവും ആദരവും സൗഹൃദവും തോന്നുന്ന പെരുമാറ്റമായിരുന്നു വേണുവേട്ടന്റേതെന്ന് അദ്ദേഹം ഓർമിച്ചു. വേണുവേട്ടനുമായി പരിചയപ്പെട്ട എല്ലാവർക്കും അങ്ങനെ തന്നെയായിരുന്നു.

മറ്റ് ആർ എസ് എസ് പ്രചാരകൻമാരെപ്പോലെ തന്നെ ജീവിതകാലം മുഴുവൻ അവിവാഹിതനായി ജിവിച്ച് സമൂഹത്തെ സ്വന്തം കുടുംബമായിക്കണ്ട വ്യക്തിത്വമായിരുന്നു ശ്രീ ആർ വേണുഗോപാലിന്റേത്. ആ വലിയ ബന്ധങ്ങളും സുഹൃദ് വലയവും തന്നെയായിരുന്നു നിലമ്പൂർ രാജകുടുംബത്തിലെ പിൻമുറക്കാരന്റെ ഏക സമ്പാദ്യം.

ആർക്കും മാതൃകയാക്കാവുന്ന ജീവിതമാണ് വേണുവേട്ടന്റേത്. നിസ്വാർഥ സാമൂഹ്യസേവനത്തിന്റെ വലിയ ഉദാഹരണം. അദ്ദേഹം സ്വന്തം ജീവിതത്തിലൂടെ കാണിച്ചുതന്ന ആ മൂല്യങ്ങൾ നമ്മുടെ ജീവിതത്തിലും പ്രാവർത്തികമാക്കുകയാണ് വേണുവേട്ടനുവേണ്ടി നമുക്ക് അർപ്പിക്കാവുന്ന ആദരാഞ്ജലി. നാടിന് മാതൃകയായ , നമ്മുടെ പ്രിയപ്പെട്ട വേണുവേട്ടന് അന്ത്യാഞ്ജലി നേരുന്നു...